ମାୟାବତୀ ସିଏମ ଥିବା ସମୟରେ ଭାଇ-ଭାଉଜଙ୍କୁ ଅଧା ଦାମରେ ମିଳିଥିଲା ୨୬୧ ଫ୍ଲାଟ୍, ରିପୋର୍ଟରେ ବଡ଼ ଖୁଲାସା


ନୂଆଦିଲ୍ଲୀ: ବହୁଜନ ସମାଜ ପାର୍ଟିର ସୁପ୍ରିମୋ ମାୟାବତୀଙ୍କ ବିରୋଧରେ ଆସିଛି ସଙ୍ଗୀନ ଅଭିଯୋଗ। ଯେଉଁ ସମୟରେ ସେ ଉତ୍ତର ପ୍ରଦେଶର ମୁଖ୍ୟମନ୍ତ୍ରୀ ଥିଲେ, ସେହି ସମୟରେ ତାଙ୍କ ଭାଇ ଏବଂ ଭାଉଜଙ୍କୁ ଏକ ରିଏଲ ଏଷ୍ଟେଟ୍ କମ୍ପାନୀ ଲଜିକ୍ସ ଇନଫ୍ରାଟେକ୍ ପ୍ରାଇଭେଟ୍ ଲିମିଟେଡ ନୋଏଡାରେ ୨୬୧ ଫ୍ଲାଟ୍ ଆବଣ୍ଟିତ କରିଥିଲା। ନୂତନ ଖୁଲାସାରୁ ଜଣା ପଡ଼ିଛି ଯେ, ବେଆଇନ ଭାବେ ଏହି ସବୁ ଫ୍ଲାଟ୍ ମାୟାବତୀଙ୍କ ଭାଇଙ୍କୁ ଆବଣ୍ଟିତ କରାଯାଇଛି। ଏଥିରେ କୋଟି କୋଟି ଟଙ୍କାର ଦୁର୍ନୀତି ହୋଇଛି।

ଦ ଇଣ୍ଡିଆନ ଏକ୍ସପ୍ରେସ ସରକାରୀ ରେକର୍ଡର ଖୋଳତାଡ଼ କରି ଏହାର ଖୁଲାସା କରିଛି। ରିପୋର୍ଟରେ କମ୍ପାନୀର ଗଠନଠୁ ନେଇ ଏହାର ଦେବାଳିଆ ହେବା ପର୍ଯ୍ୟନ୍ତ ୧୨ ବର୍ଷର ସମସ୍ତ ନେଣଦେଣ ଏବଂ ଅନ୍ୟ ଗତିବିଧିର ଗଭୀର ଯାଞ୍ଚ କରାଯାଇଛି। ଏଥିରେ ୨୦୨୩ରେ କରାଯାଇଥିବା ଫରେନ୍ସିକ ଅଡିଟ୍ କାଜଗପତ୍ରକୁ ମଧ୍ୟ ସାମିଲ୍ କରାଯାଇଛି।

ରିପୋର୍ଟ ଅନୁଯାୟୀ, ୨୦୦୭ରେ ମାୟାବତୀ ଉତ୍ତର ପ୍ରଦେଶର ମୁଖ୍ୟମନ୍ତ୍ରୀ ହୋଇଥିଲେ ଏବଂ ୨୦୧୦ରେ ଲଜିକ୍ସ ଇନଫ୍ରାଟେକର ଗଠନ ହୋଇଥିଲା। ଗଠନର ଦୁଇ ମାସ ପରେ କମ୍ପାନୀ ମାୟାବତୀଙ୍କ ଭାଇ ଆନନ୍ଦ କୁମାର ଏବଂ ତାଙ୍କ ପତ୍ନୀ ବିଚିତ୍ର ଲତାଙ୍କୁ ନୋଏଡାର ବ୍ଲୋସମରେ ୨ ଲକ୍ଷ ବର୍ଗଫୁଟ ଜମିକୁ ଚୁକ୍ତି ଆଧାରରେ ବିକ୍ରି କରିଥିଲା। ଚୁକ୍ତି ଅନୁସାରେ ଗୋଟିଏ କିସମର ଜମିରେ ଏକ ବର୍ଗ ଫୁଟ୍ ପିଛା ୨୩୦୦ ଟଙ୍କା ଏବଂ ଅନ୍ୟ କିସମର ଜମିକୁ ଏକ ବର୍ଗ ଫୁଟ୍ ପିଛା ୨୩୫୦ ଟଙ୍କାରେ ବିକ୍ରି କରିଥିଲା। ଏହାରି ଆଧାରରେ ଆନନ୍ଦ କୁମାରଙ୍କୁ ୪୬.୦୨ କୋଟି ଏବଂ ବିଚିତ୍ର ଲତାଙ୍କୁ ୪୬.୯୩ କୋଟି ଟଙ୍କା ଦେବାର ଥିଲା।

ଚୁକ୍ତିନାମାର ୩ ବର୍ଷ ପରେ ଉତ୍ତର ପ୍ରଦେଶ ସରକାର ନୋଏଡା ପ୍ରଶାସନକୁ ଉକ୍ତ ଜମି ଉପରେ କୋଠା ନିର୍ମାଣ ପାଇଁ ଲଜିକ୍ସ ଇନଫ୍ରାଟେକ୍ ଲିଜରେ ଦେଇଥିଲା। ଏହା ପରେ ୨୦୧୬ ସୁଦ୍ଧା ଆନନ୍ଦ କୁମାରଙ୍କୁ ୧୩୫ ଆପାର୍ଟମେଣ୍ଟ ଏବଂ ବିଚିତ୍ର ଲତାଙ୍କୁ ୧୨୬ ଆପାର୍ଟମେଣ୍ଟ ମିଳିଥିଲା। ଯାହା ବାବଦରେ ସେମାନଙ୍କୁ ୨୮.୨୪ କୋଟି ଏବଂ ୨୮.୧୯ କୋଟି ଟଙ୍କା ଦେବାର ଅଗ୍ରୀମ ପୈଠ କରିବାର ଥିଲା। କିନ୍ତୁ ତଦନ୍ତରୁ ଜଣା ପଡିଛି ଯେ, ଶାଗ ମାଛ ଦରରେ ମାୟାବତୀଙ୍କ ଭାଇ ଏବଂ ତାଙ୍କ ପତ୍ନୀଙ୍କୁ ଫ୍ଲାଟ୍ ବିକ୍ରି କରାଯାଇଛି।