ପ୍ରଜ୍ଞା ପଟ୍ଟନାୟକ

16/06/2023 at 12:07 PM

ନୂଆଦିଲ୍ଲୀ: ଆଜିକାଲି ସବୁ କାର୍ଯ୍ୟର ପ୍ରମୁଖ ମାଧ୍ୟମ ହେଉଛି ଅନଲାଇନ। ଏହା ବୃତ୍ତିଗତ କାର୍ଯ୍ୟ ହେଉ କିମ୍ବା ପିଲାମାନଙ୍କର ଶିକ୍ଷା, ଇଣ୍ଟରନେଟ୍ ସବୁ ସ୍ଥାନରେ ବ୍ୟବହୃତ ହେଉଛି। ଯଦି ଆପଣଙ୍କୁ ସହର ବାହାରେ କୌଣସି ସ୍ଥାନକୁ ଯିବାକୁ ପଡୁଛି ତେବେ ହୋଟେଲ ବୁକ୍ କରିବା ପାଇଁ ଇଣ୍ଟରନେଟ୍ ବ୍ୟବହୃତ କରାଯାଉଛି। ତେବେ ଅନଲାଇନରେ ହୋଟେଲ ବୁକିଂ କରିବା ମଧ୍ୟ ବିପଦରୁ କମ୍ ନୁହେଁ। ଇଣ୍ଟରନେଟ୍ ମାଧ୍ୟମରେ ହୋଟେଲ ବୁକ୍ କରି ଆପଣ ଠକାମୀର ଶିକାର ହୋଇପାରନ୍ତି। ହୋଟେଲ ବୁକିଂ ନାମରେ ସାଇବର ଠକେଇର ଏକ ଗ୍ୟାଙ୍ଗକୁ ଦିଲ୍ଲୀ ପୋଲିସର କ୍ରାଇମ ଶାଖା ଗିରଫ କରିଛି। ଗିରଫ ଅଭିଯୁକ୍ତମାନେ କୋଟି କୋଟି ଟଙ୍କା ଠକି ନେଇଥିବା ଜଣାପଡିଛି। ଏହି ଗ୍ୟାଙ୍ଗର ନେଟୱାର୍କ ଦେଶର ଅନେକ ରାଜ୍ୟରେ ବ୍ୟାପି ଯାଇଥିବା ଜଣାପଡିଛି।

ଦିଲ୍ଲୀ କ୍ରାଇମ ବ୍ରାଞ୍ଚ ଅନୁଯାୟୀ ସାଇବର ଠକେଇର ଏହି ଗ୍ୟାଙ୍ଗ ହୋଟେଲ ବୁକିଂ ନାମରେ ଠକେଇ କରୁଥିଲେ। ଦିଲ୍ଲୀର ଜଣେ ବ୍ୟକ୍ତି ଅଭିଯୋଗ କରିଥିଲେ ଯେ ଅକ୍ଟୋବର ୨୦୨୨ ରେ ସେ ଗୁଜରାଟର ଦ୍ୱାରକାଦିଶ ମନ୍ଦିର ପରିଦର୍ଶନ କରିବାକୁ ଚାହୁଁଥିଲେ। ଯେଉଁଥିପାଇଁ ସେ ଗୁଜୁରାଟରେ ରହିବା ପାଇଁ ଇଣ୍ଟରନେଟ୍ ମାଧ୍ୟମରେ ହୋଟେଲ ବିଷୟରେ ସୂଚନା ନେଇଥିଲେ, ଯେଉଁଥିରେ ସେ ହୋଟେଲ କୋକିଲା, ଧୀରଜ ଧାମ ଏବଂ ମୋବାଇଲ୍ ନମ୍ବର ଇଣ୍ଟରନେଟରୁ ଖୋଜିଥିଲେ।

ଅନଲାଇନ୍ ଇଣ୍ଟରନେଟ୍ ମାଧ୍ୟମରେ ମିଳିଥିବା ମୋବାଇଲ୍ ନମ୍ବରରେ ଅଭିଯୋଗକାରୀ ଯୋଗାଯୋଗ କରିଥିଲେ ଯେଉଁଥିରେ ଅଭିଯୁକ୍ତ ନିଜକୁ ହୋଟେଲ କୋକିଲାର ମ୍ୟାନେଜର ବୋଲି ବର୍ଣ୍ଣନା କରିଥିଲେ। ଏହା ପରେ ଅଭିଯୁକ୍ତ ବୁକିଂ ନାମରେ ଅଭିଯୋଗକାରୀଙ୍କୁ ୧ ଲକ୍ଷରୁ ଅଧିକ ଟଙ୍କା ଠକିନେଇଥିଲେ। ତାଙ୍କୁ ପ୍ରତାରଣା କରାଯାଇଥିବା ଜାଣିବା ପରେ ଅଭିଯୋଗକାରୀ କ୍ରାଇମ ବ୍ରାଞ୍ଚରେ ଅଭିଯୋଗ କରିଥିଲେ।

ଘଟଣାର ଗମ୍ଭୀରତାକୁ ଦେଖି କ୍ରାଇମ ବ୍ରାଞ୍ଚ ଦ୍ୱାରା ଏକ ଟିମ୍ ଗଠନ କରାଯାଇଥିଲା। ଅନୁସନ୍ଧାନରେ, ଟିମ୍ ଆକାଉଣ୍ଟଧାରୀଙ୍କ ବିଷୟରେ ଜାଣିଥିଲେ। ଅଭିଯୁକ୍ତଙ୍କୁ ପଚରାଉଚରା ବେଳେ ଜଣାପଡିଥିଲା ଯେ ବ୍ୟାଙ୍କ ଆକାଉଣ୍ଟ ସାଇବର ଜାଲିଆତି ପାଇଁ ବ୍ୟବହୃତ ହୋଇଥିଲା ଏବଂ ବ୍ୟାଙ୍କ ଆକାଉଣ୍ଟକୁ ୧୦,୦୦୦ ଟଙ୍କାରେ ବିକ୍ରି କରାଯାଉଥିଲା।