ସୁଶୀଲ କୁମାର ବାଗ

30/06/2023 at 5:21 PM

କଳାହାଣ୍ଡି : କଳାହାଣ୍ଡି ଜିଲ୍ଲା ଲାଞ୍ଜିଗଡ଼ ବ୍ଲକ ବିଶ୍ବନାଥପୁର ବନାଞ୍ଚଳ ଅନ୍ତର୍ଗତ ଜଗନ୍ନାଥପୁର ପଞ୍ଚାୟତ ସିମିଳିଭଟା ତାଣ୍ଡି ପଦରରେ ଗୁରୁବାର ବିଳମ୍ବିତ ରାତିରେ ଦେଖିବାକୁ ମିଳିଛି ଜଙ୍ଗଲୀ ହାତୀପଲଙ୍କ ଉପଦ୍ରବ । ବିଳମ୍ବିତ ରାତିରେ ୧୫ରୁ ୨୦ଟିକିଆ ହାତୀପଲ ତାଣ୍ଡିପଦରକୁ ପଶି ଆସିଥିବାବେଳେ ପାମ୍ପୁ ମାଝୀ ଓ ନରେନ୍ଦ୍ର ମାଝୀଙ୍କ ଘରଦ୍ବାର ଭାଙ୍ଗିବା ସହିତ ଘରେ ଥିବା ଧାନ, ଚାଉଳ ସମେତ ସମସ୍ତ ଆସବାବପତ୍ରକୁ ଦଳିମକଚି ନଷ୍ଟବିନଷ୍ଟ କରିଦେଇଛନ୍ତି । ସେହିପରି ରାଶିମାଝୀ ନାମକ ଜଣେ ବ୍ୟକ୍ତିଙ୍କ ରଖିଥିବା ଧାନକୁ ଖାଇବା ସହିତ ଫିଙ୍ଗାଫୋପଡ଼ା କରିଦେଇଛନ୍ତି । ହାତୀପଲର ରଡ଼ି ଶୁଣି ପାମ୍ପୁ ଓ ନରେନ୍ଦ୍ରଙ୍କ ପରିବାର ଜୀବନ ବିକଳରେ ଘରୁ ବାହାରି ପଳାଇ ଯାଇଥିବାରୁ ସେମାନେ ବର୍ତ୍ତିଯାଇଥିବା ଜଣାପଡ଼ିଛି । ତେବେ ଘରଦ୍ବାର, ଆସବାବପତ୍ର, ଲୁଗାପଟା ଆଦି ସଂପୂର୍ଣ୍ଣ ନଷ୍ଟ ହୋଇଯାଇଥିବାରୁ ଦୁଇଟି ପରିବାର ସର୍ବସ୍ବାନ୍ତ ହୋଇ ପଡ଼ିଛନ୍ତି । ଏଣୁ ଏ ସଂପର୍କରେ ଖବର ପାଇ ବନବିଭାଗ ପକ୍ଷରୁ ବନପାଳ ଜଗନ୍ନାଥ ନାଗଙ୍କ ନେତ୍ରୁତ୍ବରେ ବନବିଭାଗର କର୍ମଚାରୀମାନେ ଘଟଣାସ୍ଥଳରେ ତଦନ୍ତ କରି ଫେରିଯାଇଛନ୍ତି ।