ଛତିଶଗଡ଼ ମୁଖ୍ୟମନ୍ତ୍ରୀଙ୍କ ଘନିଷ୍ଠ ବ୍ୟକ୍ତିଙ୍କ ଉପରେ ଇଡି ରେଡ୍, ବଘେଲ କହିଲେ ବାର୍ଥ ଡେ ଗିଫ୍ଟ

ରାୟପୁର: ଛତିଶଗଡ଼ରେ କେନ୍ଦ୍ରୀୟ ପ୍ରବର୍ତ୍ତନ ନିର୍ଦ୍ଦେଶାଳୟ(ଇଡି)ର ଚଢାଉ ଜାରି ରହିଛି। ବୁଧବାର ଇଡି ମୁଖ୍ୟମନ୍ତ୍ରୀ ଭୂପେଶ ବଘେଲଙ୍କ ରାଜନୈତିକ ପରାମର୍ଶଦାତା ବିନୋଦ ବର୍ମା ଓ ଓଏସଡିର ଠିକଣା ଉପରେ ଚଢାଉ କରିଛି। ବିନୋଦ ବର୍ମାଙ୍କ ଦେବେନ୍ଦ୍ରନଗର ବାସଭବନ ସହିତ ଓଏସଡି ମନୀଷ ବଞ୍ଛୋର, ଓଏସଡି ଆଶିଷ ବର୍ମା ଓ ତାଙ୍କର ଘନିଷ୍ଠ ବ୍ୟବସାୟୀ ବିଜୟ ଭାଟିଆଙ୍କ ଘରେ ମଧ୍ୟ ପହଞ୍ଚିଛି। ମୁଖ୍ୟମନ୍ତ୍ରୀ ବଘେଲ ଇଡିର ଏହି ଚଢାଉକୁ ବାର୍ଥଡେ ଗିଫ୍ଟ କହି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଓ କେନ୍ଦ୍ର ଗୃହ ମନ୍ତ୍ରୀ ଅମିତ ଶାହଙ୍କୁ ତାର୍ତ୍ସଲ୍ୟଭରା ସ୍ଵରରେ ଧନ୍ୟବାଦ ଦେଇଛନ୍ତି।

ସୂଚନାଯୋଗ୍ୟ, ଛତିଶଗଡ଼ରେ କଥିତ ମଦ ଓ କୋଇଲା ପରିବହନ ଘୋଟାଲାକୁ ନେଇ ଇଡି ରାଜ୍ୟରେ ଲଗାତାର ଚଢାଉ ଜାରି ରଖିଛି। ଏହି ମାମଲାରେ ଅଦ୍ୟାବଧି ୧୨ରୁ ଅଧିକ ଜଣଙ୍କୁ ଗିରଫ କରାଯାଇଛି। କୋଇଲା ପରିବହନ ଘୋଟାଲାରେ ମୁଖ୍ୟମନ୍ତ୍ରୀଙ୍କ ସଚିବାଳୟର ଅଧିକାରୀ ସୌମ୍ୟା ଚୌରାସିଆ ଓ ରାୟଗଢ ଜିଲ୍ଲାପାଳ ଆଇଏଏସ ରାନୁ ସହିତ ଅନେକ ଅଫିସର ଓ ବ୍ୟବସାୟୀ ବର୍ତ୍ତମାନ ଜେଲରେ ଅଛନ୍ତି। ବୁଧବାର ଚଢାଉ କେଉଁ ମାମଲାକୁ ନେଇ ହୋଇଛି ଏହା ସ୍ପଷ୍ଟ ହୋଇ ନାହିଁ।

ଆଜି ମୁଖ୍ୟମନ୍ତ୍ରୀ ଭୂପେଶ ବଘେଲଙ୍କ ଜନ୍ମଦିନ। ସେପଟେ ମୁଖ୍ୟମନ୍ତ୍ରୀଙ୍କ ଓଏସଡି ଓ ରାଜନୈତିକ ପରାମର୍ଶଦାତାଙ୍କ ବାସଭବନରେ ଇଡିର ଚଢାଉ ରାଜ୍ୟରେ ଚାଞ୍ଚଲ୍ୟ ଖେଳାଇ ଦେଇଛି। ଏହା ପୂର୍ବରୁ ଇଡି ଜୁଲାଇ ୨୧ରେ ରାନୁ ସାହୁ, ତାଙ୍କ ଆଇଏଏସ ସ୍ଵାମୀଙ୍କ ବାସଭବନ ସହିତ କଂଗ୍ରେସ ନେତା, ଅଫିସରଙ୍କ ଘରେ ଚଢାଉ କରିଥିଲା।