ରାଜଘାଟ ପହଞ୍ଚି ବାପୁଙ୍କୁ ଶ୍ରଦ୍ଧାଞ୍ଜଳି ଦେଲେ ପିଏମ ମୋଦୀ, ଖଡ଼ଗେ ଓ ଓମ ବିର୍ଲା ବି କଲେ ପ୍ରଣାମ
ନୂଆଦିଲ୍ଲୀ: ଆଜି ପୂରା ଦେଶ ଜାତିର ପିତା ମହାତ୍ମା ଗାନ୍ଧୀଙ୍କ ଜୟନ୍ତୀ ପାଳନ କରୁଛି। ଦେଶବାସୀ ନିଜ ନିଜ ହିସାବରେ ବାପୁଙ୍କୁ ଶ୍ରଦ୍ଧାଞ୍ଜଳି ଦେଉଛନ୍ତି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ରାଜଘାଟ ପହଞ୍ଚି ପୁଷ୍ପ ଅର୍ପଣ କରି ବାପୁଙ୍କୁ ଶ୍ରଦ୍ଧାଞ୍ଜଳି ଅର୍ପଣ କରିଛନ୍ତି। ପିଏମଙ୍କ ବ୍ୟତୀତ କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖଡ଼ଗେ ଓ ଲୋକସଭା ବାଚସ୍ପତି ଓମ ବିର୍ଲା ରାଜଘାଟ ପହଞ୍ଚି ମହାତ୍ମା ଗାନ୍ଧୀଙ୍କୁ ଶ୍ରଦ୍ଧାଞ୍ଜଳି ଦେଇଛନ୍ତି। ଗୋଟିଏ ଦିନ ପୂର୍ବେ ଅର୍ଥାତ ଅକ୍ଟୋବର ୧ ତାରିଖର ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ଵରେ ସମଗ୍ର ଦେଶରେ ସ୍ଵଚ୍ଛତା ଅଭିଯାନ କରାଯାଇଥିଲା।
ମହାତ୍ମା ଗାନ୍ଧୀଙ୍କୁ ଶ୍ରଦ୍ଧାଞ୍ଜଳୀ ଜଣାଇ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ କହିଛନ୍ତି, ଗାନ୍ଧୀ ଜୟନ୍ତୀର ବିଶେଷ ଅବସରରେ ମୁଁ ମହାତ୍ମା ଗାନ୍ଧୀଙ୍କୁ ପ୍ରଣାମ କରୁଛି। ତାଙ୍କର କାଳଜୟୀ ଶିକ୍ଷା ଆମର ପଥ ଆଲୋକିତ କରି ଚାଲିଛି। ମହାତ୍ମା ଗାନ୍ଧୀଙ୍କ ପ୍ରଭାବ ସମଗ୍ର ବିଶ୍ଵରେ ରହିଛି, ଯାହା ସଂପୂର୍ଣ୍ଣ ମାନବ ଜାତିକୁ ଏକତା ଓ କରୁଣା ଭାବନାରେ ଆଗକୁ ନେବା ପାଇଁ ପ୍ରେରିତ କରିଥାଏ। ଆମେ ସର୍ବଦା ସେମାନଙ୍କ ସ୍ଵପ୍ନକୁ ପୂରା କରିବା ଦିଗରେ କାମ କରି ଚାଲିଛୁ।
ପିଏମ ମୋଦୀ ପୂର୍ବତନ ପ୍ରଧାନମନ୍ତ୍ରୀ ଲାଲ ବାହାଦୂର ଶାସ୍ତ୍ରୀଙ୍କୁ ମଧ୍ୟ ମନେ ପକାଇ ଲେଖିଛନ୍ତି, ଲାଲ ବାହାଦୂର ଶାସ୍ତ୍ରୀ ଜୀଙ୍କୁ ତାଙ୍କ ଜୟନ୍ତୀରେ ସ୍ମରଣ କରୁଛି। ତାଙ୍କର ଜୀବନ ଶୈଳୀ, ଦେଶ ପ୍ରତି ସମର୍ପଣ ଓ ଜୟ ଯବାନ ଜୟ କିସାନର ପ୍ରତିଷ୍ଠିତ ଆହ୍ଵାନ ଆଜି ମଧ୍ୟ ପିଢି ପରେ ପିଢିକୁ ପ୍ରେରିତ କରୁଛି। ଭାରତର ପ୍ରଗତି ପ୍ରତି ତାଙ୍କର ଅତୁଟ ପ୍ରତିବଦ୍ଧତା ଏବଂ ଆହ୍ଵାନପୂର୍ଣ୍ଣ ସମୟରେ ତାଙ୍କର ନେତୃତ୍ଵ ଅନୁକରଣୀୟ ଅଟେ। ଆମେ ସର୍ବଦା ସଶକ୍ତ ଭାରତ ପ୍ରତି ତାଙ୍କ ଦୃଷ୍ଟିକୋଣକୁ ସାକାର କରିବା ପାଇଁ କାମ କରୁଛୁ।
