ଓଡ଼ିଶା ଡଟ୍ ନ୍ୟୁଜ୍ ବ୍ୟୁରୋ13/04/2023 at 12:47 PM
ନୂଆଦିଲ୍ଲୀ: ଆଦାନୀ ପ୍ରସଙ୍ଗର ପ୍ରଭାବ ୨୦୨୪ ଲୋକସଭା ନିର୍ବାଚନରେ ବିଜେପି ଉପରେ ପଡିବ। ଏହା କହିଛନ୍ତି ଜାମ୍ମୁ-କାଶ୍ମୀରର ପୂର୍ବତନ ରାଜ୍ୟପାଳ ସତ୍ୟପାଲ ମଲିକ। ଗୋଆ, ଜାମ୍ମୁ-କାଶ୍ମୀର, ମେଘାଳୟ ଏବଂ ବିହାରର ରାଜ୍ୟପାଳ ଭାବେ କାମ କରିଥିବା ମଲିକ କହିଛନ୍ତି ମୋଦୀ ସରକାରଙ୍କ ନିକଟରେ ଆଦାନୀ ପ୍ରସଙ୍ଗରେ କୌଣସି ଉତ୍ତର ନାହିଁ।
ସେ କହିଛନ୍ତି, ଏହି ପ୍ରସଙ୍ଗରେ ମୁଖର କଂଗ୍ରେସ ନେତା ରାହୁଲ ଗାନ୍ଧୀଙ୍କୁ ସଂସଦରେ ନିଜ ମତ ରଖିବାକୁ ଅନୁମତି ଦେବା ଉଚିତ୍ ଥିଲା। ମଲିକ ବାଚସ୍ପତିଙ୍କ ଆଭିମୁଖ୍ୟକୁ ଅଦ୍ଭୁତପୂର୍ବ ବୋଲି କହିଛନ୍ତି। ଆଦାନୀ ଗ୍ରୁପର କମ୍ପାନିରେ ୨୦ ହଜାର କୋଟି ଟଙ୍କାର ସ୍ରୋତ ବିଷୟରେ ପ୍ରଧାନମନ୍ତ୍ରୀ ଏବେ ମଧ୍ୟ କୌଣସି ପ୍ରତିକ୍ରିୟା ଦେଇ ନାହାନ୍ତି।
ପୂର୍ବତନ ରାଜ୍ୟପାଳ କହିଛନ୍ତି, ଆଦାନୀ ମାମଲା ସାଧାରଣ ଜନତାଙ୍କ ମନ ଭିତରେ ରହି ସାରିଛି। ଆଦାନୀ ପ୍ରସଙ୍ଗ ହିଁ ପ୍ରଧାନମନ୍ତ୍ରୀଙ୍କ ପ୍ରତିଷ୍ଠାକୁ ସବୁଠୁ ଅଧିକ ଖରାପ କରୁଛି। ଏହି ମାମଲା ୨୦୨୪ ନିର୍ବାଚନରେ ବିଜେପି ଉପରେ ପ୍ରତିକୂଳ ପ୍ରଭାବ ପକାଇବ। ତିନି କୃଷି ଆଇନ ଗୃହୀତ ହେବା ପରେ ମୋଦୀ ସରକାରଙ୍କ ସମାଲୋଚକ ରହିଥିବା ପୂର୍ବତନ ରାଜ୍ୟପାଳ କହିଛନ୍ତି, ସେ ଆଗାମୀ ଦିନରେ କୌଣସି ରାଜନୈତିକ ଦଳରେ ଯୋଗ ଦେବେ ନାହିଁ। କିନ୍ତୁ ୨୦୨୪ ନିର୍ବାଚନରେ ସେ ବିଜେପି ବିରୋଧରେ ପ୍ରଚାର କରିବେ।
ସେ ବିଜେପି ବିରୋଧୀରେ ମିଳିତ ବିରୋଧୀ ଗଠନ କରିବା ଉପରେ ଆଲୋଚନା କରୁଛନ୍ତି। ଯଦି ୨୦୨୪ ନିର୍ବାଚନରେ ପ୍ରତି ନିର୍ବାଚନ ମଣ୍ଡଳୀରେ ବିଜେପି ବିରୋଧରେ ଜଣେ ମିଳିତ ବିରୋଧୀଙ୍କ ପ୍ରାର୍ଥୀ ଦିଆଯାଏ ତେବେ ବିଜେପି ୧୫୦ରୁ ଅଧିକ ଆସନରେ ଜିତି ପାରିବ ନାହିଁ ବୋଲି ମଲିକ କହିଛନ୍ତି।