ପ୍ରଜ୍ଞା ପଟ୍ଟନାୟକ1/05/2023 at 2:49 PM
ନୂଆଦିଲ୍ଲୀ: ବିବାହର ଯେଉଁଠି ସ୍ୱାମୀ, ସ୍ତ୍ରୀଙ୍କ ମଧ୍ୟରେ ସମ୍ପର୍କ ସୁଧୁରିବାର କୌଣସି ସମ୍ଭାବନା ନଥିବ ସେଭଳି କ୍ଷେତ୍ରରେ ସିଧାସଳଖ ଛାଡପତ୍ର ପାଇଁ ନିର୍ଦ୍ଦେଶ ଦେଇପାରିବେ ସୁପ୍ରିମ୍କୋର୍ଟ। ପରସ୍ପର ସହମତିରେ ଛାଡପତ୍ର ପାଇଁ ପ୍ରଯୁଜ୍ୟ ଅବଧି ୬ ମାସ ଯାଏ ଅପେକ୍ଷା କରିବାର ଆଇନଗତ ବାଧ୍ୟତାମୂଳକ ମଧ୍ୟ ଏଭଳି ପରିସ୍ଥିତିରେ ଆବଶ୍ୟକ ହେବ ନାହିଁ।
ଏହି କ୍ଷେତ୍ରରେ ସୁପ୍ରିମ୍କୋର୍ଟ ବିବାହ ରଦ୍ଦ ପୂର୍ବକ ଛାଡପତ୍ରକୁ ମଞ୍ଜୁରୀ ଦେଇପାରିବେ। ସୁପ୍ରିମକୋର୍ଟର ୫ ଜଣ ବିଚାରପତିଙ୍କ ସମ୍ବିଧାନ ଖଣ୍ଡପୀଠ ଏହି ନିଷ୍ପତ୍ତି ଦେଇଛନ୍ତି। ବେଞ୍ଚ କହିଛି ଯେ ସମ୍ବିଧାନର ଧାରା ୧୪୨ ଅନୁଯାୟୀ ଦିଆଯାଇଥିବା ସ୍ୱତନ୍ତ୍ର ଶକ୍ତି ବ୍ୟବହାର କରି ସୁପ୍ରିମକୋର୍ଟ ଏପରି ନିର୍ଦ୍ଦେଶ ଦେଇପାରିବେ।
ହିନ୍ଦୁ ବିବାହ ଅଧିନିୟମ ୧୯୫୫ ର ଧାରା 13-B ରେ ଏକ ବ୍ୟବସ୍ଥା ଅଛି ଯେ ସ୍ୱାମୀ-ସ୍ତ୍ରୀ ଫ୍ୟାମିଲି କୋର୍ଟରେ ପାରସ୍ପରିକ ସମ୍ମତି ଦେଇ ଛାଡପତ୍ର ପାଇଁ ଆବେଦନ କରିପାରିବେ। କିନ୍ତୁ ଫ୍ୟାମିଲି କୋର୍ଟରେ ଅଧିକ ସଂଖ୍ୟକ ମାମଲା ଥିବାରୁ ଆବେଦନ ଶୁଣାଣି ପାଇଁ ବିଚାରପତିଙ୍କ ନିକଟକୁ ଆସିବାକୁ ସମୟ ଲାଗିଥାଏ।