ଓଡ଼ିଶା ଡଟ୍ ନ୍ୟୁଜ୍

12/12/2024 at 11:53 AM

ବଣାଇ: ରାତିରେ ଆସି କବାଟ ବାଢେଇଲେ । କବାଟ ଖୋଲିବା ପରେ ଗର୍ଭବତୀ ମହିଳାଙ୍କ ବେକରୁ ସୁନା ଚେନ ଲୁଟି ଗୁଳି ମାରିଲେ । ଫଳରେ ମହିଳାଙ୍କ ମୃତ୍ୟୁ ଘଟିଛି । ସେ ୭ ମାସର ଗର୍ଭବତୀ ଥିଲେ । ଘଟଣା ଘଟିଛି ସୁନ୍ଦରଗଡ଼ ଜିଲ୍ଲା ବଣାଇର ଟିକାୟତପାଲି ଥାନା ଝିର୍ଡାପାଲିରେ । ମୃତ ମହିଳାଙ୍କ ନାଁ ସୀମାମୟୀ ବେହେରା (୩୦) ।

ଅଭିଯୋଗ ଅନୁଯାୟୀ, ଗତକାଲି ରାତି ପ୍ରାୟ ୧୨ଟା ୫୦ରେ କେହି ସେମାନଙ୍କ ଘରର କବାଟ ବାଡ଼େଇ ଥିଲେ । ଏହା ଶୁଣି ସୀମା କବାଟ ଖୋଲି ଥିଲେ। ସେ କବାଟ ଖୋଲିବା ମାତ୍ରେ ୨ ଜଣ ଦୁର୍ବୃତ୍ତ ତାଙ୍କ ବେକରୁ ସୁନା ଚେନ୍ ଟାଣି ନେଇଥିଲେ । ସୀମା ପାଟି କରିବାରୁ ଦୁର୍ବୃତ୍ତମାନେ ତାଙ୍କ ଉପରକୁ ଗୁଳି ମାଡ଼ କରି ଫେରାର ହୋଇଯାଇଥିଲେ ।

ଗୁଳିଟି ସୀମାଙ୍କ ଛାତିର ବାମ ପଟରେ ବାଜିଥିଲା । ପରିବାର ଲୋକେ ତାଙ୍କୁ ବଣାଇ ଡାକ୍ତରଖାନାକୁ ନେଇଥିଲେ। ତେବେ ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ଡାକ୍ତରଖାନାରେ ପହଞ୍ଚିବା ପୂର୍ବରୁ ତାଙ୍କର ମୃତ୍ୟୁ ଘଟିଥିଲା ।

ଦୁର୍ବୃତ୍ତଙ୍କୁ ସୀମାଙ୍କ ପରିବାର ଲୋକେ ଦେଖିଥିବା କହୁଥିବା ବେଳେ ପ୍ରକୃତରେ କେତେ ଜଣ ଆସିଥିଲେ, ତାହା ତଦନ୍ତ ପରେ ଜଣାପଡ଼ିବ ବୋଲି କହିଛନ୍ତି ଟିକାୟତପାଲି ଥାନା ଆଇଆଇସି ଅନାମ ଚରଣ ନାୟକ । ଦୁର୍ବୃତ୍ତମାନେ ଲୁଟ୍ ଉଦ୍ଦେଶ୍ୟରେ ଆସି ଏହି ସାତ ମାସର ଗର୍ଭବତୀଙ୍କୁ ଗୁଳି କଲେ ନା ଏହା ପଛରେ ଆଉ କିଛି ଉଦ୍ଦେଶ୍ୟ ରହିଛି, ତାହାର ପୁଲିସର ତଦନ୍ତ କରୁଛି ପୋଲିସ ।