ଆଦିବାସୀ ନାବାଳିକାଙ୍କୁ ପାହାଡ଼ ଉପରକୁ ଟେକି ନେଇ ଗଣ ଦୁଷ୍କର୍ମ ଅଭିଯୋଗ, ୪ ଅଟକ


କୋରାପୁଟ: ନାଟକ ଦେଖିବାକୁ ଯାଇଥିବା ଜଣେ ଆଦିବାସୀ ନାବାଳିକାଙ୍କୁ ଗଣ ଦୁଷ୍କର୍ମ ଅଭିଯୋଗ । ୪ ଜଣ ଯୁବକ ନାବାଳିକାଙ୍କୁ ପାହାଡ଼ ଉପରକୁ ଉଠାଇ ନେଇ ଦୁଷ୍କର୍ମ କରିଥିବା ଅଭିଯୋଗ ହୋଇଛି । ଘଟଣାରେ ପୋଲିସ ୪ ଅଭିଯୁକ୍ତଙ୍କୁ ଅଟକ ରଖି ପଚରାଉଚରା କରୁଛି । ଘଟଣାକୁ ଗୁରୁତ୍ବର ସହ ନେଇଛି କୋରାପୁଟ ପୋଲିସ । ନିଜେ ଏସପି ଘଟଣାର ତଦାରଖ କରୁଥିବା ବେଳେ ତାଙ୍କ ନିର୍ଦ୍ଦେଶରେ ତଦନ୍ତ ଚାଲିଛି । ଲକ୍ଷ୍ମୀପୁର ବ୍ଲକ ଓଡ଼ିଆପେଣ୍ଠ ପଞ୍ଚାୟତ ବିରିଗୁଡା ଗାଁରେ ଘଟିଛି ଏହି ଲଜ୍ଜାଜନକ ଘଟଣା ।

ଅଭିଯୋଗ ଅନୁସାରେ, ବିରିଗୁଡା ଗାଁରେ ବୁଢୀ ଠାକୁରାଣୀ ଯାତ୍ରା ଚାଲିଛି । ଏହି ଅବସରରେ ଗାଁରେ ନାଟକ ମଞ୍ଚସ୍ଥ ହେଉଥିଲା । ନାଟକ ଦେଖିବା ପାଇଁ ଆଖପାଖ ଗାଁର ହଜାର ହଜାର ଲୋକ ଏକାଠି ହୋଇଥିଲା । ବିଳମ୍ବିତ ରାତିରେ ନାଟକ ଚାଲିଥିବା ବେଳେ ଜଣେ ନାବାଳିକା ତାର ସାଙ୍ଗ ସହ ଅଳ୍ପ କିଛି ଦୂରକୁ ଯାଇ କଥା ହେଉଥିଲା। ଏହି ସମୟରେ ୪ ଜଣ ଯୁବକ ନାବାଳିକାକୁ ପାହାଡ଼ ଉପରକୁ ଟେକି ନେଇ ଗଣଦୁଷ୍କର୍ମ କରିଥିବା ଲକ୍ଷ୍ମୀପୁର ଥାନାରେ ଅଭିଯୋଗ ହୋଇଛି । ଏସପିଙ୍କ ନିର୍ଦ୍ଦେଶରେ ଅତିରିକ୍ତ ଏସପି, ଲକ୍ଷ୍ମୀପୁର ଥାନା ଆଇଆଇସି ଓ କାକିରିଗୁମ୍ମା ଥାନା ଆଇଆଇସି ଘଟଣାର ତଦନ୍ତ କରୁଛନ୍ତି ।