ଗରୁଡ ଧ୍ୱଜ ଚୌଧୁରୀ24/03/2025 at 7:43 PM
ପାରଳାଖେମୁଣ୍ଡି:୨୪/୩(ଗରୁଡ ଧ୍ୱଜ ଚୌଧୁରୀ)ଅନୁଗୁଳ ମଦ ବ୍ୟବସାୟୀ ବିକ୍ରମ ସାହୁଙ୍କ ଲିଙ୍କ୍ରେ ପାରଳାଖେମୁଣ୍ଡି ଠାରେ ଆୟକର ବିଭାଗର ସ୍ବତନ୍ତ୍ର ଟିମ୍ ଚଢ଼ଉ ଓ ତଦନ୍ତ ଗତକାଲି ରାତ୍ରରେ ଶେଷ ହୋଇଛି. ତିନି ଦିନ ଧରି ଅଧିକାରୀଙ୍କ ତଦନ୍ତ ସରିବା ପରେ ସମସ୍ତେ ଫେରିଯାଇଛନ୍ତି। ପାରଳାଖେମୁଣ୍ଡି ସହରର ତିରୁପତି ସାହୁକାର ଓ ଲୋକେଶ୍ଵର ସାହୁକାରଙ୍କ ଘରେ ଏବଂ ସେମାନଙ୍କ ବିଭିନ୍ନ ବ୍ୟବସାୟିକ ପ୍ରତିଷ୍ଠାନରେ ଆୟକର ତରଫରୁ ଚଢଉ ହୋଇଥିଲା। ଆୟକର ବିଭାଗ ତରଫରୁ ଉଭୟଙ୍କ ବିଭିନ୍ନ ବ୍ୟାଙ୍କରେ ଥିବା ଆକାଉଣ୍ଟ ଓ ଲକର ଯାଞ୍ଚ କରାଯାଇଥିଲା। ଏପରିକି ତଦନ୍ତ କରୁଥିବା ଆୟକର କର୍ମଚାରୀ କାହାକୁ କିଛି ନ ଜଣାଇ ବହୁ ବ୍ୟାଙ୍କକୁ ଯାଇ ଖାତା ଓ ଲକର ଯାଞ୍ଚ କରିଥିଲେ । ବିଶେଷ କରି ୟୁନିୟନ ବ୍ୟାଙ୍କ, ଷ୍ଟେଟ ବ୍ୟାଙ୍କ ଅଫ ଇଣ୍ଡିଆ ସମେତ ଅନ୍ୟାନ୍ୟ ବ୍ୟାଙ୍କରେ ଉଭୟ ଭ୍ରାତାଙ୍କ ଆକାଉଣ୍ଟ ଓ ଲକରକୁ ଯାଞ୍ଚ କରାଯାଇଛି। ଶନିବାର ତୃତୀୟ ଦିବସରେ ଉକ୍ତ ଆକାଉଣ୍ଟ ଓ ଲକର୍ରେ ଥିବା ସମ୍ପରି ସମ୍ପର୍କରେ ଟିକିନିଖ୍ ଯାଞ୍ଚ କରାଯାଇଥିଲା । ଶନିବାର ବିଳମ୍ବିତ ରାତ୍ର ସାଢ଼େ ୧୧ ଘଣ୍ଟା ପର୍ଯ୍ୟନ୍ତ ଦୁଇ ଭାଇଙ୍କ ଘରକୁ ତଦନ୍ତ କରୁଥିବା ଆୟକର ବିଭାଗର ଅଧିକାରୀ ବାରମ୍ବାର ଦସ୍ତାବିଜ ଧରି ଯିବାଆସିବା କରୁଥିବାର ଦେଖୁବାକୁ ମିଳିଥିଲା । ତଦନ୍ତ ବେଳେ ଆୟକର ବିଭାଗ ଅଧିକାରୀ କିଛି ଗୁରୁତ୍ବପୂର୍ଣ୍ଣ ସୂଚନା ପାଇଥିବା ସନ୍ଦେହ କରାଯାଉଛି। ତୃତୀୟ ଦିବସରେ ସେନେଇ ଉକ୍ତ ଦସ୍ତାବିଜଗୁଡ଼ିକ ତନତନ କରି ତଦନ୍ତ କରିଥିଲେ I ଅନୁମାନ କରାଯାଉଛି ଯେ ସେଥିରେ ଉଭୟ ଭ୍ରାତାଙ୍କ ସହ ବ୍ୟବସାୟିକ କିମ୍ବା ଅନ୍ୟ ଆର୍ଥିକ ସମ୍ପର୍କରେ ରଖୁଥିବା ବ୍ୟକ୍ତି ବିଶେଷଙ୍କ ତଥ୍ୟ ତଦନ୍ତକାରୀ ଆୟକର ବିଭାଗ ହାତରେ ବୋଧେ ଲାଗିଛି। ତଦନ୍ତ କରୁଥିବା ଅଧିକାରୀ ତଦନ୍ତରେ କ’ଣ ତଥ୍ୟ ଓ ସାମଗ୍ରୀ ପାଇଛନ୍ତି ସେ ସମ୍ପର୍କରେ କୌଣସି ସୂଚନା ଦେଇନାହାନ୍ତି I ଆୟକର ଅଧିକାରୀଙ୍କ ସୂଚନା ସେମାନଙ୍କ ହେଡ଼ ଅଫିସରେ ପ୍ରଦାନ କରିବା ପରେ ତାହାର ବିସ୍ତୃତ ରିପୋର୍ଟ ମିଡ଼ିଆ ଦ୍ୱାରା ପ୍ରକାଶ ପାଇବା ପରେ ଏହି ଚଢ଼ାଉର ସବିଶେଷ ତଥ୍ୟ ଲୋକଲୋଚନକୁ ଆସିବ.