MLA Salary: ଓଡ଼ିଶା ବିଧାୟକଙ୍କ ଦରମା ବଢ଼ିବ! ୩ ଗୁଣା ବୃଦ୍ଧି ବିଲ୍ ପ୍ରତ୍ୟାହାର ପରେ କମିଟି ଦେଲା ବଡ଼ ସଙ୍କେତ
ଭୁବନେଶ୍ୱର: ଓଡ଼ିଶାର ବିଧାୟକ ଓ ପୂର୍ବତନ ବିଧାୟକଙ୍କ ଦରମା, ଭତ୍ତା ଏବଂ ପେନସନ୍ରେ ସଂଶୋଧନ ପାଇଁ ମିଳିତ ବିଧାନସଭା କମିଟି ସୁପାରିସ କରିଛି। ବର୍ତ୍ତମାନର ଦରମା ଓ ଭତ୍ତା ବ୍ୟବସ୍ଥାକୁ ଅନ୍ୟ ରାଜ୍ୟର ବିଧାନସଭା ଏବଂ ସଂସଦରେ ମିଳୁଥିବା ସୁବିଧା ସହ ତୁଳନା କରିବା ପରେ କମିଟି ଏହି ମତ ଦେଇଛି। ରବିବାର ରାଜ୍ୟ ସରକାରଙ୍କ ପାର୍ଲାମେଣ୍ଟାରୀ ଆଫେୟାର୍ସ ବିଭାଗ ପକ୍ଷରୁ ଏନେଇ ସୂଚନା ଦିଆଯାଇଛି।
ତେବେ ଏହି ନିଷ୍ପତ୍ତି ସେତେବେଳେ ଆସିଛି, ଯେତେବେଳେ କିଛି ମାସ ପୂର୍ବରୁ ବିଧାୟକଙ୍କ ଦରମା ଓ ଭତ୍ତା ୩ ଗୁଣା ବଢ଼ାଇବା ପାଇଁ ଆଗତ ବିଲ୍କୁ ନେଇ ରାଜ୍ୟରେ ତୀବ୍ର ବିରୋଧ ହୋଇଥିଲା। ଗତ ମାର୍ଚ୍ଚ ୨୬ରେ ବିଜେପି ସରକାର ବିଧାନସଭାରେ ପାରିତ ହୋଇଥିବା ୪ଟି ବିଲ୍କୁ ପ୍ରତ୍ୟାହାର କରିଥିଲେ। ସେହି ବିଲ୍ରେ ବିଧାୟକ, ମନ୍ତ୍ରୀ, ମୁଖ୍ୟମନ୍ତ୍ରୀ, ବାଚସ୍ପତି ଓ ଉପବାଚସ୍ପତିଙ୍କ ଦରମା, ଭତ୍ତା ଏବଂ ପେନସନ୍ରେ ବଡ଼ ଧରଣର ବୃଦ୍ଧି ପ୍ରସ୍ତାବ ରହିଥିଲା। ବିଧାୟକଙ୍କ ମାସିକ ଦରମା ଓ ଭତ୍ତା ୧.୧୧ ଲକ୍ଷ ଟଙ୍କାରୁ ୩.୪୫ ଲକ୍ଷ ଟଙ୍କା କରିବା ପ୍ରସ୍ତାବ ଥିଲା।
ଏବେ କମିଟିର ମତ ପରେ ପୁଣିଥରେ ବିଧାୟକଙ୍କ ଦରମା ଓ ପେନସନ୍ ସଂଶୋଧନକୁ ନେଇ ଚର୍ଚ୍ଚା ଆରମ୍ଭ ହୋଇଛି। ବିଜେଡି ବିଧାୟକ ଗଣେଶ୍ୱର ବେହେରା କହିଛନ୍ତି ଯେ, ଅନ୍ୟ ରାଜ୍ୟ ତୁଳନାରେ ଓଡ଼ିଶାର ବିଧାୟକଙ୍କ ଦରମା କମ୍ ରହିଛି, ତେଣୁ ଏହାକୁ ବୃଦ୍ଧି କରିବାର ଆଵଶ୍ୟକତା ରହିଛି |ସେହିପରି ପୂର୍ବତନ ବିଧାୟକଙ୍କ ଆର୍ଥିକ ସ୍ଥିତି ଏବଂ ଚିକିତ୍ସା ଖର୍ଚ୍ଚକୁ ନେଇ ମଧ୍ୟ ସେ ଚିନ୍ତା ପ୍ରକାଶ କରିଛନ୍ତି। ବର୍ତ୍ତମାନ ଜଣେ ପୂର୍ବତନ ବିଧାୟକଙ୍କୁ ମାସିକ ୩୦ ହଜାର ଟଙ୍କା ପେନସନ୍ ମିଳୁଛି। ଏହି ପ୍ରସଙ୍ଗରେ ସାଂସଦ ବୀରେନ୍ଦ୍ର ପ୍ରସାଦ ବୈଶ୍ୟଙ୍କ ଅଧ୍ୟକ୍ଷତାରେ ଗଠିତ ମିଳିତ କମିଟି ଦରମା ଓ ଭତ୍ତା ବ୍ୟବସ୍ଥାର ସମୀକ୍ଷା କରିଛି।
