Judge Ravi Kumar Diwakar Transfer: ୩୬ଟି ମୃତ୍ୟୁଦଣ୍ଡ ଶୁଣାଇ ଚର୍ଚ୍ଚାରେ ଥିବା ବିଚାରପତିଙ୍କ ବଦଳି, ଏବେ ଫ୍ୟାମିଲି କୋର୍ଟରେ ନିଯୁକ୍ତି
ଉତ୍ତରପ୍ରଦେଶ: ଉତ୍ତରପ୍ରଦେଶର ବିଚାରପତି ରବି କୁମାର ଦିୱାକରଙ୍କୁ ଫାଷ୍ଟ ଟ୍ରାକ୍ କୋର୍ଟରୁ ଫ୍ୟାମିଲି କୋର୍ଟକୁ ବଦଳି କରାଯାଇଛି। ନ୍ୟାୟିକ ବଦଳି ଆଦେଶ ଅନୁସାରେ, ସେ ଏବେ ମୁଜାଫରନଗର ଫ୍ୟାମିଲି କୋର୍ଟର ଅତିରିକ୍ତ ପ୍ରଧାନ ବିଚାରପତି ଭାବେ ଦାୟିତ୍ୱ ଗ୍ରହଣ କରିବେ। ଚଳିତ ବର୍ଷ ଏପ୍ରିଲ୍ରୁ ସେପ୍ଟେମ୍ବର ମଧ୍ୟରେ ମୁଜାଫରନଗରର ୧୧ଟି ମାମଲାରେ ୨୩ଟି ମୃତ୍ୟୁଦଣ୍ଡ ଏବଂ ବରେଲିରେ ୧୩ଟି ମୃତ୍ୟୁଦଣ୍ଡ ଶୁଣାଇଥିବାରୁ ସେ ଜାତୀୟ ସ୍ତରରେ ଚର୍ଚ୍ଚାକୁ ଆସିଥିଲେ।
ରିପୋର୍ଟ ଅନୁସାରେ, ଏହି ବଦଳି ସମ୍ପର୍କିତ ଆଦେଶ ନ୍ୟାୟିକ ପ୍ରଶାସନ ପକ୍ଷରୁ ଜାରି କରାଯାଇଛି। ଏହା ଅନୁଯାୟୀ, ଫାଷ୍ଟ ଟ୍ରାକ୍ କୋର୍ଟରେ ତାଙ୍କର ଦାୟିତ୍ୱ ଶେଷ ହେବା ପରେ ସେ ମୁଜାଫରନଗରର ଫ୍ୟାମିଲି କୋର୍ଟରେ ନୂଆ ଦାୟିତ୍ୱ ତୁଲାଇବେ। ତେବେ ଏହି ବଦଳି ପଛରେ କୌଣସି ବିଶେଷ କାରଣ ରହିଛି କି ନାହିଁ, ସେନେଇ ଦିଆଯାଇଥିବା ସୂଚନାରେ କିଛି ସ୍ପଷ୍ଟ କରାଯାଇନାହିଁ।
ବିଚାରପତି ଦିୱାକରଙ୍କ ବଦଳି ଖବର ସାମ୍ନାକୁ ଆସିବା ପରେ ତାଙ୍କର ନୂଆ ନିଯୁକ୍ତିକୁ ନେଇ ଚର୍ଚ୍ଚା ଆରମ୍ଭ ହୋଇଛି। ମୁଜାଫରନଗର ଫ୍ୟାମିଲି କୋର୍ଟର ଅତିରିକ୍ତ ପ୍ରଧାନ ବିଚାରପତି ଭାବେ ସେ ଏବେ ପରିବାର ସମ୍ପର୍କିତ ମାମଲାର ନ୍ୟାୟିକ ପ୍ରକ୍ରିୟାରେ ଦାୟିତ୍ୱ ନିର୍ବାହ କରିବେ।
