ଓଡ଼ିଶା ଡଟ୍ ନ୍ୟୁଜ୍

3/06/2024 at 12:06 PM

ପାରଳାଖେମୁଣ୍ଡି: ନିର୍ବାଚନ ସରିଛି । ଭୋଟରଙ୍କ ମତ ଇଭିଏମରେ ସିଲ୍ ହୋଇ ଏବେ ରାଜ୍ୟର ବିଭିନ୍ନ ସ୍ଥାନରେ ହୋଇଥିବା ଭୋଟ ଗଣତି କେନ୍ଦ୍ରର ଷ୍ଟ୍ରଙ୍ଗ ରୁମରେ କଡା ସୁରକ୍ଷା ବଳୟ ଭିତରେ ରଖାଯାଇଛି । ହେଲେ ପ୍ରକୃତି ଆଗରେ ସବୁ ଫେଲ । ଗତକାଲି ଗଜପତି ଜିଲ୍ଲା ପାରଳାଖେମୁଣ୍ଡିରେ ହୋଇଥିବା କାଳବୈଶାଖୀ ବ୍ୟାପକ କ୍ଷୟକ୍ଷତି କରିଛି । ଏପରିକି କାଳବୈଶାଖୀ ଓ ପ୍ରବଳ ବର୍ଷା ସହ ପବନ ଯୋଗୁଁ ପାରଳାଖେମୁଣ୍ଡିରେ ହୋଇଥିବା ଷ୍ଟ୍ରଙ୍ଗ ରୁମର ବ୍ୟାରିକେଡ ଓ ପାଚେରୀ ଭାଙ୍ଗି ଯାଇଛି । ଫଳରେ ଗତକାଲି ସନ୍ଧ୍ୟାରୁ ଷ୍ଟ୍ରଙ୍ଗ ରୁମକୁ କଡ଼ା ସୁରକ୍ଷା ବଳୟ ଭିତରେ ରଖିଛି ଜିଲ୍ଲା ପ୍ରଶାସନ ।

ଗତକାଲି କାଳବୈଶାଖୀ ଯୋଗୁଁ ପାରଳାଖେମୁଣ୍ଡିରେ ବ୍ୟାପକ କ୍ଷୟକ୍ଷତି ହୋଇଛି । ପ୍ରବଳ ବର୍ଷା ଓ ପବନ ହେବାରୁ ବଡ଼ ବଡ଼ ଗଛ ମଧ୍ୟ ରାସ୍ତାରେ ଉପୁଡ଼ି ପଡ଼ିଛି । ସେହିପରି ପାରଳାଖେମୁଣ୍ଡି ଏସକେସିଜି କଲେଜରେ ହୋଇଥିବା ଷ୍ଟ୍ରଙ୍ଗ ରୁମରେ ଏହାର ବ୍ୟାରିକେଡ୍ ଏବଂ ପାଚେରୀ ଭାଙ୍ଗି ଯାଇଛି । ଯୁଦ୍ଧକାଳୀନ ଭିତ୍ତିରେ ଏହାର ନିର୍ମାଣ କରାଯିବ ବୋଲି ସୂଚନା ଦେଇଛନ୍ତି ଗଜପତି ଜିଲ୍ଲାପାଳ ସ୍ମୃତି ରଞ୍ଜନ ପ୍ରଧାନ ।

ଅନ୍ୟପକ୍ଷରେ ଅସନ୍ତାକାଲି ଭୋଟ ଗଣତି ହେବ । ବିଭିନ୍ନ ସ୍ଥାନରେ ଥିବା ଷ୍ଟ୍ରଙ୍ଗରୁମ୍ ଚାରିପଟେ ତ୍ରିସ୍ତରୀୟ ସୁରକ୍ଷା ବ୍ୟବସ୍ଥା କରାଯାଇଛି । ସିସିଟିଭି ସର୍ଭେଲାନ୍ସ ଅଧୀନରେ ରହିଛି ଷ୍ଟ୍ରଙ୍ଗ ରୁମ୍ । ଷ୍ଟ୍ରଙ୍ଗ ରୁମ୍ ବାହାରେ ଦିନରାତି ପଇଁତରା ମାରୁଛନ୍ତି ସୁରକ୍ଷାବଳ ।