ଓଡ଼ିଶା ଡଟ୍ ନ୍ୟୁଜ୍

7/07/2024 at 11:47 AM

ଅମରାବତୀ: ଜେଲ ଭିତରେ ପଡ଼ିଲା କ୍ରିକେଟ୍ ବଲ୍ । କେହି କିଛି ବୁଝିବା ପୂର୍ବରୁ ହେଲା ଭୟଙ୍କର ବିସ୍ଫୋରଣ । ବୁଝ ବୁଝ ଜଣାପଡିଲା, କ୍ରିକେଟ୍ ବଲ ଭିତରେ ବୋମା ଖଞ୍ଜି କେହି ଜେଲ ଭିତରକୁ ଫିଙ୍ଗିଥିଲା । ଯାହାକୁ ନେଇ କଏଦୀ ଓ ଜେଲ କର୍ମଚାରୀଙ୍କ ମଧ୍ୟରେ କୋକୁଆ ଭୟ ଖେଳି ଯାଇଛି । ଏମିତି ଘଟଣା ଘଟିଛି ମହାରାଷ୍ଟ୍ରର ଅମରାବତୀରେ । ତେବେ ଏହି ଘଟଣାରେ କେହି ମୃତାହତ ହୋଇ ନଥିବା ଜଣାପଡ଼ିଛି ।

ମିଳିଥିବା ସୂଚନା ମୁତାବକ, ଅମରାବତୀ ସେଣ୍ଟ୍ରାଲ ଜେଲରେ ଶନିବାର ରାତିରେ ଘଟିଛି ଏହି ଘଟଣା । ଖବର ପାଇ ପୋଲିସ କମିଶନର, ଡିସିପିଙ୍କ ସମେତ ଅନ୍ୟ ଅଧିକାରୀ ଘଟଣାସ୍ଥଳରେ ପହଞ୍ଚି ଯାଞ୍ଚ କରିଛନ୍ତି । କ୍ରିକେଟ ବଲ୍‌ ଭିତରୁ ବିସ୍ଫୋରକ ସାମଗ୍ରୀ ମିଳିବା ପରେ ଜେଲ ଭିତରେ ଆତଙ୍କ ଖେଳି ଯାଇଛି ।

କିଛି ଦୁର୍ବୃତ୍ତ ରାତରେ ଜେଲ କାନ୍ଥ ବାହାରେ ବାରୁଦ ଭର୍ତ୍ତି ଦୁଇଟି ବଲ୍‌ ଫୋପାଡିଥିବା ସନ୍ଦେହ କରାଯାଉଛି । ଏହି ସମୟରେ ଗୋଟିଏ ବଲ୍‌ରେ ବିସ୍ଫୋରଣ ହୋଇଥିବା ବେଳେ ଅନ୍ୟ ଏକ ବଲ୍‌ ଜବତ କରାଯାଇଛି । ତେବେ ଏହି ବିସ୍ଫୋରଣରେ କେହି ମୃତାହତ ହୋଇ ନାହାନ୍ତି । କିନ୍ତୁ ଜେଲର ସୁରକ୍ଷାକୁ ନେଇ ପ୍ରଶ୍ନ ଉଠିଛି । କିଏ ଜେଲ୍‌ ଭିତରକୁ ଏଭଳି ବାରୁଦ ଭର୍ତ୍ତି ବଲ୍‌ ପିଙ୍ଗିଲା ସେ ନେଇ ପୋଲିସ ଯାଞ୍ଚ ଜାରି ରଖିଛି । ବିସ୍ଫୋରଣରେ କେଉଁ ପ୍ରକାରର ବାରୁଦ ବ୍ୟବହାର କରାଯାଇଥିବା ଫରେନସିକ୍ ଯାଞ୍ଚ ପରେ ଜଣାପଡିବ ବୋଲି ପୋଲିସ କମିଶନର ନବୀନଚନ୍ଦ୍ର ରେଡ୍ଡୀ କହିଛନ୍ତି ।