ଓଡ଼ିଶା ଡଟ୍ ନ୍ୟୁଜ୍31/08/2024 at 11:30 AM
କୁତ୍ରା: ସୁନ୍ଦରଗଡ଼ ଜିଲ୍ଲା କୁତ୍ରା ଅଞ୍ଚଳରେ ଜଣେ ମହିଳାଙ୍କ ମୃତ୍ୟୁ ଏବେ ଚର୍ଚ୍ଚାରେ ରହିଛି । ମହିଳାଙ୍କୁ ତାଙ୍କ ଶ୍ବଶୁର ଘର ଲୋକେ କବର ଦେଇ ଦେଇଥିଲେ । ହେଲେ ବାପ ଘର ଲୋକଙ୍କ ଅଭିଯୋଗ ପରେ ପୋଲିସ କବର ଖୋଳି ମହିଳାଙ୍କ ଶବ ଜବତ କରିଛି । ଘଟଣା କୁତ୍ରା ଥାନା ଖତକୁରବାହାଲରେ ଘଟିଛି । ଶାଶୁ ଘର ଲୋକ ଝିଅକୁ ହତ୍ୟା କରିଥିବା ନେଇ ମୃତ ମହିଳାଙ୍କ ପରିବାର ଅଭିଯୋଗ କରିଛନ୍ତି । ମୃତ ମହିଳାଙ୍କ ନାଁ ସରିନ ବୋଲି ଜଣାପଡ଼ିଛି ।
ତଥ୍ୟ ଅନୁସାରେ, ରାଉରକେଲା ନାଲାରୋଡ଼ର ସରିନ, କୁତ୍ରା ଥାନା ଖତକୁରବାହାଲ ଅଞ୍ଚଳର ମନାୱାର ରାଜାଙ୍କୁ ୨୦୧୯ ମସିହାରେ ବିବାହ କରିଥିଲେ । ଗତ ୨୭ ତାରିଖରେ ସରିନଙ୍କୁ ହାର୍ଟ ଆଟାକ ହୋଇଛି, ତେଣୁ ତାଙ୍କୁ ହସ୍ପିଟାଲ ନେଉଛୁ ବୋଲି ଶାଶୁ ଘର ଲୋକେ ତାଙ୍କ ଭାଇ ୱାସିମଙ୍କୁ ଜଣାଇଥିଲେ । ଏହାର କିଛି ସମୟ ପରେ ସରିନଙ୍କ ମୃତ୍ୟୁ ଘଟିଥିବା ଖବର ଦେଇଥିଲେ ।
ଖବର ପାଇବା ପରେ ସରିନଙ୍କ ପରିବାର ଲୋକେ ତାଙ୍କ ଶାଶୁ ଘରେ ପହଞ୍ଚି ଝିଅର ମୃତ୍ୟୁର କାରଣ ଜାଣିବାକୁ ଚାହିଁଥିଲେ । ହେଲେ ସରିନଙ୍କ ଶାଶୁ ଘର ଲୋକଙ୍କ କଥାରେ ତାଳମେଳ ରହି ନଥିଲା । ଯାହାକୁ ନେଇ ଦୁଇ ପରିବାର ମଧ୍ୟରେ ଝଗଡ଼ା ହୋଇଥିଲା ।
ଏହି ସମୟରେ ସରିନଙ୍କ ଶାଶୁ ଘର ଲୋକେ ତରବରରେ ତାଙ୍କ ଅନ୍ତିମ ସଂସ୍କାର କରି ଦେଇଥିଲେ । ଯାହାକୁ ନେଇ ସରିନଙ୍କ ବାପ ଘର ଲୋକଙ୍କ ମନରେ ସନ୍ଦେହ ସୃଷ୍ଟି ହୋଇଥିଲା । ଏନେଇ ସରିନଙ୍କ ଭାଇ କୁତ୍ରା ଥାନାରେ ଅଭିଯୋଗ କରିଥିଲେ ।
ଅଭିଯୋଗ ପାଇବା ପରେ ପୋଲିସ ଏକ ମାମଲା ରୁଜୁ କରି ଫରେନସିକ୍ ଟିମ୍ ସହ ଘଟଣା ସ୍ଥଳରେ ପହଞ୍ଚିଥିଲା । ମାଜିଷ୍ଟ୍ରେଟଙ୍କ ଉପସ୍ଥିତିରେ କବରସ୍ଥାନ ଖୋଳି ମହିଳାଙ୍କ ମୃତଦେହ ଜବତ କରାଯାଇ ବ୍ୟବଚ୍ଛେଦ ପାଇଁ ପଠାଯାଇଛି । ବ୍ୟବଚ୍ଛେଦ ରିପୋର୍ଟ ଆସିବା ପରେ ମୃତ୍ୟୁର ପ୍ରକୃତ କାରଣ ଜଣାପଡିବ ବୋଲି ପୋଲିସ କହିଛି ।
ଅନ୍ୟପକ୍ଷରେ, ଘଟଣାର ଉପଯୁକ୍ତ ତଦନ୍ତ ସହ ନ୍ୟାୟ ପ୍ରଦାନ ପାଇଁ ଦାବି କରିଛନ୍ତି ସରିନଙ୍କ ଭାଇ । ଅନ୍ୟପଟେ ସ୍ତ୍ରୀଙ୍କ ପରିବାର ଲୋକ ଆଣିଥିବା ଅଭିଯୋଗକୁ ଖଣ୍ଡନ କରିଛନ୍ତି ମୃତକଙ୍କ ସ୍ୱାମୀ ।