ସୁଶୀଲ କୁମାର ବାଗ

18/05/2023 at 4:14 AM

କଳାହାଣ୍ଡି,୧୭/୦୫-ଆସନ୍ତା ୧୯ ତାରିଖ ଶୁକ୍ରବାର ଦିନ ତିନିଦିନିଆ କଳାହାଣ୍ଡି ଗସ୍ତରେ ଆସୁଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ବ୍ୟକ୍ତିଗତ ସଚିବ ତଥା ଫାଇଭ୍-ଟି ସଚିବ ଭି. କାର୍ତ୍ତିକେୟନ ପାଣ୍ଡିୟାନ ! ସେ ୧୯ ତାରିଖ ସକାଳୁ ହେଲିକେପ୍ଟର ଯୋଗେ ଆସିବା ସହିତ ଏଇ ନିକଟରେ କେନ୍ଦ୍ର ସରକାରଙ୍କ ଉଡ଼ାଣ ଯୋଜନାରେ ସାମିଲ ହୋଇଥିବା ଉତ୍କେଲା ଏୟାର ଷ୍ଟ୍ରିପରେ ଓହ୍ଲାଇ ଏୟାରଷ୍ଟ୍ରିପର ଲାଇସେନ୍ସିଂ ସଂପର୍କରେ ଆଲୋଚନା କରିବେ ! ସେଠାରୁ ବେଲଖଣ୍ଡି ଶିବ ମନ୍ଦିର ପରିଦର୍ଶନ ପରେ ସଡ଼କପଥରେ ମ.ରାମପୁର ଯିବା ସହିତ ଆମ ହସ୍ପିଟାଲ ଯୋଜନାରେ ସାମିଲ ହୋଇଥିବା ମ. ରାମପୁର ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ପରିଦର୍ଶନ ଓ ପ୍ରସ୍ତାବିତ ସାନ୍ଦୁଲ ଜଳସେଚନ ପ୍ରକଳ୍ପ ସଂପର୍କରେ ତଦାରଖ କରିବେ ! ସେଠାରୁ ନର୍ଲାସ୍ଥିତ ମିଶନ ଶକ୍ତି କାଫେ, ମିନି ଷ୍ଟାଡ଼ିୟମ୍ ପରିଦର୍ଶନ କରି ଭବାନୀପାଟଣା ଆସିବା ସହିତ ପୋଲିସ ହାଇସ୍କୁଲ, ଆଶା ସାଗର ପରିଦର୍ଶନ କରି ଜୁନାଗଡ଼ ଯିବେ ! ସେଠାରେ ବିଜୁ ପଟ୍ଟନାୟକ ଷ୍ଟାଡ଼ିୟମ, ଲଙ୍କେଶ୍ବରୀ ମନ୍ଦିର ପରିଦର୍ଶନ କରି ପୁଣି ଭବାନୀପାଟଣା ଫେରିଆସିବେ ! ଭବାନୀପାଟଣାରେ ନବନିର୍ମିତ ମେଡିକାଲ କଲେଜ ଓ ଟିଚିଂ କ୍ୟାମ୍ପସ, ଓୟୁଏଟି କ୍ୟାମ୍ପସ ପରିଦର୍ଶନ ପରେ ଭବାନୀପାଟଣା ଟାଉନ୍ ହଲ୍ ରେ ମିଶନଶକ୍ତିର ମହିଳାମାନଙ୍କ ସହିତ ଆଲୋଚନା କରିବେ ! ସେହିପରି ଭବାନୀପାଟଣା ସ୍ପୋର୍ଟ୍ସ ହଷ୍ଟେଲରେ ଛାତ୍ରଛାତ୍ରୀଙ୍କ ସହ ମତ ବିନିମୟ କରିବେ ! ଏହାପରେ ଲାଞ୍ଜିଗଡ଼ ଭଟାଙ୍ଗପଦର ଇକୋ ଟୁରିଜିମ୍ କମ୍ପ୍ଲେକ୍ସରେ ରାତ୍ରିଯାପନ କରିବେ ! ତାଙ୍କ ଦ୍ବିତୀୟ ଦିନର ଗସ୍ତରେ ସେ ପିପଲ ନାଳା, କ୍ଷୁଦ୍ର ଜଳସେଚନ ପ୍ରକଳ୍ପ, ଭଟାଙ୍ଗପଦର ହାଇସ୍କୁଲ ଓ ଖେଳପଡ଼ିଆ ପରିଦର୍ଶନ କରିବା ପରେ ଥୁଆମୂଳ ରାମପୁର ବ୍ଲକ ପରିଦର୍ଶନରେ ହେଲିକେପ୍ଟରରେ ବାହାରିବେ ! ସେଠାରେ ମାଁ ମାଣିକେଶ୍ବରୀ ମହାବିଦ୍ୟାଳୟ, ପ୍ରସ୍ତାବିତ ଡିଗ୍ରୀ କଲେଜ, ପିଡବ୍ଲ୍ୟୁଡି ବଙ୍ଗଳା ପରିଦର୍ଶନ ପରେ ହେଲିକେପ୍ଟରରେ କଲମପୁର ବ୍ଲକ ଗସ୍ତରେ ଯିବେ ! ସେଠାରେ କଲମପୁର ମିନି ଷ୍ଟାଡ଼ିୟମ ପରିଦର୍ଶନ ଓ ସ୍ଥାନୀୟ ଲୋକଙ୍କ ସହିତ ମତ ବିନିମୟ କରିବେ ! ସେଠାରୁ ଜୟପାଟଣା ମଙ୍ଗଳପୁର ବ୍ୟାରେଜରେ ପ୍ରସ୍ତାବିତ ଇନ୍ଦ୍ରାବତୀ ପାର୍କ ଓ ମ୍ୟୁଜିୟମ୍ ପରିଦର୍ଶନ କରିବେ ! ସେଠାରୁ ଆମପାଣି ବୁଢ଼ାରଜା ପୀଠ, ଗୁଡ଼ହାଣ୍ଡି- ଡୋକରିଚଞ୍ଚରା ପରିଦର୍ଶନ ପରେ ଧର୍ମଗଡ଼ ବ୍ଲକ ଗସ୍ତରେ ଯିବେ ! ସେଠାରେ ଆହାର କେନ୍ଦ୍ର, ଭଣ୍ଡାରଘରଣୀ ମନ୍ଦିର, ବିଜୁ ପଟ୍ଟନାୟକ ଇନ୍ ଡୋର ଷ୍ଟାଡ଼ିୟମ୍, ପଞ୍ଚାୟତ କଲେଜ, ବିଜୁ କଲ୍ୟାଣ ମଣ୍ଡପ, ଯଶୋଦା ଅନାଥାଶ୍ରମ ପରିଦର୍ଶନ କରିବେ ବୋଲି ସୂଚନା ମିଳିଛି ! ଏହାପରେ ସେ ଧର୍ମଗଡ଼ ପିଡବ୍ଲ୍ୟୁଡି ବଙ୍ଗଳାରେ ରାତ୍ରିଯାପନ କରିବେ ! ତାଙ୍କ ଗସ୍ତର ତ୍ରୁତୀୟ ଦିନରେ ସେ ଧର୍ମଗଡ଼ରୁ ବାହାରି ଗୋଲାମୁଣ୍ଡା ବ୍ଲକ ବ୍ରୁନ୍ଦାବାହାଲ ବିଦ୍ୟୁତ୍ ଗ୍ରୀଡ଼ ପରିଦର୍ଶନ କରିବେ ! ସେଠାରୁ ସେ ନୂଆପଡ଼ା ଜିଲ୍ଲା ଗସ୍ତରେ ଯିବେ ! ପାଣ୍ଡିୟାନଙ୍କ ଗସ୍ତକୁ ନେଇ ଜିଲ୍ଲା ପ୍ରଶାସନ ବେଶ୍ ପ୍ରସ୍ତୁତିରେ ଲାଗି ପଡ଼ିଥିବାବେଳେ ନିଜ ଦଳର ମୁଖିଆଙ୍କ ବ୍ୟକ୍ତିଗତ ସଚିବ ଆସୁଥିବାରୁ ଜିଲ୍ଲାର ବିଜେଡି ମହଲ ମଧ୍ୟ ଉତ୍ସାହିତ ହୋଇ ପଡ଼ିଛନ୍ତି !