ପୁଣି ଥରେ ଦିଲ୍ଲୀରେ ସ୍କୁଲକୁ ମିଳିଲା ବୋମା ଧମକ; ଇ-ମେଲ୍ ଜରିଆରେ ଆସିଛି ଧମକ
ନୂଆଦିଲ୍ଲୀ,୧୦|୧୨: ଦିଲ୍ଲୀରୁ ଏକ ଚାଞ୍ଚଲ୍ୟକର ଖବର ଆସିଛି | ଘଟଣାଟି ଆଜି ସକାଳେ ଘଟିଛି | ପୂର୍ବ ଦିଲ୍ଲୀର ଏକ ନାମୀ ସ୍କୁଲ୍କୁ ଆସିଛି ବୋମା ଧମକ । ପୂର୍ବ ଦିଲ୍ଲୀର ମୟୂର ବିହାର ଫେଜ୍-୧ ସ୍ଥିତ ମଦର୍ ମେରି ସ୍କୁଲକୁ ଏକ ବୋମା ସମ୍ପର୍କିତ ଧମକ ଆସିଛି | ଧମକଟି ଇ-ମେଲ୍ ଜରିଆରେ ଆସିଥିବାର ସୂଚନା | ତେବେ ଏହା ପରେ ତୁରନ୍ତ ସ୍କୁଲ୍ରୁ ସମସ୍ତ ଛାତ୍ରଛାତ୍ରୀ, ଶିକ୍ଷକ ଓ କର୍ମଚାରୀଙ୍କୁ ନିରାପଦରେ ବାହାରକୁ ବାହାର କରାଯାଇ ସ୍କୁଲକୁ ପୁରା ଖାଲି କରାଯାଇଛି | ଖବର ପାଇବା ମାତ୍ରେ ଘଟଣାସ୍ଥଳରେ ଦିଲ୍ଲୀ ପୁଲିସ୍ ସହିତ ବମ୍ ଡିସ୍ପୋଜାଲ୍ ସ୍କ୍ୱାଡ୍, ଡଗ୍ ସ୍କ୍ୱାଡ୍, ଫାୟାର ବ୍ରିଗେଡ୍ ଓ ଆମ୍ବୁଲାନ୍ସ୍ ପହଞ୍ଚିଛି । ସ୍କୁଲ ପରିସର ଓ ଆଖପାଖ ଅଞ୍ଚଳକୁ ପୂରା ସିଲ୍ କରି ଦିଆଯାଇଛି । ବମ୍ ସ୍କ୍ୱାଡ୍ ଓ ଡଗ୍ ସ୍କ୍ୱାଡ୍ ସହ ବ୍ୟାପକ ସର୍ଚ୍ଚ ଅପରେସନ୍ ଚାଲିଛି । ତେବେ ଏ ପର୍ଯ୍ୟନ୍ତ କୌଣସି ସ୍ପଷ୍ଟ ସୂଚନା ମିଳିନାହିଁ |
ଗତ କିଛି ମାସ ମଧ୍ୟରେ ଦିଲ୍ଲୀ-ଏନସିଆରରେ ଏହା ଦଶମଥର ଭାବରେ ସ୍କୁଲ୍କୁ ବୋମା ଧମକ ମିଳିଛି ! ଏହା ପୂର୍ବରୁ ଡିପିଏସ୍, ସଂସ୍କୃତି ସ୍କୁଲ୍, ଇଣ୍ଡିଆନ୍ ସ୍କୁଲ୍ ଆଦି ବହୁ ନାମୀ ସ୍କୁଲ୍କୁ ଏପରି ଧମକ ମଧ୍ୟ ଆସିଛି । ଅଧିକାଂଶ ଧମକ ମିଥ୍ୟା ବୋଲି ପ୍ରମାଣିତ ହୋଇଛି । ତେବେ ପୁଲିସ୍ ଏବେ ଇ-ମେଲ୍ର ସୋର୍ସ ଗୁଡିକୁ ଟ୍ରେସ୍ କରୁଛି । ସାଇବର ଟିମ୍ ଓ ସ୍ପେଶାଲ୍ ସେଲ୍ ମଧ୍ୟ ତଦନ୍ତରେ ଲାଗିଛନ୍ତି। ଅଭିଭାବକମାନେ ସମସ୍ତେ ନିଜ ପିଲାଙ୍କ ନିରାପତ୍ତାକୁ ନେଇ ଚିନ୍ତାରେ। କିନ୍ତୁ ସ୍କୁଲ୍ ପ୍ରଶାସନ ଅଭିଭାବକଙ୍କୁ ଆଶ୍ୱସ୍ତ କରିଛନ୍ତି ଯେ, ସବୁ ଛାତ୍ରଛାତ୍ରୀ ନିରାପଦରେ ଅଛନ୍ତି।
