ରଣବୀର ସିଂହଙ୍କ ପରିବାରର ପାକିସ୍ତାନ କନେକ୍ସନ୍
ବଲିଉଡ୍ ଅଭିନେତା ରଣବୀର ସିଂହଙ୍କ ପାକିସ୍ତାନ ସହ ଏକ ପରିବାରିକ ସମ୍ପର୍କ ଥିବା କଥା ଏବେ ପୁଣି ଚର୍ଚ୍ଚାରେ ଆସିଛି । ଏକ ଖବର ଅନୁସାରେ, ରଣବୀରଙ୍କ ଜେଜେମା ଚାନ୍ଦ ବର୍କଙ୍କ ଜନ୍ମ ୧୯୩୨ ମସିହାରେ ପାକିସ୍ତାନର ପଞ୍ଜାବ ପ୍ରଦେଶର ଲୟାଲପୁରରେ ହୋଇଥିଲା, ଯାହାକୁ ଏବେ ଫୈସଲାବାଦ ବୋଲି କୁହାଯାଏ । ସେ ପଞ୍ଜାବୀ ସିନେମାର ଖ୍ୟାତନାମା ଅଭିନେତ୍ରୀ ଥିଲେ ଏବଂ ନୃତ୍ୟ ପ୍ରତିଭା ପାଇଁ “ଡାନ୍ସିଂ ଲିଲି ଅଫ୍ ପଞ୍ଜାବ” ଭାବେ ଜଣାଯାଉଥିଲେ । ପରେ ଭାରତ-ପାକିସ୍ତାନ ବିଭାଜନ ପରେ ସେ ମୁମ୍ବାଇକୁ ଆସିଥିଲେ ଓ ଏଠାରୁ ତାଙ୍କ ଅଭିନୟ ଜୀବନର ନୂଆ ଅଧ୍ୟାୟ ଆରମ୍ଭ ହୋଇଥିଲା ।
ଖବରରେ କୁହାଯାଇଛି ଯେ, ରଣବୀର ସିଂହଙ୍କ ଅଭିନୟ ପ୍ରତି ଆଗ୍ରହ ଓ ପ୍ରତିଭାର ମୂଳ ସୂତ୍ର ତାଙ୍କ ଜେଜେମା ଚାନ୍ଦ ବର୍କଙ୍କଠୁ ମିଳେ । ଚାନ୍ଦ ବର୍କ ୧୯୪୬ରେ ପଞ୍ଜାବୀ ଫିଲ୍ମ ମାଧ୍ୟମରେ ଅଭିନୟ ଜଗତକୁ ପ୍ରବେଶ କରିଥିଲେ ଏବଂ ପରେ ରାଜ କପୁରଙ୍କ “ବୁଟ୍ ପଲିସ୍” ଫିଲ୍ମରେ ମଧ୍ୟ ଅଭିନୟ କରିଥିଲେ । ଏହିପରି ଭାବରେ ରଣବୀରଙ୍କ ତାରକା ଜୀବନ ପଛରେ ତାଙ୍କ ପରିବାରର ଏକ ଫିଲ୍ମୀ ଏବଂ ଐତିହାସିକ ପୃଷ୍ଠଭୂମି ରହିଛି, ଯାହାର ସଂଯୋଗ ପାକିସ୍ତାନ ସହ ମଧ୍ୟ ଜଡିତ ।
