ତ୍ରିରଙ୍ଗା ଯାତ୍ରା ବେଳେ ୪୦ରୁ ଅଧିକ ଛାତ୍ରୀ ଅସୁସ୍ଥ, ଗରମ ଓ ଖରାରେ ବିଗିଡ଼ିଲା ସ୍ୱାସ୍ଥ୍ୟ
ଉତ୍ତରପ୍ରଦେଶ: ସ୍ୱାଧୀନତା ଦିବସ ପୂର୍ବରୁ ଉତ୍ତରପ୍ରଦେଶର ଦେଓରିଆରେ ଆୟୋଜିତ ହୋଇଥିବା ତ୍ରିରଙ୍ଗା ଯାତ୍ରା ସମୟରେ ୪୦ରୁ ଅଧିକ ଛାତ୍ରୀ ଅସୁସ୍ଥ ହୋଇପଡ଼ିଛନ୍ତି। ଗୁରୁବାର, ଅଗଷ୍ଟ ୧୩ରେ ଜିଲ୍ଲା ପ୍ରଶାସନ ପକ୍ଷରୁ ଏହି ତ୍ରିରଙ୍ଗା ଯାତ୍ରା ଆୟୋଜନ କରାଯାଇଥିଲା। ଯାତ୍ରା ସମୟରେ ଅନେକ ଛାତ୍ରୀ ମୁଣ୍ଡ ବୁଲାଇବା ଓ ଅସୁସ୍ଥ ଅନୁଭବ କରିଥିବା ବେଳେ କିଛି ଛାତ୍ରୀ ଷ୍ଟାଡିୟମରେ ପହଞ୍ଚିବା ପରେ ଚେତାଶୂନ୍ୟ ହୋଇଯାଇଥିଲେ।
ଡାକ୍ତରଙ୍କ ପ୍ରାଥମିକ ମତ ଅନୁସାରେ, ପ୍ରବଳ ଗରମ ଓ ଖରାରେ ଦୀର୍ଘ ସମୟ ଧରି ରହିବା ଯୋଗୁଁ ଛାତ୍ରୀମାନଙ୍କ ସ୍ୱାସ୍ଥ୍ୟ ବିଗିଡ଼ିଥିବା ସମ୍ଭାବନା ରହିଛି। ତ୍ରିରଙ୍ଗା ଯାତ୍ରା ଶେଷ ହେବା ପରେ ଅସୁସ୍ଥ ଛାତ୍ରୀମାନଙ୍କୁ ତୁରନ୍ତ ଚିକିତ୍ସା ପାଇଁ ମହର୍ଷି ଦେବରାହା ବାବା ଅଟୋନୋମସ୍ ଷ୍ଟେଟ୍ ମେଡିକାଲ କଲେଜର ଜରୁରୀକାଳୀନ ବିଭାଗକୁ ନିଆଯାଇଥିଲା।
ଘଟଣାର ଖବର ପାଇ ଷ୍ଟାଡିୟମରେ ଏକାଧିକ ଆମ୍ବୁଲାନ୍ସ ପହଞ୍ଚିଥିଲା। ଅସୁସ୍ଥ ଛାତ୍ରୀମାନଙ୍କୁ ଆମ୍ବୁଲାନ୍ସ ଯୋଗେ ହସ୍ପିଟାଲକୁ ନିଆଯାଇ ଚିକିତ୍ସା କରାଯାଇଛି। ଘଟଣା ପରେ ଛାତ୍ରୀମାନଙ୍କ ସ୍ୱାସ୍ଥ୍ୟାବସ୍ଥା ଉପରେ ଡାକ୍ତରମାନେ ନଜର ରଖିଛନ୍ତି।
