ୟୁପିରେ ଗୋମୂତ୍ର ସଂଗ୍ରହ ପାଇଁ ପାଇଲଟ୍ ପ୍ରକଳ୍ପ, ଚାଷୀଙ୍କ ଆୟ ବଢ଼ାଇବା ଲକ୍ଷ୍ୟ; ସମାଜବାଦୀ ପାର୍ଟିର କଟାକ୍ଷ
ଉତ୍ତରପ୍ରଦେଶ: ଉତ୍ତରପ୍ରଦେଶର ଯୋଗୀ ଆଦିତ୍ୟନାଥ ସରକାର ବୁଲନ୍ଦଶହରରେ ଗୋମୂତ୍ର ସଂଗ୍ରହ ପାଇଁ ଏକ ପାଇଲଟ୍ ପ୍ରକଳ୍ପ ଆରମ୍ଭ କରିଛନ୍ତି। ଏହା ମାଧ୍ୟମରେ ଚାଷୀଙ୍କ ଆୟ ବଢ଼ାଇବା ସହ ଗାଈ ପାଳନରେ ସହାୟତା ମିଳିବ ବୋଲି ସରକାର ଆଶା ରଖିଛନ୍ତି । ବିଶେଷକରି ଗାଈର ଦୁଗ୍ଧ ଉତ୍ପାଦନ ବନ୍ଦ ହେବା ପରେ ମଧ୍ୟ ସେଗୁଡ଼ିକୁ ପାଳନ କରୁଥିବା ପରିବାର ପାଇଁ ଏହା ଅତିରିକ୍ତ ଆୟର ଉତ୍ସ ହୋଇପାରେ। ସଂଗୃହୀତ ଗୋମୂତ୍ରକୁ କୃଷି କ୍ଷେତ୍ରରେ କଞ୍ଚାମାଲ ଭାବେ ବ୍ୟବହାର କରି ରାସାୟନିକ ଫର୍ମୁଲେସନର ବିକଳ୍ପ ବିକଶିତ କରିବା ଉପରେ ମଧ୍ୟ ଗୁରୁତ୍ୱ ଦିଆଯାଉଛି।
ବର୍ତ୍ତମାନ ବୁଲନ୍ଦଶହରର ୧୫ଟି ଗାଁରେ ଏହି ପ୍ରକଳ୍ପ ଚାଲିଛି। ସିୟାନା ତହସିଲର ନରସୈନା ଗାଁରେ ଡାକ୍ତର ପ୍ରବୀଣଙ୍କ ନେତୃତ୍ୱରେ ଏକ ଫାର୍ମର ପ୍ରଡ୍ୟୁସର ଅର୍ଗାନାଇଜେସନ୍ (FPO) ମାଧ୍ୟମରେ ଗୋମୂତ୍ର ସଂଗ୍ରହ କରାଯାଉଛି। ବର୍ତ୍ତମାନ ପ୍ରତିଦିନ ପ୍ରାୟ ୫୦୦ ଲିଟର ଗୋମୂତ୍ର ସଂଗ୍ରହ ହେଉଛି। ଆଗାମୀ ଦିନରେ ପ୍ରତି ଲିଟର ପିଛା ୨୦ ଟଙ୍କା ପର୍ଯ୍ୟନ୍ତ କ୍ରୟ ମୂଲ୍ୟ ବଢ଼ାଇବାର ଯୋଜନା ରହିଛି। ଗାଁଗୁଡ଼ିକରେ ଗୋମୂତ୍ର ସଂରକ୍ଷଣ ପାଇଁ ୨୦୦ ଲିଟର କ୍ଷମତା ବିଶିଷ୍ଟ ଟାଙ୍କି ମଧ୍ୟ ସ୍ଥାପନ କରାଯାଇଛି। ପ୍ରକଳ୍ପରେ ପ୍ରାୟ ୩୦୦ ଜଣ ମହିଳା ସାମିଲ ହୋଇଥିବା ବେଳେ ଗୋମୂତ୍ର ସଂଗ୍ରହରେ ସହଯୋଗ କରୁଥିବା ମହିଳାଙ୍କୁ ପ୍ରତି ଲିଟର ପିଛା ୨ ଟଙ୍କା କମିସନ ଦିଆଯାଉଛି।
ତେବେ ଏହି ପ୍ରକଳ୍ପକୁ ନେଇ ବିରୋଧୀ ସମାଜବାଦୀ ପାର୍ଟି (SP) ସରକାରଙ୍କୁ କଟାକ୍ଷ କରିଛି। ଦଳର ମୁଖପାତ୍ର ମହମ୍ମଦ ଆଜମ ଖାନ୍ ଏହାକୁ ଏକ ‘ସ୍କାମ୍’ ବୋଲି ଅଭିଯୋଗ କରିବା ସହ ନିର୍ବାଚନ ପାଇଁ ପାଣ୍ଠି ଯୋଗାଡ଼ ଉଦ୍ଦେଶ୍ୟରେ ଏଭଳି ପଦକ୍ଷେପ ନିଆଯାଇଥିବା ଦାବି କରିଛନ୍ତି। ଅନ୍ୟପକ୍ଷରେ ବିଜେପି ମୁଖପାତ୍ର ହିରୋ ବାଜପେୟୀ ଏହି ଅଭିଯୋଗକୁ ଖଣ୍ଡନ କରି କହିଛନ୍ତି ଯେ, ସମାଜବାଦୀ ପାର୍ଟି ପ୍ରତ୍ୟେକ ବିକାଶମୂଳକ ଯୋଜନାରେ ତ୍ରୁଟି ଖୋଜୁଛି। ସରକାରଙ୍କ ଏହି ପ୍ରକଳ୍ପ ସଫଳ ହେଲେ ଏହାକୁ ସମଗ୍ର ରାଜ୍ୟରେ ଲାଗୁ କରିବା ପାଇଁ ଔପଚାରିକ ନୀତି ପ୍ରସ୍ତୁତ କରାଯିବ।
