Rare Baby Born in MP: ୪ ହାତ ୪ ଗୋଡ଼ ନେଇ ଜନ୍ମ, ଡାକ୍ତର ଆଶ୍ଚର୍ଯ୍ୟ; Air Ambulanceରେ ଜବଲପୁରକୁ ସ୍ଥାନାନ୍ତର
ମଧ୍ୟପ୍ରଦେଶ: ମଧ୍ୟପ୍ରଦେଶର ଛତରପୁର ଜିଲ୍ଲାରୁ ଏକ ବିରଳ ଚିକିତ୍ସା ଘଟଣା ସାମ୍ନାକୁ ଆସିଛି। ଲବକୁଶ ନଗର କମ୍ୟୁନିଟି ହେଲ୍ଥ ସେଣ୍ଟରରେ ଜଣେ ମହିଳା ୪ଟି ହାତ ଓ ୪ଟି ଗୋଡ଼ ଥିବା ଏକ ନବଜାତ ଶିଶୁକୁ ଜନ୍ମ ଦେଇଛନ୍ତି। ଶିଶୁଟିର ଓଜନ ଜନ୍ମ ସମୟରେ ପ୍ରାୟ ୩ କିଲୋଗ୍ରାମ ଥିବା ଜଣାପଡ଼ିଛି। ନବଜାତର ଅସାଧାରଣ ଶାରୀରିକ ଗଠନ ଦେଖି ଡାକ୍ତର ଓ ହସ୍ପିଟାଲ କର୍ମଚାରୀମାନେ ମଧ୍ୟ ଆଶ୍ଚର୍ଯ୍ୟ ହୋଇଥିଲେ।
ପ୍ରାଥମିକ ଚିକିତ୍ସା ପରୀକ୍ଷା ଅନୁସାରେ, ଗର୍ଭରେ ଯମଜ ଶିଶୁ ବିକଶିତ ହେଉଥିବା ବେଳେ ବିକାଶର ପ୍ରାରମ୍ଭିକ ପର୍ଯ୍ୟାୟରେ ସେମାନେ ସମ୍ପୂର୍ଣ୍ଣ ଭାବେ ଅଲଗା ହୋଇପାରିନଥିବା ଅନୁମାନ କରାଯାଉଛି। ଫଳରେ ଗୋଟିଏ ଶିଶୁର ଶରୀର ସମ୍ପୂର୍ଣ୍ଣ ଭାବେ ବିକଶିତ ନହୋଇ ତାହାର ଅତିରିକ୍ତ ଅଙ୍ଗପ୍ରତ୍ୟଙ୍ଗ ଅନ୍ୟ ଶିଶୁର ଶରୀର ସହିତ ସଂଯୁକ୍ତ ହୋଇଥିବା ଡାକ୍ତରମାନେ କହିଛନ୍ତି। ଏହି ଘଟଣାର ଖବର ପ୍ରଚାର ପାଇବା ପରେ ଶିଶୁକୁ ଦେଖିବା ପାଇଁ ହସ୍ପିଟାଲରେ ଲୋକଙ୍କ ଭିଡ଼ ଜମିଥିବା ସୂଚନା ମିଳିଛି।
ଶିଶୁଟିର ଅବସ୍ଥା ଉପରେ ଡାକ୍ତରୀ ଦଳ ନଜର ରଖିଛନ୍ତି। ଛତରପୁରର ମୁଖ୍ୟ ଚିକିତ୍ସା ଓ ସ୍ୱାସ୍ଥ୍ୟ ଅଧିକାରୀ ଡା. ଆର୍ପି ଗୁପ୍ତାଙ୍କ ସୂଚନା ଅନୁସାରେ, ନବଜାତକୁ ବର୍ତ୍ତମାନ ସ୍ୱତନ୍ତ୍ର ନିରୀକ୍ଷଣରେ ରଖାଯାଇଛି। ଉନ୍ନତ ଚିକିତ୍ସା ଓ ବିଶେଷଜ୍ଞଙ୍କ ପରାମର୍ଶ ପାଇଁ ଶିଶୁଟିକୁ ଏୟାର ଆମ୍ବୁଲାନ୍ସ ଯୋଗେ ଜବଲପୁରକୁ ସ୍ଥାନାନ୍ତର କରିବାର ବ୍ୟବସ୍ଥା କରାଯାଉଛି। ଜିଲ୍ଲା ପ୍ରଶାସନ ଓ ସ୍ୱାସ୍ଥ୍ୟ ବିଭାଗ ମଧ୍ୟ ଘଟଣା ଉପରେ ନଜର ରଖିଛି।
