Hockey World Cup update: ବିଶ୍ୱକପ୍ ବିଫଳତା ପରେ Hockey Indiaକୁ ଶ୍ରୀଜେଶଙ୍କ କଡ଼ା ପ୍ରଶ୍ନ, ‘କିଏ ନେବ ଟିମର ଦାୟିତ୍ୱ?’
ନୂଆଦିଲ୍ଲୀ: ହକି ବିଶ୍ୱକପ୍ରେ ଭାରତୀୟ ଦଳର ନିରାଶାଜନକ ପ୍ରଦର୍ଶନ ପରେ ପୂର୍ବତନ ଗୋଲକିପର୍ ତଥା ଦୁଇଥରର ଅଲିମ୍ପିକ୍ କାଂସ୍ୟ ପଦକ ବିଜେତା ପିଆର୍ ଶ୍ରୀଜେଶ ଭାରତୀୟ ହକିର ପରିଚାଳନା ଓ ଜବାବଦେହିତା ଉପରେ ଗୁରୁତର ପ୍ରଶ୍ନ ଉଠାଇଛନ୍ତି। ପୁରୁଷ ଓ ମହିଳା—ଉଭୟ ଦଳ ସେମିଫାଇନାଲ୍ରେ ପହଞ୍ଚିବାରେ ବିଫଳ ହେବା ପରେ ଶ୍ରୀଜେଶ ସୋସିଆଲ୍ ମିଡିଆରେ ଏକ ଲମ୍ବା ପୋଷ୍ଟ କରି ହକିର ଭବିଷ୍ୟତ ଯୋଜନା ନେଇ ପ୍ରଶ୍ନ କରିଛନ୍ତି।
ପୁରୁଷ ଦଳର ବିଶ୍ୱକପ୍ ଅଭିଯାନ ଆର୍ଜେଣ୍ଟିନା ବିପକ୍ଷରେ ୩-୫ ଗୋଲ୍ର ପରାଜୟ ସହ ଶେଷ ହୋଇଥିଲା। ଏହା ପୂର୍ବରୁ ନେଦରଲ୍ୟାଣ୍ଡ୍ସ ବିପକ୍ଷରେ ଭାରତ ୧-୩ ଗୋଲ୍ରେ ପରାସ୍ତ ହୋଇଥିଲା। ମହିଳା ଦଳ ମଧ୍ୟ ଅଷ୍ଟ୍ରେଲିଆ ବିପକ୍ଷରେ ଗୋଲ୍ଶୂନ୍ୟ ଡ୍ର’ ପରେ ସେମିଫାଇନାଲ୍ରୁ ବଞ୍ଚିତ ହୋଇଥିଲା। ଶ୍ରୀଜେଶ କହିଛନ୍ତି, ବିଶ୍ୱକପ୍ରେ ବିଫଳତାକୁ କେବଳ ‘ଶିଖିବାର ଅଭିଜ୍ଞତା’ କହି ସମସ୍ୟାକୁ ଏଡ଼ାଇ ଦିଆଯାଇପାରିବ ନାହିଁ।
ଶ୍ରୀଜେଶଙ୍କ ମୁଖ୍ୟ ପ୍ରଶ୍ନ ହେଉଛି—ଭାରତ କେବଳ ଭଲ ହକି ଖେଳୁଥିବା ଦଳ ଗଢ଼ୁଛି ନା ବିଶ୍ୱର ଶ୍ରେଷ୍ଠ ଟିମ୍ଗୁଡ଼ିକୁ ହରାଇବାର କ୍ଷମତା ରଖୁଥିବା ଦଳ ଗଢ଼ୁଛି? ଦଳର ପ୍ରଦର୍ଶନ ପାଇଁ କିଏ ଜବାବଦେହ ହେବ ଏବଂ ଏଭଳି ବିଫଳତା ପରେ କିଏ କଠିନ ପ୍ରଶ୍ନ ପଚାରିବ—ସେ ନେଇ ମଧ୍ୟ ସେ ପ୍ରଶ୍ନ ଉଠାଇଛନ୍ତି। ମହିଳା ଦଳର ପ୍ରସ୍ତୁତି ଏବଂ ବିଶ୍ୱକପ୍ ପୂର୍ବରୁ ମୁଖ୍ୟ କୋଚ୍ଙ୍କ ଅନୁପସ୍ଥିତିକୁ ନେଇ ମଧ୍ୟ ସେ ଅସନ୍ତୋଷ ପ୍ରକାଶ କରିଛନ୍ତି। ତେବେ ମାଇଦାନରେ ନିଜ ସାମର୍ଥ୍ୟ ଅନୁଯାୟୀ ଲଢ଼ିଥିବା ଖେଳାଳିମାନଙ୍କୁ ସେ ପ୍ରଶଂସା କରିଛନ୍ତି।
