Nitin Gadkari:”ନୂଆ ପିଢ଼ିକୁ ଦାୟିତ୍ୱ ଦେବାର ସମୟ, ଏବେ ଆଉ ଅଧିକ କାମ କରିପାରୁନାହିଁ”,ଜୋର ଧରିଛି ଚର୍ଚ୍ଚା
ନୂଆଦିଲ୍ଲୀ: କେନ୍ଦ୍ରମନ୍ତ୍ରୀ ନିତିନ ଗଡକରୀଙ୍କ ଏକ ମନ୍ତବ୍ୟକୁ ନେଇ ରାଜନୈତିକ ମହଲରେ ଚର୍ଚ୍ଚା ଜୋର ଧରିଛି। ନାଗପୁରରେ ଆୟୋଜିତ ଏକ କାର୍ଯ୍ୟକ୍ରମରେ ଗଡକରୀ କହିଛନ୍ତି ଯେ, ସେ ପୂର୍ବଭଳି ଆଉ ଅଧିକ କାମ କରିପାରୁନାହାନ୍ତି ଏବଂ ଏବେ ନୂଆ ପିଢ଼ିକୁ ଦାୟିତ୍ୱ ଦେବାର ସମୟ ଆସିଛି। ସାର୍ବଜନୀନ ଜୀବନରେ ପ୍ରାୟ ୩୦ ବର୍ଷ ଧରି ସକ୍ରିୟ ରହିଥିବା ଗଡକରୀ ଏହି ଦୀର୍ଘ ଯାତ୍ରାରେ ଅନେକ ଉତ୍ଥାନ-ପତନ ଦେଖିଥିବା କହିଛନ୍ତି।
ଗଡକରୀଙ୍କ କହିବା ଅନୁସାରେ, ବର୍ତ୍ତମାନ ସାର୍ବଜନୀନ କାର୍ଯ୍ୟରେ ତାଙ୍କର ସମ୍ପୃକ୍ତତା କିଛି ହ୍ରାସ ପାଇଛି। ତେଣୁ ନୂଆ ପିଢ଼ିକୁ ଆଗକୁ ଆସି କାମ କରିବାର ସୁଯୋଗ ମିଳିବା ଆବଶ୍ୟକ ବୋଲି ସେ ମତ ଦେଇଛନ୍ତି। ଏଥିସହ ମହାରାଷ୍ଟ୍ରର କୌଣସି ଆଦିବାସୀ ଗାଁ ବିଦ୍ୟୁତ୍ ସୁବିଧାରୁ ବଞ୍ଚିତ ନ ରହିବା ଏବଂ ସମଗ୍ର ରାଜ୍ୟରେ ବିକାଶକୁ ଦୃଶ୍ୟମାନ କରିବା ତାଙ୍କର ଲକ୍ଷ୍ୟ ବୋଲି ସେ ଉଲ୍ଲେଖ କରିଛନ୍ତି।
ଗଡକରୀଙ୍କ ଏହି ମନ୍ତବ୍ୟ ଏପରି ସମୟରେ ଆସିଛି, ଯେତେବେଳେ ବିଜେପିରେ ସାଂଗଠନିକ ପରିବର୍ତ୍ତନକୁ ନେଇ ଚର୍ଚ୍ଚା ଚାଲିଛି। ଦଳର ନୂଆ ଜାତୀୟ ଟିମ୍ରେ ଅନେକ ନୂଆ ମୁହଁଙ୍କୁ ସାମିଲ କରାଯାଇଥିବାରୁ ଦଳରେ ପିଢ଼ିଗତ ପରିବର୍ତ୍ତନକୁ ନେଇ ଆଲୋଚନା ହେଉଛି। ଏହି ପରିପ୍ରେକ୍ଷିତରେ ଗଡକରୀଙ୍କ ମନ୍ତବ୍ୟକୁ ନେଇ ନୂଆ ରାଜନୈତିକ ଚର୍ଚ୍ଚା ଆରମ୍ଭ ହୋଇଥିଲେ ମଧ୍ୟ, ତାଙ୍କ କଥାକୁ ସିଧାସଳଖ ଭାବେ କେନ୍ଦ୍ରମନ୍ତ୍ରିମଣ୍ଡଳର ପରିବର୍ତ୍ତନ ସହ ଯୋଡ଼ିବା ଠିକ୍ ହେବ ନାହିଁ। ଆଗାମୀ ଦିନରେ ଏନେଇ କୌଣସି ରାଜନୈତିକ ନିଷ୍ପତ୍ତି ହେଉଛି କି ନାହିଁ, ତାହା ଉପରେ ନଜର ରହିବ।
