Kriti Controversy: ରକ୍ଷାବନ୍ଧନ ଆଡ୍କୁ ନେଇ ବିବାଦ, କୃତିଙ୍କ ପକ୍ଷ ନେଲେ ନୁପୁର; କହିଲେ- ‘ଏଥିରେ ଅସୁବିଧା କେଉଁଠି?’
ମୁମ୍ବାଇ: ବଲିଉଡ୍ ଅଭିନେତ୍ରୀ କୃତି ସେନନଙ୍କ ରକ୍ଷାବନ୍ଧନକୁ ନେଇ ତିଆରି ହୋଇଥିବା ଏକ ବିଜ୍ଞାପନ ଏବେ ବିବାଦ ଘେରକୁ ଆସିଛି। ବିଜ୍ଞାପନରେ କୃତିଙ୍କ ପୋଷାକକୁ ନେଇ କିଛି ଲୋକ ଆପତ୍ତି ଉଠାଇବା ପରେ ସୋସିଆଲ ମିଡିଆରେ ତାଙ୍କୁ ଟ୍ରୋଲ୍ କରାଯାଇଥିଲା। ଏହି ପ୍ରସଙ୍ଗରେ କୃତିଙ୍କ ଭଉଣୀ ତଥା ଅଭିନେତ୍ରୀ ନୁପୁର ସେନନ ତାଙ୍କ ସମର୍ଥନରେ ମୁହଁ ଖୋଲିଛନ୍ତି। କୃତି ପିନ୍ଧିଥିବା ପୋଷାକକୁ ନେଇ ଏତେ ବିବାଦ କାହିଁକି ବୋଲି ନୁପୁର ପ୍ରଶ୍ନ କରିଛନ୍ତି।
ବିବାଦ ବଢ଼ିବା ପରେ କୃତି ମଧ୍ୟ ସୋସିଆଲ ମିଡିଆରେ ନିଜ ମତ ରଖିଥିଲେ। ତାଙ୍କ କହିବା ଅନୁଯାୟୀ, କୌଣସି ପର୍ବର ମହତ୍ତ୍ୱ କେବଳ ଲୋକେ ପିନ୍ଧୁଥିବା ପୋଷାକରେ ନିର୍ଭର କରେ ନାହିଁ; ଏହା ପଛରେ ଥିବା ଭାବନା ଓ ପରମ୍ପରା ହିଁ ଅଧିକ ଗୁରୁତ୍ୱପୂର୍ଣ୍ଣ ହୋଇଥାଏ । ଜଣେ ମହିଳାଙ୍କ ପୋଷାକ ତାଙ୍କ ନିଜସ୍ୱ ନିଷ୍ପତ୍ତି ହେବା ଉଚିତ ବୋଲି ସେ ମତ ଦେଇଥିଲେ। ପରେ କଂଗ୍ରେସ ନେତା ରାହୁଲ ଗାନ୍ଧୀ ମଧ୍ୟ କୃତିଙ୍କ ଏହି ମତକୁ ନିଜ ଇନଷ୍ଟାଗ୍ରାମ୍ ଷ୍ଟୋରୀରେ ସେୟାର କରି ସମର୍ଥନ କରିଥିଲେ।
ଅନ୍ୟପଟେ ଅଭିନେତ୍ରୀ ତଥା ରାଜନେତ୍ରୀ କଙ୍ଗନା ରଣାୱତ ରକ୍ଷାବନ୍ଧନ ଭଳି ପାରମ୍ପରିକ ପର୍ବକୁ ନେଇ ପ୍ରସ୍ତୁତ ବିଜ୍ଞାପନରେ କୃତିଙ୍କ ପୋଷାକ ଚୟନ ଉପରେ ପ୍ରଶ୍ନ ଉଠାଇଥିଲେ। କଙ୍ଗନାଙ୍କ ମନ୍ତବ୍ୟ ପରେ ଏହି ପ୍ରସଙ୍ଗକୁ ନେଇ ଅନଲାଇନ୍ରେ ଚର୍ଚ୍ଚା ଆହୁରି ତୀବ୍ର ହୋଇଥିଲା। ଏବେ ନୁପୁରଙ୍କ ସମର୍ଥନ ଏହି ବିବାଦକୁ ପୁଣି ଥରେ ଚର୍ଚ୍ଚାର ପରିସରକୁ ଆଣିଛି। ପୋଷାକ ଚୟନ, ମହିଳାଙ୍କ ବ୍ୟକ୍ତିଗତ ସ୍ୱାଧୀନତା ଏବଂ ପାରମ୍ପରିକ ପର୍ବରେ ଆଧୁନିକତାର ସ୍ଥାନକୁ ନେଇ ଏବେ ଭିନ୍ନ ଭିନ୍ନ ମତ ସାମ୍ନାକୁ ଆସୁଛି।
