JSW EV Project: ଓଡ଼ିଶାରେ ୪୦ ହଜାର କୋଟିର ଇଭି-ବ୍ୟାଟେରୀ ମେଗା ପ୍ରକଳ୍ପରେ ବ୍ରେକ୍, କାହିଁକି ସ୍ଥଗିତ ରଖିଲା JSW?
ଭୁବନେଶ୍ୱର: ଓଡ଼ିଶାରେ ଜେଏସଡବ୍ଲ୍ୟୁ ଗ୍ରୁପ୍ର ପ୍ରସ୍ତାବିତ ୪୦ ହଜାର କୋଟି ଟଙ୍କାର ଇଭି ଓ ବ୍ୟାଟେରୀ ସେଲ୍ ଉତ୍ପାଦନ ପ୍ରକଳ୍ପ ସ୍ଥଗିତ ରଖାଯାଇଛି। କଟକର ନରାଜରେ ଏହି ପ୍ରକଳ୍ପ ସ୍ଥାପନ ହେବାର ଯୋଜନା ଥିଲା। କମ୍ପାନୀ ନିର୍ଦ୍ଦେଶକ ପାର୍ଥ ଜିନ୍ଦଲଙ୍କ ସୂଚନା ଅନୁସାରେ, ଉପଯୁକ୍ତ ବୈଷୟିକ ସହଯୋଗୀ ନମିଳିବା ଏବଂ ଆବଶ୍ୟକୀୟ ବ୍ୟାଟେରୀ ପ୍ରଯୁକ୍ତି ଉପଲବ୍ଧ ନହେବା କାରଣରୁ ପ୍ରକଳ୍ପକୁ ଏବେ ପାଇଁ ସ୍ଥଗିତ ରଖାଯାଇଛି।
ଇଭି ବ୍ୟାଟେରୀ ଉତ୍ପାଦନ ପାଇଁ ଆବଶ୍ୟକ ଲିଥିୟମ୍ ଆଇରନ୍ ଫସଫେଟ୍ ବା LFP ପ୍ରଯୁକ୍ତି ମୁଖ୍ୟତଃ ଚୀନ୍ରେ କେନ୍ଦ୍ରୀଭୂତ ରହିଛି। ଚୀନ୍ ସରକାର ଏହି ପ୍ରଯୁକ୍ତି ହସ୍ତାନ୍ତର ଉପରେ କଟକଣା ଲଗାଇଥିବାରୁ JSW ପାଇଁ ଉପଯୁକ୍ତ ବୈଷୟିକ ସହଯୋଗୀ ଖୋଜିବା ଏକ ବଡ଼ ଚ୍ୟାଲେଞ୍ଜ ହୋଇଛି। ବିକଳ୍ପ ପ୍ରଯୁକ୍ତି କିମ୍ବା ଉପଯୁକ୍ତ ସହଯୋଗୀ ନମିଳିବା ପର୍ଯ୍ୟନ୍ତ ପ୍ରକଳ୍ପର ମୂଳ ବ୍ୟାଟେରୀ ସେଲ୍ ଉତ୍ପାଦନ କାର୍ଯ୍ୟ ଆଗକୁ ବଢ଼ିପାରିବ ନାହିଁ।
ଫେବୃଆରୀ ୨୦୨୪ରେ JSW ଗ୍ରୁପ୍ ଓଡ଼ିଶା ସରକାରଙ୍କ ସହ କଟକ ଓ ପାରାଦୀପରେ ସମନ୍ୱିତ ଇଭି ଓ ୫୦ GWh କ୍ଷମତାର ବ୍ୟାଟେରୀ ପ୍ଲାଣ୍ଟ ସ୍ଥାପନ ପାଇଁ ଏମଓୟୁ ସ୍ୱାକ୍ଷର କରିଥିଲା। ତେବେ କମ୍ପାନୀ ନିଜର ବ୍ୟାଟେରୀ ଏନର୍ଜି ଷ୍ଟୋରେଜ୍ ଏବଂ JSW MG ମୋଟର ଇଣ୍ଡିଆ ପାଇଁ ‘ସେଲ୍-ଟୁ-ପ୍ୟାକ୍’ ଅସେମ୍ବଲି ଲାଇନ୍ କାର୍ଯ୍ୟକ୍ଷମ କରିସାରିଛି। ମୂଳ ବ୍ୟାଟେରୀ ସେଲ୍ ଉତ୍ପାଦନ ପାଇଁ ଏବେ ମଧ୍ୟ ଉପଯୁକ୍ତ ବୈଷୟିକ ସହଯୋଗୀଙ୍କ ସନ୍ଧାନ ଜାରି ରହିଛି।
