୮ ବର୍ଷ ଜେଲ୍ରେ ରହିବା ପରେ ଜାମିନ! ଆତଙ୍କୀ ଫଣ୍ଡିଂ ମାମଲାରେ ସୁପ୍ରିମକୋର୍ଟଙ୍କ ବଡ଼ ନିଷ୍ପତ୍ତି
ନୂଆଦିଲ୍ଲୀ: ଆତଙ୍କବାଦୀ ପାଣ୍ଠି ଯୋଗାଣ ମାମଲାରେ ଅଭିଯୁକ୍ତ ୟୁଏଇସ୍ଥିତ ବ୍ୟବସାୟୀ ନଭଲ କିଶୋର କପୁରଙ୍କୁ ସୁପ୍ରିମକୋର୍ଟ ଜାମିନ ପ୍ରଦାନ କରିଛନ୍ତି। ପାକିସ୍ତାନସ୍ଥିତ ଲସ୍କର-ଏ-ତୈବା ମୁଖ୍ୟ ହାଫିଜ୍ ମହମ୍ମଦ ସୟିଦ ଓ କାଶ୍ମୀରର କିଛି ବିଚ୍ଛିନ୍ନତାବାଦୀ ନେତାଙ୍କ ସହ ଜଡ଼ିତ ଆତଙ୍କୀ ଫଣ୍ଡିଂ ମାମଲାରେ କପୁରଙ୍କ ନାମ ରହିଥିଲା। କୋର୍ଟ କହିଛନ୍ତି ଯେ, କପୁରଙ୍କ ବୟସ ୭୨ ବର୍ଷରୁ ଅଧିକ ଏବଂ ସେ ଆଠ ବର୍ଷରୁ ଅଧିକ ସମୟ ଧରି ହାଜତରେ ରହିଛନ୍ତି। ଏହାସହ ଅନେକ ସାକ୍ଷୀ ଥିବାରୁ ନିକଟ ଭବିଷ୍ୟତରେ ମାମଲାର ବିଚାର ଶେଷ ହେବାର ସମ୍ଭାବନା କମ୍ ବୋଲି ସୁପ୍ରିମକୋର୍ଟ ମତ ଦେଇଛନ୍ତି।
ଜଷ୍ଟିସ୍ ବିକ୍ରମ ନାଥ ଓ ଜଷ୍ଟିସ୍ ସନ୍ଦୀପ ମେହେଟ୍ଟାଙ୍କ ଖଣ୍ଡପୀଠ କପୁରଙ୍କ ଦୀର୍ଘକାଳୀନ ହାଜତବାସକୁ ବିଚାରକୁ ନେଇ ଏହି ଜାମିନ ଦେଇଛନ୍ତି। ନଭଲ କିଶୋର କପୁରଙ୍କୁ ୨୬ ଜୁଲାଇ ୨୦୧୮ରେ ଗିରଫ କରାଯାଇଥିଲା। ୟୁଏପିଏ ଅଧୀନରେ ଜାମିନ ପାଇବା ପାଇଁ କଠୋର ନିୟମ ଥିଲେ ମଧ୍ୟ ଦୀର୍ଘ ସମୟର ହାଜତବାସ ଏବଂ ମାମଲା ଶୀଘ୍ର ଶେଷ ହେବାର ସମ୍ଭାବନା ନଥିବାକୁ କୋର୍ଟ ଗୁରୁତ୍ୱ ଦେଇଛନ୍ତି। ତେବେ କପୁର ଯଦି ମାମଲାର ବିଚାର ପ୍ରକ୍ରିୟାକୁ ଜାଣିଶୁଣି ବିଳମ୍ବ କରିବାକୁ ଚେଷ୍ଟା କରନ୍ତି, ତେବେ ତାଙ୍କ ଜାମିନ ରଦ୍ଦ କରିବା ପାଇଁ ସରକାରୀ ପକ୍ଷ ଓ ଟ୍ରାଏଲ୍ କୋର୍ଟଙ୍କ ପାଇଁ ବିକଳ୍ପ ଖୋଲା ରହିବ ବୋଲି ଆଦେଶରେ କୁହାଯାଇଛି।
୨୦୧୯ ଜାନୁଆରୀରେ ଭାରତୀୟ ଦଣ୍ଡ ସଂହିତାର ଷଡ଼ଯନ୍ତ୍ର ସମ୍ବନ୍ଧୀୟ ଧାରା ଏବଂ ୟୁଏପିଏ ଅଧୀନରେ କପୁରଙ୍କ ବିରୋଧରେ ଚାର୍ଜସିଟ୍ ଦାଖଲ ହୋଇଥିଲା। ଜମ୍ମୁ-କାଶ୍ମୀରରେ ବିଚ୍ଛିନ୍ନତାବାଦୀ ଓ ଆତଙ୍କବାଦୀ କାର୍ଯ୍ୟକଳାପ ପାଇଁ ପାଣ୍ଠି ସଂଗ୍ରହ ଓ ପଠାଇବାର ଏକ ବଡ଼ ଷଡ଼ଯନ୍ତ୍ରରେ କପୁର ସାମିଲ ଥିବା ଏନଆଇଏ ଅଭିଯୋଗ କରିଛି। ତଦନ୍ତକାରୀ ସଂସ୍ଥାର ଦାବି ଅନୁଯାୟୀ, ହାୱାଲା ନେଟୱାର୍କ ଓ ଅନ୍ୟ ଅବୈଧ ମାଧ୍ୟମରେ ପାଣ୍ଠି ଭାରତକୁ ଅଣାଯାଇ ହିଂସାତ୍ମକ ପ୍ରତିବାଦ, ପଥର ଫିଙ୍ଗା, ପୋଡ଼ାଜଳା ଓ ସାର୍ବଜନୀନ ସମ୍ପତ୍ତି ନଷ୍ଟ ଭଳି କାର୍ଯ୍ୟକଳାପରେ ବ୍ୟବହାର କରାଯାଉଥିଲା। କପୁର ଏହି ପାଣ୍ଠିର ଗତିବିଧିକୁ ସହଜ କରିବାରେ ଭୂମିକା ନେଇଥିବା ମଧ୍ୟ ଏନଆଇଏ ଅଭିଯୋଗ କରିଛି।
