Dubai Passenger Smuggling Trick Exposed: ମୁହଁ ଭିତରେ ଲୁଚାଇଥିଲେ ୮୨ ଗ୍ରାମ ସୁନା, CISF ଯାଞ୍ଚରେ ଧରାପଡ଼ିଲା ସତ
ବେଙ୍ଗାଲୁରୁ: ବେଙ୍ଗାଲୁରୁର କେମ୍ପେଗୌଡା ଅନ୍ତର୍ଜାତୀୟ ବିମାନବନ୍ଦରରେ ଚୋରା ସୁନା ଚାଲାଣର ଏକ ଅଭିନବ କୌଶଳ ସାମ୍ନାକୁ ଆସିଛି। ଦୁବାଇରୁ ବେଙ୍ଗାଲୁରୁ ଆସିଥିବା ଜଣେ ଯାତ୍ରୀ ନିଜ ମୁହଁ ଭିତରେ ଦୁଇଟି କ୍ୟାପସୁଲରେ ପ୍ରାୟ ୮୨ ଗ୍ରାମ ହଳଦିଆ ଧାତୁ ଲୁଚାଇ ରଖିଥିବା ଧରାପଡ଼ିଛି। କେନ୍ଦ୍ରୀୟ ଶିଳ୍ପ ସୁରକ୍ଷା ବଳ (ସିଆଇଏସଏଫ୍) କର୍ମଚାରୀଙ୍କ ଯାଞ୍ଚ ସମୟରେ ଏହି ଘଟଣା ପଦାକୁ ଆସିଛି।
ଅଭିଯୁକ୍ତ ଯାତ୍ରୀଙ୍କ ନାମ ମହମ୍ମଦ ସିରାଜ ବୋଲି ଜଣାପଡ଼ିଛି। ସେ ଦୁବାଇରୁ ଇଣ୍ଡିଗୋ ବିମାନରେ ବେଙ୍ଗାଲୁରୁରେ ପହଞ୍ଚିଥିଲେ ଏବଂ ପରବର୍ତ୍ତୀ ସମୟରେ ଅନ୍ୟ ଏକ ବିମାନରେ ଗାଜିଆବାଦ ଯିବାର ଯୋଜନା ଥିଲା। ସୁରକ୍ଷା ଯାଞ୍ଚ ସମୟରେ ସେ ଠିକ୍ ଭାବେ ପ୍ରତିକ୍ରିୟା ନ ଦେବାରୁ ସିଆଇଏସଏଫ୍ କର୍ମଚାରୀଙ୍କ ସନ୍ଦେହ ହୋଇଥିଲା। ପରେ ଅଧିକ ତଲାସି କରାଯିବା ପରେ ତାଙ୍କ ମୁହଁ ଭିତରୁ ଦୁଇଟି ହଳଦିଆ ଧାତୁର କ୍ୟାପସୁଲ ଉଦ୍ଧାର କରାଯାଇଥିଲା।
ଉଦ୍ଧାର ହୋଇଥିବା ଦୁଇଟି କ୍ୟାପସୁଲର ମୋଟ ଓଜନ ପ୍ରାୟ ୮୨ ଗ୍ରାମ ବୋଲି ସୂଚନା ମିଳିଛି। ତେବେ ଉଦ୍ଧାର ହୋଇଥିବା ହଳଦିଆ ଧାତୁ ସୁନା କି ନୁହେଁ ଏବଂ ଏହାର ମୂଲ୍ୟ କେତେ, ତାହା ଏପର୍ଯ୍ୟନ୍ତ ସ୍ପଷ୍ଟ ହୋଇନାହିଁ। ସିଆଇଏସଏଫ୍ ଅଭିଯୁକ୍ତଙ୍କୁ ପରବର୍ତ୍ତୀ ଆଇନଗତ କାର୍ଯ୍ୟାନୁଷ୍ଠାନ ପାଇଁ ବିମାନବନ୍ଦର ପୋଲିସଙ୍କ ଜିମାରେ ଦେଇଥିବାବେଳେ ଘଟଣାର ତଦନ୍ତ ଜାରି ରହିଛି।
