Festive Sale 2026: ମାତ୍ର ୨ ଦିନରେ ୨୪ ହଜାର କୋଟିରୁ ଅଧିକ ବ୍ୟବସାୟ, ମୋବାଇଲ୍ କିଣିବାରେ ଗ୍ରାହକଙ୍କ ଅଧିକ ଆଗ୍ରହ
ନୂଆଦିଲ୍ଲୀ: ଭାରତରେ ଫେଷ୍ଟିଭ୍ ସେଲ୍ ଆରମ୍ଭ ହେବା ପରେ ଅନଲାଇନ୍ ସପିଂର ଚାହିଦା ବଢ଼ିଛି। ରେଡ୍ସିର୍ ଷ୍ଟ୍ରାଟେଜି କନ୍ସଲ୍ଟାଣ୍ଟସ୍ର ଆକଳନ ଅନୁସାରେ, ବିକ୍ରିର ପ୍ରଥମ ଦୁଇ ଦିନରେ ଇ-କମର୍ସ କମ୍ପାନୀଗୁଡ଼ିକ ୨୪ ହଜାର କୋଟି ଟଙ୍କାରୁ ଅଧିକ ବ୍ୟବସାୟ କରିଛନ୍ତି। ଆମାଜନ୍, ଫ୍ଲିପ୍କାର୍ଟ, ମିଶୋ ଓ ଆଜିଓ ଭଳି ପ୍ଲାଟଫର୍ମରେ ମୋଟ ୮ରୁ ୯ କୋଟି ଅର୍ଡର ଦିଆଯାଇଥିବା ଆକଳନ କରାଯାଇଛି। ଏହି ସମୟ ମଧ୍ୟରେ ପ୍ରାୟ ୬ରୁ ୬.୫ କୋଟି ଗ୍ରାହକ କିଣାକିଣି କରିଥିବା କୁହାଯାଇଛି।
ବିକ୍ରିରେ ସବୁଠାରୁ ଅଧିକ ଭାଗ ମୋବାଇଲ୍ ଫୋନ୍ର ରହିଛି। ମୋଟ ବ୍ୟବସାୟର ପ୍ରାୟ ୩୮ରୁ ୪୦ ପ୍ରତିଶତ ଅର୍ଥାତ୍ ୯,୧୦୦ରୁ ୯,୬୦୦ କୋଟି ଟଙ୍କାର ମୋବାଇଲ୍ ବିକ୍ରି ହୋଇଥିବା ଆକଳନ ରହିଛି। ସେହିପରି କନ୍ଜ୍ୟୁମର ଇଲେକ୍ଟ୍ରୋନିକ୍ସର ଭାଗ ୨୫ରୁ ୨୭ ପ୍ରତିଶତ ଏବଂ ଫ୍ୟାଶନ୍ ସାମଗ୍ରୀର ଭାଗ ୧୫ରୁ ୧୮ ପ୍ରତିଶତ ରହିଛି। ଛୋଟ ସହର ଓ ଟିୟର୍-୨ ସହରଗୁଡ଼ିକରେ କମ୍ ଦାମ୍ର ପୋଷାକ ପ୍ରତି ଗ୍ରାହକଙ୍କ ଆଗ୍ରହ ବଢ଼ିଥିବା ମଧ୍ୟ ରିପୋର୍ଟରେ ଉଲ୍ଲେଖ ରହିଛି।
ରେଡ୍ସିର୍ର ଆକଳନ ଅନୁସାରେ, ସେଲ୍ର ପ୍ରଥମ ଦୁଇ ଦିନରେ ଇ-କମର୍ସ କମ୍ପାନୀଗୁଡ଼ିକର ମୋଟ ବିକ୍ରି ମୂଲ୍ୟ ସାଧାରଣ ଦିନ ତୁଳନାରେ ପ୍ରାୟ ୬ ଗୁଣ ବଢ଼ିଥିଲା। ଏହି କିଣାକିଣିରେ ଜେନ୍-ଜି ଗ୍ରାହକଙ୍କ ଭାଗ ପ୍ରାୟ ଏକ-ତୃତୀୟାଂଶ ଥିବା ଆକଳନ କରାଯାଇଛି। ଏହି ତଥ୍ୟ ଦର୍ଶାଉଛି ଯେ ଉତ୍ସବ ଋତୁରେ ଅନଲାଇନ୍ ରିହାତି ଓ ଅଫର୍ ଗ୍ରାହକଙ୍କ କିଣାକିଣିକୁ ଗତି ଦେଉଛି।
