Ranvir Shorey Death Threats: CJP ବିକ୍ଷୋଭକୁ ସମାଲୋଚନା ପରେ ଅଭିନେତାଙ୍କୁ ଧମକ, ପୋଲିସର ଦ୍ୱାରସ୍ଥ ହେଲେ ରଣବୀର
ମୁମ୍ବାଇ: ଅଭିନେତା ରଣବୀର ଶୋରେଙ୍କୁ ଇମେଲ୍ ମାଧ୍ୟମରେ ହତ୍ୟା ଧମକ ମିଳିଥିବା ସେ ଅଭିଯୋଗ କରିଛନ୍ତି। ଦିଲ୍ଲୀରେ କକ୍ରୋଚ୍ ଜନତା ପାର୍ଟି (CJP) ପକ୍ଷରୁ ହୋଇଥିବା ରାସ୍ତା ପ୍ରତିବାଦକୁ ସମାଲୋଚନା କରିବା ପରେ ଏହି ଧମକ ମିଳିଥିବା ରଣବୀର କହିଛନ୍ତି। ସେ ଧମକପୂର୍ଣ୍ଣ ଇମେଲ୍ର ସ୍କ୍ରିନ୍ସଟ୍ ସୋସିଆଲ ମିଡିଆ ପ୍ଲାଟଫର୍ମ Xରେ ସେୟାର କରିବା ସହ ସାଇବର ପୋଲିସ ଓ ମୁମ୍ବାଇ ପୋଲିସର ସହାୟତା ଲୋଡ଼ିଛନ୍ତି। ମୁମ୍ବାଇ ପୋଲିସ ତାଙ୍କୁ ଡାଇରେକ୍ଟ ମେସେଜ୍ ମାଧ୍ୟମରେ ଯୋଗାଯୋଗ ବିବରଣୀ ଦେବାକୁ କହିଥିବା ସେ ଜଣାଇଛନ୍ତି।
CJPର ପ୍ରତିବାଦକୁ ସମାଲୋଚନା କରି ରଣବୀର କହିଥିଲେ ଯେ ରାଜନୈତିକ ପ୍ରସଙ୍ଗରେ ଆପତ୍ତି ଥିଲେ ସଂସଦ, ନିର୍ବାଚନ ଓ ନ୍ୟାୟାଳୟ ଭଳି ଗଣତାନ୍ତ୍ରିକ ମଞ୍ଚରେ ନିଜ ମତ ରଖିବା ଉଚିତ। ରାସ୍ତାରେ ପ୍ରତିବାଦ କରିବାକୁ ସେ “ଗଣତନ୍ତ୍ରର ହତ୍ୟା” ବୋଲି ବର୍ଣ୍ଣନା କରିଥିଲେ। ଅକ୍ଟୋବର ୧୦ରେ ଦିଲ୍ଲୀର ଜନ୍ତର ମନ୍ତରରେ CJP ପକ୍ଷରୁ ଏହି ପ୍ରତିବାଦ ହୋଇଥିଲା। ଭୋଟର ତାଲିକାର ସ୍ପେଶାଲ୍ ଇଣ୍ଟେନ୍ସିଭ୍ ରିଭିଜନ୍ (SIR) ପ୍ରକ୍ରିୟାରେ ଅନିୟମିତତା ହୋଇଥିବା ଅଭିଯୋଗ କରି ଦଳ ମୁଖ୍ୟ ନିର୍ବାଚନ କମିଶନର ଜ୍ଞାନେଶ କୁମାରଙ୍କ ଇସ୍ତଫା ଦାବି କରିଥିଲା।
ଧମକ ମିଳିବା ପରେ ରଣବୀର ପୋଲିସର ସହାୟତା ଲୋଡ଼ିଥିବା ବେଳେ ଘଟଣାରେ କିଏ ସମ୍ପୃକ୍ତ, ତାହା ସ୍ପଷ୍ଟ ହୋଇନାହିଁ। ଧମକପୂର୍ଣ୍ଣ ଇମେଲ୍ଗୁଡ଼ିକର ଉତ୍ସ ଓ ପଠାଇଥିବା ବ୍ୟକ୍ତିଙ୍କ ପରିଚୟ ସମ୍ପର୍କରେ ତଦନ୍ତର ଫଳାଫଳ ମଧ୍ୟ ସାମ୍ନାକୁ ଆସିନାହିଁ। ରାଜନୈତିକ ପ୍ରତିବାଦକୁ ନେଇ ମତଭେଦ ଥିଲେ ମଧ୍ୟ ଧମକ ଦେବା ଘଟଣା ଏବେ ଚର୍ଚ୍ଚାର ବିଷୟ ପାଲଟିଛି।
