Jhansi Hotel Death: ହୋଟେଲ୍ କବାଟ ନିକଟରେ ଟଳିପଡ଼ିଲେ ନବବିବାହିତା, ମୃତ୍ୟୁକୁ ନେଇ ସ୍ୱାମୀଙ୍କ ବିରୋଧରେ ପରିବାରର ଅଭିଯୋଗ
ଉତ୍ତରପ୍ରଦେଶ: ଉତ୍ତରପ୍ରଦେଶର ଝାନ୍ସୀରେ ଏକ ହୋଟେଲ୍ରେ ରହୁଥିବା ୨୮ ବର୍ଷୀୟ ନବବିବାହିତା ମୁସ୍କାନ୍ଙ୍କ ଅଚାନକ ମୃତ୍ୟୁକୁ ନେଇ ଚର୍ଚ୍ଚା ଜୋର ଧରିଛି। ସୋମବାର ସକାଳ ପ୍ରାୟ ୧୦ଟା ୫୦ ମିନିଟ୍ରେ ରିଷଭ ହୋଟେଲ୍ରେ ଏହି ଘଟଣା ଘଟିଥିବା ବେଳେ ସିସିଟିଭି ଫୁଟେଜ୍ରେ ମୁସ୍କାନ୍ ରୁମ୍ କବାଟ ପାଖରେ ହଠାତ୍ ତଳେ ପଡ଼ିଯାଉଥିବା ଦେଖାଯାଇଛି। ରିପୋର୍ଟ ଅନୁସାରେ, ତାଙ୍କ ସ୍ୱାମୀ ନିଲେଶ ତାଙ୍କୁ ଉଠାଇ ରୁମ୍ ଭିତରକୁ ନେଇଥିଲେ। ପରେ ମୁସ୍କାନ୍ଙ୍କୁ ହସ୍ପିଟାଲ୍ ନିଆଯାଇଥିଲା, ଯେଉଁଠାରେ ତାଙ୍କୁ ମୃତ ଘୋଷଣା କରାଯାଇଥିଲା। ବିବାହର ପ୍ରାୟ ଚାରି ମାସ ପରେ ଘଟିଥିବା ଏହି ଘଟଣାରେ ତାଙ୍କ ପରିବାର ହତ୍ୟା ଅଭିଯୋଗ ଆଣିଛନ୍ତି।
ମୁସ୍କାନ୍ଙ୍କ ବାପା ରାମଜୀ ଲାଲ୍ ଅହିରୱାରଙ୍କ ଅଭିଯୋଗ ଅନୁସାରେ, ନିଲେଶ ଅକ୍ଟୋବର ୨୩ ରାତିରେ ଝାନ୍ସୀ ଆସିଥିଲେ ଏବଂ ପରଦିନ ମୁସ୍କାନ୍ଙ୍କୁ ନିଜ ମାଉସୀଙ୍କ ଘରକୁ ନେବେ ବୋଲି କହି ସାଙ୍ଗରେ ନେଇଥିଲେ। କିନ୍ତୁ ସେ ତାଙ୍କୁ ହୋଟେଲ୍କୁ ନେଇଥିବା ପରିବାର ଅଭିଯୋଗ କରିଛି। ହୋଟେଲ୍ରେ ଅକ୍ଟୋବର ୨୩ରୁ ୨୪ ପର୍ଯ୍ୟନ୍ତ ବୁକିଂ ହୋଇଥିବା କଥା ମଧ୍ୟ ପରିବାର କହିଛି। ଏହାସହ ନିଲେଶଙ୍କ ପୂର୍ବରୁ ବିବାହ ହୋଇଥିବା ଏବଂ ସେ ଏହି କଥା ମୁସ୍କାନ୍ଙ୍କ ପରିବାରକୁ ଜଣାଇନଥିବା ଅଭିଯୋଗ ହୋଇଛି। ମୁସ୍କାନ୍ଙ୍କ ପୈତୃକ ଘର ଝାନ୍ସୀରେ ଥିବା ବେଳେ ତାଙ୍କ ଶ୍ୱଶୁର ଘର ମଧ୍ୟପ୍ରଦେଶର ବିଦିଶାରେ। ଏହି ଅଭିଯୋଗ ପରେ ପୋଲିସ ନିଲେଶଙ୍କୁ ଅଟକ ରଖି ପଚରାଉଚରା କରୁଛି।
ସିଟି ଏସ୍ପି ପ୍ରୀତି ସିଂହଙ୍କ କହିବା ଅନୁସାରେ, ଜଣେ ମହିଳାଙ୍କୁ ଜିଲ୍ଲା ହସ୍ପିଟାଲ୍କୁ ମୃତ ଅବସ୍ଥାରେ ଅଣାଯାଇଥିବା ସୂଚନା ପାଇ ପୋଲିସ ତଦନ୍ତ ଆରମ୍ଭ କରିଥିଲା। ନିଲେଶ ପୋଲିସକୁ କହିଛନ୍ତି ଯେ, ସେ ଓ ମୁସ୍କାନ୍ ପୂର୍ବ ରାତିରେ ହୋଟେଲ୍ରେ ରହିଥିଲେ ଏବଂ ସକାଳେ ବାହାରିବା ସମୟରେ ସେ ହଠାତ୍ ପଡ଼ିଯାଇଥିଲେ। ହୋଟେଲ୍ କର୍ମଚାରୀଙ୍କ ସହାୟତାରେ ତାଙ୍କୁ ପ୍ରଥମେ ଅଟୋରିକ୍ସାରେ ହସ୍ପିଟାଲ୍ ନିଆଯାଇଥିଲା। ମୁସ୍କାନ୍ଙ୍କ ମୃତଦେହକୁ ପୋଷ୍ଟମର୍ଟମ୍ ପାଇଁ ପଠାଯାଇଛି। ପରିବାରର ଅଭିଯୋଗ ଓ ପୋଷ୍ଟମର୍ଟମ୍ ରିପୋର୍ଟ ଆଧାରରେ ପରବର୍ତ୍ତୀ ପଦକ୍ଷେପ ନିଆଯିବ ବୋଲି ପୋଲିସ କହିଛି।
