Omprakash Bishnoi Election: ସୋସିଆଲ ମିଡିଆରେ ୨୧ ଲକ୍ଷ ଫଲୋଅର୍ସ, ଭୋଟ୍ ବାକ୍ସରେ ମିଳିଲା ମାତ୍ର ୩୩ ଭୋଟ୍!
ରାଜସ୍ଥାନ: ସୋସିଆଲ ମିଡିଆରେ ୨୧ ଲକ୍ଷରୁ ଅଧିକ ଫଲୋଅର୍ସ ଥିବା ଓମପ୍ରକାଶ ବିଷ୍ଣୋଇ ରାଜସ୍ଥାନର ଯୋଧପୁର ଜିଲ୍ଲାରେ ସରପଞ୍ଚ ନିର୍ବାଚନ ଲଢ଼ିଥିଲେ। ଇନ୍ଷ୍ଟାଗ୍ରାମରେ ୧୪ ଲକ୍ଷ, ଫେସବୁକ୍ରେ ୨.୩୨ ଲକ୍ଷ ଏବଂ ୟୁଟ୍ୟୁବ୍ରେ ୫ ଲକ୍ଷ ଫଲୋଅର୍ସ ଥିବାରୁ ତାଙ୍କୁ ଭଲ ସମର୍ଥନ ମିଳିବ ବୋଲି ଆଶା ଥିଲା। କିନ୍ତୁ ନିର୍ବାଚନ ଫଳାଫଳ ତାଙ୍କ ଆଶାଠାରୁ ଭିନ୍ନ ରହିଥିଲା। ତାଙ୍କୁ ମାତ୍ର ୩୩ଟି ଭୋଟ୍ ମିଳିଥିବା ବେଳେ ସେଥିରୁ ୧୧ଟି ନିଜ ପରିବାରର ସଦସ୍ୟଙ୍କ ଭୋଟ୍ ବୋଲି ଓମପ୍ରକାଶ କହିଛନ୍ତି।
ଓମପ୍ରକାଶଙ୍କ କହିବା ଅନୁସାରେ, ନିର୍ବାଚନରେ ୧୦ଟି ଭୋଟ୍ ନୋଟା (NOTA)କୁ ଯାଇଥିଲା। ଅନ୍ୟପଟେ, ତାଙ୍କ ବିପକ୍ଷରେ ନିର୍ବାଚନ ଲଢ଼ୁଥିବା ଜଣେ ଶିକ୍ଷକ ୫୨୭ଟି ଭୋଟ୍ ପାଇଥିଲେ। ସୋସିଆଲ ମିଡିଆରେ ବିପୁଳ ଅନୁସରଣକାରୀ ଥିବା ସତ୍ତ୍ୱେ ନିର୍ବାଚନରେ ଏତେ କମ୍ ଭୋଟ୍ ମିଳିବା ଘଟଣା ଏବେ ଚର୍ଚ୍ଚାରେ ରହିଛି। ଏହା ଅନଲାଇନ୍ ଲୋକପ୍ରିୟତା ଓ ଭୋଟରଙ୍କ ପ୍ରକୃତ ସମର୍ଥନ ମଧ୍ୟରେ ଥିବା ପାର୍ଥକ୍ୟକୁ ସାମ୍ନାକୁ ଆଣିଛି।
ନିର୍ବାଚନରେ ପରାଜୟ ପରେ ଓମପ୍ରକାଶ ଅନଲାଇନ୍ ଫଲୋଅର୍ସଙ୍କ ସଂଖ୍ୟା ଓ ଜମିନସ୍ତରରେ ମିଳୁଥିବା ସମର୍ଥନ ଏକା କଥା ନୁହେଁ ବୋଲି ସ୍ୱୀକାର କରିଛନ୍ତି। ଭୋଟରଙ୍କ ସହ ସିଧାସଳଖ ଯୋଗାଯୋଗ ଏବଂ ସେମାନଙ୍କ ସମସ୍ୟା ବୁଝିବା କେତେ ଜରୁରୀ, ଏହି ଅନୁଭବରୁ ସେ ଶିଖିଥିବା କହିଛନ୍ତି। ପରାଜୟ ସତ୍ତ୍ୱେ ନିଜ ଗାଁ ପାଇଁ କାମ ଜାରି ରଖିବେ ବୋଲି ମଧ୍ୟ ସେ କହିଛନ୍ତି।
