India Invites Pakistani Minister: ଦିଲ୍ଲୀ ଆସିବେ କି ପାକିସ୍ତାନୀ ମନ୍ତ୍ରୀ? ଭାରତର ନିମନ୍ତ୍ରଣକୁ ନେଇ ଚର୍ଚ୍ଚା
ନୂଆଦିଲ୍ଲୀ: ଅପରେସନ୍ ସିନ୍ଦୂର ପରେ ଭାରତ ପକ୍ଷରୁ ପ୍ରଥମ ଥର ପାଇଁ ଜଣେ ବରିଷ୍ଠ ପାକିସ୍ତାନୀ ମନ୍ତ୍ରୀଙ୍କୁ ଭାରତ ଆସିବାକୁ ନିମନ୍ତ୍ରଣ ଦିଆଯାଇଛି। ନୂଆଦିଲ୍ଲୀରେ ନଭେମ୍ବର ୨୦ରୁ ୨୨ ଯାଏଁ ହେବାକୁ ଥିବା ସାଂଘାଇ କୋଅପରେସନ୍ ଅର୍ଗାନାଇଜେସନ୍ (SCO)ର ପ୍ରଥମ ସିଭିଲାଇଜେସନ୍ ଡାଏଲଗ୍ ଫୋରମ୍ରେ ଯୋଗଦେବା ପାଇଁ ପାକିସ୍ତାନର ଜାତୀୟ ଐତିହ୍ୟ ଓ ସଂସ୍କୃତି ମନ୍ତ୍ରୀ ଔରଙ୍ଗଜେବ ଖାନ୍ ଖିଚିଙ୍କୁ ନିମନ୍ତ୍ରଣ କରାଯାଇଛି। ଭାରତ ଏହି ଫୋରମ୍କୁ SCOର ସମସ୍ତ ୧୦ଟି ସଦସ୍ୟ ଦେଶକୁ ଆମନ୍ତ୍ରଣ କରିଛି।
ପହଲଗାମ୍ ଆତଙ୍କବାଦୀ ଆକ୍ରମଣ ପରେ ୨୦୨୫ ମେ’ ମାସରେ ଭାରତ ଅପରେସନ୍ ସିନ୍ଦୂର ଆରମ୍ଭ କରିଥିଲା। ଏହା ପରଠାରୁ ଦୁଇ ଦେଶର ସମ୍ପର୍କ ତିକ୍ତ ରହିଛି। ଏଭଳି ସ୍ଥିତିରେ ପାକିସ୍ତାନୀ ମନ୍ତ୍ରୀଙ୍କୁ ନିମନ୍ତ୍ରଣ କୂଟନୈତିକ ଦୃଷ୍ଟିରୁ ଗୁରୁତ୍ୱ ବହନ କରୁଛି। ତେବେ ପାକିସ୍ତାନ ଏହି ନିମନ୍ତ୍ରଣ ଗ୍ରହଣ କରିବ କି ନାହିଁ, ତାହା ଏଯାଏଁ ସ୍ପଷ୍ଟ ହୋଇନାହିଁ। ଖିଚି ଯୋଗଦେଲେ, ୨୦୨୩ ମେ’ରେ ତତ୍କାଳୀନ ପାକିସ୍ତାନୀ ବୈଦେଶିକ ମନ୍ତ୍ରୀ ବିଲାୱଲ ଭୁଟ୍ଟୋ ଜର୍ଦ୍ଦାରୀଙ୍କ ଗୋଆ ଗସ୍ତ ପରେ ଏହା ଜଣେ ପାକିସ୍ତାନୀ ମନ୍ତ୍ରୀଙ୍କ ପ୍ରଥମ ଭାରତ ଗସ୍ତ ହେବ।
ଅକ୍ଟୋବର ୨୦ ତାରିଖରେ ତାଜିକିସ୍ତାନର ଦୁଶାନବେଠାରେ ଅନୁଷ୍ଠିତ SCOର ସରକାର ମୁଖ୍ୟମାନଙ୍କ ବୈଠକରେ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ ଏହି ଫୋରମ୍ ଆୟୋଜନ ସମ୍ପର୍କରେ ଘୋଷଣା କରିଥିଲେ। ଏହାର ମୁଖ୍ୟ ଉଦ୍ଦେଶ୍ୟ ସଦସ୍ୟ ଦେଶଗୁଡ଼ିକ ମଧ୍ୟରେ ସାଂସ୍କୃତିକ ସମ୍ପର୍କ ମଜବୁତ କରିବା ଓ ପରସ୍ପର ମଧ୍ୟରେ ବୁଝାମଣା ବଢ଼ାଇବା। ସେହି ବୈଠକରେ ରାଜନାଥ ସିଂହ ଆତଙ୍କବାଦ ବିରୋଧରେ ମିଳିତ ପଦକ୍ଷେପ ନେବାକୁ ମଧ୍ୟ ଆହ୍ୱାନ ଦେଇଥିଲେ। ଏବେ ପାକିସ୍ତାନ ନିମନ୍ତ୍ରଣ ଗ୍ରହଣ କରୁଛି କି ନାହିଁ ଏବଂ ଫୋରମ୍ରେ ଦୁଇ ଦେଶର ପ୍ରତିନିଧିଙ୍କ ମଧ୍ୟରେ କୌଣସି ଆଲୋଚନା ହେଉଛି କି ନାହିଁ, ତାହା ଉପରେ ନଜର ରହିଛି।
