ଓଡ଼ିଶା ଡଟ୍ ନ୍ୟୁଜ୍ ବ୍ୟୁରୋ

6/08/2025 at 12:32 PM

ନୂଆଦିଲ୍ଲୀ: ରୁଷରୁ ତୈଳ ଆମଦାନୀ ନେଇ ଭାରତକୁ ଆମେରିକା ଧମକ ଦେଉଛି। ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ମଧ୍ୟ ଏହି ପ୍ରସଙ୍ଗରେ ଅନେକ ଥର ବିବୃତ୍ତି ଦେଇଛନ୍ତି। ଏହି ସମୟରେ ଜାତୀୟ ସୁରକ୍ଷା ପରାମର୍ଶଦାତା ଅଜିତ ଡୋଭାଲ ରୁଷ ଏବଂ ଭାରତ ମଧ୍ୟରେ ସମ୍ପର୍କକୁ ମଜବୁତ କରିବା ଲକ୍ଷ୍ୟରେ ମସ୍କୋ ପହଞ୍ଚିଛନ୍ତି। ଯଦିଓ ଡୋଭାଲଙ୍କ ଗସ୍ତ ପୂର୍ବରୁ ସ୍ଥିର ହୋଇଥିଲା, କିନ୍ତୁ ଏବେ ରୁଷ ସହିତ ଭାରତର ସମ୍ପର୍କ ଉପରେ ଟ୍ରମ୍ପଙ୍କ ମନ୍ତବ୍ୟ ଯୋଗୁଁ ଏହା ଆହୁରି ଗୁରୁତ୍ୱପୂର୍ଣ୍ଣ ହୋଇଯାଇଛି।

ରୁଷ ଗଣମାଧ୍ୟମ ଅନୁସାରେ ଜାତୀୟ ସୁରକ୍ଷା ପରାମର୍ଶଦାତା ଅଜିତ ଡୋଭାଲ ମଧ୍ୟ ରୁଷରେ ରାଷ୍ଟ୍ରପତି ଭ୍ଲାଦିମିର ପୁଟିନଙ୍କୁ ଭେଟିବେ। ଏହି ସମୟରେ ରଣନୈତିକ ସହଭାଗୀତା ଏବଂ ଦ୍ୱିପାକ୍ଷିକ ସମ୍ପର୍କକୁ ଉନ୍ନତ କରିବା ପାଇଁ ଅନ୍ୟ ରୁଷ ନେତାଙ୍କ ସହ ମଧ୍ୟ ଆଲୋଚନା ହେବ। ବୈଦେଶିକ ମନ୍ତ୍ରୀ ଏସ ଜୟଶଙ୍କର ମଧ୍ୟ ଆସନ୍ତା ସପ୍ତାହରେ ରୁଷ ଗସ୍ତ କରିପାରନ୍ତି।ରୁଷ ଡୋଭାଲଙ୍କ ମସ୍କୋ ଗସ୍ତ ସମ୍ପର୍କରେ ଭାରତ ସପକ୍ଷରେ ଏକ ବିବୃତ୍ତି ଜାରି କରିଛି। କ୍ରେମଲିନ୍ ଆମେରିକା ଭାରତ ଉପରେ ରୁଷଠାରୁ ତେଲ କିଣିବା ପାଇଁ ଅଯଥା ଚାପ ପକାଇବାର ଅଭିଯୋଗ କରିଛି।

କ୍ରେମଲିନ୍ ମୁଖପାତ୍ର ଦିମିତ୍ରୀ ପେସକୋଭ୍ କୌଣସି ଦେଶର ନାମ ନ ନେଇ କହିଛନ୍ତି ଯେ ଆମେ କିଛି ବିବୃତ୍ତି ଶୁଣିଛୁ ଯାହା ପ୍ରକୃତରେ ଧମକ ପରି। ଏଥିରେ ଦେଶଗୁଡ଼ିକୁ ରୁଷ ସହିତ ସେମାନଙ୍କର ବାଣିଜ୍ୟ ସମ୍ପର୍କ ସମାପ୍ତ କରିବାକୁ ଚାପ ଦିଆଯାଉଛି। ଆମେ ଏପରି ବିବୃତ୍ତିକୁ ବୈଧ ବୋଲି ଭାବୁନାହୁଁ।