ଓଡ଼ିଶା ଡଟ୍ ନ୍ୟୁଜ୍ ବ୍ୟୁରୋ7/08/2025 at 10:33 AM
ୱାଶିଂଟନ: ପାକିସ୍ତାନ ସେନା ମୁଖ୍ୟ ଅସୀମ ମୁନିର ଦୁଇ ମାସ ମଧ୍ୟରେ ଦ୍ୱିତୀୟ ଥର ପାଇଁ ଆମେରିକା ଗସ୍ତ କରିବାକୁ ଯାଉଛନ୍ତି। ଏହା ପୂର୍ବରୁ ମୁନିର ଜୁନ୍ ମାସରେ ଆମେରିକା ଗସ୍ତ କରିଥିଲେ। ଅସୀମ ମୁନିରଙ୍କ ପରେ ପାକିସ୍ତାନ ବାୟୁସେନା ମୁଖ୍ୟ ଜାହିର ଅହମ୍ମଦ ବାବର ସିଦ୍ଧୁ ମଧ୍ୟ ଆମେରିକା ଗସ୍ତ କରିଥିଲେ।
ଜେନେରାଲ ଅସୀମ ମୁନିର ଆମେରିକା କେନ୍ଦ୍ରୀୟ କମାଣ୍ଡ (CENTCOM) କମାଣ୍ଡର ଜେନେରାଲ ମାଇକେଲ ଇ. କୁରିଲାଙ୍କ ବିଦାୟ ସମାରୋହରେ ଯୋଗଦେବା ପାଇଁ ଆମେରିକା ଗସ୍ତ କରିବାକୁ ଯାଉଛନ୍ତି। କୁରିଲାଙ୍କ ବିଦାୟ ସମାରୋହ ଫ୍ଲୋରିଡାର ଟାମ୍ପାରେ ଥିବା CENTCOM ମୁଖ୍ୟାଳୟରେ ଅନୁଷ୍ଠିତ ହେବ ବୋଲି କୁହାଯାଉଛି। CENTCOM କମାଣ୍ଡର ଜେନେରାଲ ମାଇକେଲ ଇ. କୁରିଲା ଜୁଲାଇ ଶେଷ ଭାଗରେ ପାକିସ୍ତାନ ଗସ୍ତ କରିଥିଲେ। ଅସୀମ ମୁନିର ଚଳିତ ବର୍ଷ ଜୁନ୍ ମାସରେ ଆମେରିକା ଗସ୍ତ କରିଥିଲେ। ଏହି ସମୟ ମଧ୍ୟରେ ସେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ସହ ମଧ୍ୟାହ୍ନ ଭୋଜନ ମଧ୍ୟ କରିଥିଲେ। ଉଭୟଙ୍କ ସାକ୍ଷାତ ପ୍ରାୟ ଦୁଇ ଘଣ୍ଟା ଧରି ଚାଲିଥିଲା।
ହ୍ୱାଇଟ୍ ହାଉସ୍ ମୁଖପାତ୍ର ଆନ୍ନା କେଲି କହିଥିଲେ ଯେ ରାଷ୍ଟ୍ରପତି ଟ୍ରମ୍ପ, ଜେନେରାଲ ମୁନିରଙ୍କୁ ସାକ୍ଷାତ କରିବାକୁ ଡାକିଥିଲେ। କାରଣ ମୁନିର, ଭାରତ ଏବଂ ପାକିସ୍ତାନ ମଧ୍ୟରେ ସମ୍ଭାବ୍ୟ ପରମାଣୁ ଯୁଦ୍ଧକୁ ରୋକିବା ପାଇଁ ଟ୍ରମ୍ପଙ୍କୁ ନୋବେଲ୍ ଶାନ୍ତି ପୁରସ୍କାର ଦେବାକୁ ସୁପାରିଶ କରିଥିଲେ।