୯୦ କୋଟିର ସାଇବର ଠକେଇ; ଇଞ୍ଜିନିୟରିଂ କଲେଜ ‘ହଟସ୍ପଟ୍’
ପୁଡୁଚେରୀ,୨୮|୧୧: ସାଇବର ‘ହଟସ୍ପଟ୍’ ସାଜିଛି ଇଞ୍ଜିନିୟରିଂ କଲେଜ! ପୁଡୁଚେରୀ ପୋଲିସ ଏକ ସାଇବର ଅପରାଧ ନେଟୱାର୍କର ପର୍ଦ୍ଦାଫାସ କରିଛି ଯାହା ରାଜ୍ୟର ଆଇନ ପ୍ରବର୍ତ୍ତନ ସଂସ୍ଥାଗୁଡ଼ିକୁ ଆଶ୍ଚର୍ଯ୍ୟ କରିଦେଇଛି। ଏହି ସାଇବର ଫ୍ରଡରେ ହେଉଥିଲା ଏକ ଇଞ୍ଜିନିୟରିଂ କଲେଜ ଭିତରେ | ପ୍ରାୟ ୯୦ କୋଟି ଟଙ୍କାର ସାଇବର ଠକେଇ ହୋଇ ଥିବାର ସୂଚନା। ବନ୍ଧା ହେଲେ ଇଞ୍ଜିନିୟରିଂ ଛାତ୍ର | ଏହି ସାଇବର ଅପରାଧରେ ଅନେକ ଛାତ୍ରଙ୍କ ସମ୍ପୃକ୍ତି ଥିବା ଜଣାପଡ଼ିଛି | ତେବେ କର୍ତ୍ତୃପକ୍ଷ କ୍ୟାମ୍ପସକୁ “ସାଇବର ଅପରାଧର ହଟସ୍ପଟ୍” ଭାବରେ ଘୋଷଣା କରିଛନ୍ତି |
ଏହି ମାମଲା ସେତେବେଳେ ସାମ୍ନାକୁ ଆସିଥିଲା ଯେତେବେଳେ ଦୁଇ ଜଣ ଇଞ୍ଜିନିୟରିଂ ଛାତ୍ର – ଦିନେଶ ଏବଂ ଜୟପ୍ରତାପଙ୍କର ବ୍ୟାଙ୍କ ଆକାଉଣ୍ଟଗୁଡ଼ିକ ହଠାତ୍ ଫ୍ରିଜ୍ ହେବା ପରେ ପୋଲିସକୁ ଯାଇ ଅଭିଯୋଗ କରିଥିଲେ। ତଦନ୍ତରୁ ଜଣାପଡିଛି ଯେ, ଉଭୟ ସେମାନଙ୍କର ବନ୍ଧୁ ହରିଶଙ୍କୁ ଆକାଉଣ୍ଟ ଆକ୍ସେସ୍ ପ୍ରଦାନ କରିଥିଲେ, ଯିଏ ବର୍ତ୍ତମାନ ପୋଲିସ ହେପାଜତରେ ଅଛନ୍ତି। ଅଧିକ ତଦନ୍ତରୁ ଜଣାପଡିଛି ଯେ, ହରିଶ ଜଣେ ଇଂଜିନିୟିରଂ ଛାତ୍ର ଯିଏକି ସାଧାରଣ ନାଗରିକଙ୍କଠାରୁ ୨୦ରୁ ଅଧିକ ବ୍ୟାଙ୍କ ଆକାଉଣ୍ଟ ସମ୍ପର୍କରେ ସୂଚନା ସଂଗ୍ରହ କରିଥିଲେ।
ଏହି ଘଟଣାରେ ପୁଡୁଚେରୀ ସାଇବର କ୍ରାଇମ୍ ପୋଲିସ ଏପର୍ଯ୍ୟନ୍ତ ସାତ ଜଣଙ୍କୁ ଗିରଫ କରିଛି। ଯେଉଁଥିରେ ଚାରି ଜଣ ବର୍ତ୍ତମାନର ଛାତ୍ର ଏବଂ ତିନି ଜଣ ସ୍ନାତକ ଅଛନ୍ତି। ଅଭିଯୁକ୍ତମାନଙ୍କୁ ଚିହ୍ନଟ କରାଯାଇଛି | ସେମାନେ ହେଲେ ଥମାସ୍ ଓରଫ ହ୍ୟାଗ୍ରୀଭ୍, ହରିଶ ଗଣେସନ, ଗୋବିନ୍ଦରାଜ, ଯଶୱିନ୍, ରାହୁଲ ଏବଂ ଆୟନ | ୭ ଅଭିଯୁକ୍ତଙ୍କୁ ଗିରଫ କରାଯିବା ସହ ସେମାନଙ୍କଠାରୁ ୫ ଲକ୍ଷ ଟଙ୍କା ସହ ୧୭୧ଟି ଚେକ୍ ବୁକ୍, ୭୫ଟି ଏଟିଏମ୍ କାର୍ଡ, କ୍ରେଡିଟ୍ କାର୍ଡ, ୨୦ଟି ମୋବାଇଲ ଫୋନ୍, ଲାପଟପ୍, କମ୍ପ୍ୟୁଟର ଏବଂ କିଛି ବ୍ୟାଙ୍କ ପାସ୍ ବୁକ୍ ଜବତ କରିଛି ପୋଲିସ | ତେବେ ଦିନକୁ ଦିନ ସାଇବର ଅପରାଧ ସାରା ବିଶ୍ବରେ ବଢିଚାଲିଛି। ତାକୁ ରୋକିବା ପାଇଁ ସରକାର ବିଭିନ୍ନ ପଦକ୍ଷେପ ନେଉଛନ୍ତି। ସମସ୍ତଙ୍କୁ ସଚେତନ ମଧ୍ୟ କରାଯାଉଛି। କିନ୍ତୁ ସାଇବର କ୍ରାଇମ କମିବାର ଦେଖାଯାଉନାହିଁ | ସାଇବର କ୍ରିମିନାଲଙ୍କ ସହ ହାତ ମିଳାଇ ଆମ ଭାରତର କିଛି ଇଂଜିନିୟରିଂ ଛାତ୍ର ଘଟାଇଛନ୍ତି ଅପରାଧ।
ସୂଚନା ଅନୁସାରେ, ପୁଡୁଚେରୀର ଏକ ଇଂଜିନିୟରିଂ କଲେଜରେ ଏକ ଆଶ୍ଚର୍ଯ୍ୟକର ଘଟଣା ଘଟିଛି | ଯେଉଁଠାରେ କିଛି ଇଂଜିନିୟରିଂ ଛାତ୍ର ପାଠ ପଢିବା ବଦଳରେ ଏକ ସାଇବର ଅପରାଧର ନେଟୱର୍କ ଚଲେଇଥିଲେ | କିଛି ଛାତ୍ର ତାଙ୍କ ସାଙ୍ଗ ମାନଙ୍କ ବ୍ୟାଙ୍କ ଆକାଉଣ୍ଟ ଡିଟେଲ୍ସ ନେଇ ଏହି କାରନାମା ଚଲାଇଥିଲେ। ଖାଲି ସାଙ୍ଗ ମାନଙ୍କର ନୁହେଁ, କଲେଜ ବାହାର ଲୋକଙ୍କୁ ମଧ୍ୟ ପାଲରେ ପକାଇ ଚଳାଇଥିଲେ ଧନ୍ଦା। ଏହି ଅଭିଯୋଗରେ ପୋଲିସ ଏପର୍ଯ୍ୟନ୍ତ ୭ଜଣଙ୍କୁ ଗିରଫ କରି ଜେଲକୁ ପଠାଇଛି। ପୋଲିସ ଜାଣିବାକୁ ପାଇଛି ଏଥିରେ ପ୍ରାୟ ୯୦ କୋଟି ଟଙ୍କା ଠକେଇ ହୋଇଛି।
ତଦନ୍ତକାରୀମାନେ ଜାଣିପାରିଲେ ଯେ ଏହି ଅପରାଧିକ ନେଟୱାର୍କ ଭାରତ ବାହାରକୁ ବିସ୍ତାରିତ ହୋଇ ଚୀନ ଏବଂ ଦୁବାଇ ପର୍ଯ୍ୟନ୍ତ ପହଞ୍ଚିଛି | ମୁଖ୍ୟ ଅଭିଯୁକ୍ତ ଗଣେଶନ ଟେଲିଗ୍ରାମ ଆପ୍ ମାଧ୍ୟମରେ ଚୀନରେ ଅବସ୍ଥିତ ସାଇବର ଅପରାଧୀଙ୍କ ସହିତ ସିଧାସଳଖ ସମନ୍ୱୟ ସ୍ଥାପନ କରିଥିଲେ। ସେ ଭାରତରେ ଥିବା ତାଙ୍କର ବ୍ୟାଙ୍କ ଆକାଉଣ୍ଟ ମାଧ୍ୟମରେ ଟଙ୍କା ଜମା କରିବା, ଅବୈଧ ପାଣ୍ଠିକୁ କ୍ରିପ୍ଟୋକରେନ୍ସିରେ ରୂପାନ୍ତରିତ କରିବା, କମିଶନ ବଦଳରେ କ୍ରିପ୍ଟୋ ୱାଲେଟକୁ ପରିମାଣ ସ୍ଥାନାନ୍ତର କରିବା ଇତ୍ୟାଦିକୁ ସମ୍ଭାଳୁଥିଲା |
ଅଧିକାରୀମାନେ କହିଛନ୍ତି ଯେ,ଏହି ସିଷ୍ଟମ ଏକ ଅତ୍ୟନ୍ତ ସଂଗଠିତ କ୍ରିପ୍ଟୋ-ଆଧାରିତ ମନି ଲଣ୍ଡରିଂ ମଡେଲ ଭାବରେ କାର୍ଯ୍ୟ କରୁଥିଲା, ଯେଉଁଥିରେ ଛାତ୍ରମାନଙ୍କୁ “ଆର୍ଥିକ ଉପକରଣ” ଭାବରେ ବ୍ୟବହାର କରାଯାଉଥିଲା। ଜଣେ ବରିଷ୍ଠ ଅଧିକାରୀଙ୍କ କହିବା ଅନୁସାରେ, ଛାତ୍ରମାନଙ୍କୁ ପାର୍ଟ-ଟାଇମ୍ ଛୁଟି କାମ, ଡାଟା ଏଣ୍ଟ୍ରି ଏବଂ ବାଣିଜ୍ୟିକ କାର୍ଯ୍ୟର ବାହାନାରେ ପ୍ରଲୋଭିତ କରାଯାଇଥିଲା। ବଦଳରେ, ସେମାନଙ୍କୁ ଏହି ସବୁ ଅନ୍ୟ ମାନଙ୍କ ବ୍ୟାଙ୍କ ସମ୍ପର୍କିତ ଅନେକ ଡକ୍ୟୁମେଣ୍ଟଗୁଡ଼ିକର ତଥ୍ୟ ପ୍ରଦାନ କରିବାକୁ କୁହାଯାଇଥିଲା ଏବଂ ପ୍ରତି ଛାତ୍ରମାନଙ୍କ ଆକାଉଣ୍ଟକୁ ୧୦,୦୦୦ ରୁ ୨୦,୦୦୦ ପର୍ଯ୍ୟନ୍ତ ଟଙ୍କା ପଠା ଯାଉଥିଲା |
ତେବେ ଏହି ସାଇବର ଅପରାଧ କାର୍ଯ୍ୟକାଳପକୁ ନଜରରେ ରଖି ପୁଡୁଚେରୀ ପୋଲିସ ସତର୍କତା ପାଇଁ ପରାମର୍ଶ ଦେଇଛନ୍ତି | ସେ କହିଛନ୍ତି ଯେ, ଆପଣଙ୍କ ବ୍ୟାଙ୍କ ଆକାଉଣ୍ଟକୁ ସୁରକ୍ଷିତ ରଖନ୍ତୁ | ଏବଂ “କୌଣସି ପରିସ୍ଥିତିରେ ଅନ୍ୟ କାହାକୁ ଆପଣଙ୍କ ବ୍ୟାଙ୍କ ଆକାଉଣ୍ଟ କିମ୍ବା ଡିଜିଟାଲ୍ ୱାଲେଟ୍ ପରିଚାଳନା କରିବାକୁ ଦିଅନ୍ତୁ ନାହିଁ। ଯେକୌଣସି ସନ୍ଦେହଜନକ କାର୍ଯ୍ୟକଳାପ ବିଷୟରେ ତୁରନ୍ତ ସାଇବର କ୍ରାଇମ୍ ହେଲ୍ପଲାଇନ୍ 1930 ରେ ରିପୋର୍ଟ କରନ୍ତୁ।”
ପୋଲିସ ସନ୍ଦେହ କରୁଛି ଯେ, ଏହି ନେଟୱାର୍କ କେବଳ ପୁଡୁଚେରୀରେ ନୁହେଁ ବରଂ ତାମିଲନାଡୁ, କର୍ଣ୍ଣାଟକ ଏବଂ ତେଲେଙ୍ଗାନାରେ ମଧ୍ୟ ସକ୍ରିୟ ଅଛି। କ୍ୟାମ୍ପସ ଭିତରେ ଏପରି କାର୍ଯ୍ୟକଳାପର କେନ୍ଦ୍ର କିପରି ପାଲଟିଲା ତାହା ବୁଝିବା ପାଇଁ କଲେଜ କର୍ତ୍ତୃପକ୍ଷଙ୍କଠାରୁ ତଦନ୍ତରେ ସହଯୋଗ ଲୋଡିଛି ପୋଲିସ |ଅଧିକାରୀମାନଙ୍କ କହିବା ଅନୁସାରେ, ଏହି ଘଟଣାରେ ଆହୁରି ଅନେକ ସମ୍ପୃକ୍ତ ଥିବାର ଅନୁମାନ କରାଯାଉଛି | ଏଥିରେ ଆହୁରି ଗିରଫଦାରୀ ହେବାର ସମ୍ଭାବନା ଅଛି ଏବଂ ସମ୍ପୂର୍ଣ୍ଣ ଅନ୍ତର୍ଜାତୀୟ ନେଟୱାର୍କ ମଧ୍ୟ ଖୁବ୍ ଶୀଘ୍ର ପର୍ଦ୍ଦାଫାସ ହୋଇପାରେ।
ଅନ୍ୟପଟେ କର୍ତ୍ତୃପକ୍ଷ ଏଭଳି ସଙ୍ଗୀନ ଅପରାଧିକ କାର୍ଯ୍ୟକଳାପ ଉପରେ ଗୁରୁତ୍ୱାରୋପ କରି କହିଛନ୍ତି ଯେ, ଏହି ନେଟୱାର୍କ ଯୁବ ବ୍ୟକ୍ତିମାନଙ୍କୁ ବେଶୀ ପରିମାଣରେ ଟାର୍ଗେଟ କରୁଛି ଏବଂ ଛୋଟ ଛୋଟ ଅବହେଳା ମଧ୍ୟ ସେମାନଙ୍କୁ ଭବିଷ୍ୟତରେ ବଡ଼ ଆର୍ଥିକ ଅପରାଧରେ ସାହାଯ୍ୟ କରିପାରେ |
