Syria News: ୪୭ ବର୍ଷ ପରେ ସିରିଆକୁ ବଡ଼ ରିଲିଫ୍, ଆମେରିକାର Terrorism Sponsor ତାଲିକାରୁ ହଟିଲା
ନୂଆଦିଲ୍ଲୀ: ଆମେରିକା ସିରିଆକୁ ଦୀର୍ଘ ୪୭ ବର୍ଷ ପରେ ‘State Sponsors of Terrorism’ ତାଲିକାରୁ ହଟାଇଛି। ସିରିଆର ପୂର୍ବତନ ରାଷ୍ଟ୍ରପତି ବଶର ଅଲ-ଆସାଦଙ୍କ ଶାସନର ପତନ, ନୂଆ ସରକାର ଗଠନ ଏବଂ ଦୁଇ ଦେଶର ସମ୍ପର୍କରେ ସୁଧାର ପରେ ଆମେରିକା ଏହି ନିଷ୍ପତ୍ତି ନେଇଛି। ଏହାକୁ ଯୁଦ୍ଧପୀଡ଼ିତ ସିରିଆର ଆର୍ଥିକ ପୁନର୍ନିର୍ମାଣ ଓ ବିଦେଶୀ ନିବେଶ ପାଇଁ ଏକ ବଡ଼ ସୁଯୋଗ ଭାବେ ଦେଖାଯାଉଛି।
ଆମେରିକାର ବୈଦେଶିକ ସଚିବ ମାର୍କୋ ରୁବିଓଙ୍କ ଅନୁସାରେ, କଂଗ୍ରେସକୁ ଦିଆଯାଇଥିବା ୪୫ ଦିନର ପୂର୍ବ ନୋଟିସ୍ ଅବଧି ଶେଷ ହେବା ପରେ ଏହି ନିଷ୍ପତ୍ତିକୁ ଅନୁମୋଦନ କରାଯାଇଛି। ଏଥିସହ ଆମେରିକା ‘ହାୟାତ ତାହରିର ଅଲ-ଶାମ (HTS)’କୁ ମଧ୍ୟ ‘Specially Designated Global Terrorist’ ତାଲିକାରୁ ହଟାଇଛି। ଆମେରିକାର ମତରେ, ନୂଆ ସିରିଆ ସରକାର ଅନ୍ତର୍ଜାତୀୟ ଆତଙ୍କବାଦୀ ସଂଗଠନଠାରୁ ଦୂରତା ରଖିବା ଦିଗରେ ପଦକ୍ଷେପ ନେଉଛି।
ଏହି ନିଷ୍ପତ୍ତିକୁ ସିରିଆ ସରକାର ସ୍ୱାଗତ କରିଛି। ସିରିଆର ବୈଦେଶିକ ମନ୍ତ୍ରୀ ଅସଦ ଅଲ-ଶାଇବାନି ଏହାକୁ ଦେଶ ପାଇଁ ଏକ ବଡ଼ ସଫଳତା ବୋଲି କହିଛନ୍ତି। ୧୯୭୯ରେ ଲାଗୁ ହୋଇଥିବା ଏହି କଟକଣା ହଟିବା ଦ୍ୱାରା ସିରିଆ ପୁଣିଥରେ ବିଶ୍ୱ ଆର୍ଥିକ ବ୍ୟବସ୍ଥା ସହ ଯୋଡ଼ିହେବା, ବାଣିଜ୍ୟ ବଢ଼ାଇବା ଏବଂ ବିଦେଶୀ ନିବେଶ ଆକର୍ଷଣ କରିବାର ସୁଯୋଗ ପାଇପାରେ। ତେବେ ଏହାର ଅର୍ଥ ଆମେରିକା ଆତଙ୍କବାଦ ବିରୋଧୀ ନୀତିରୁ ପଛକୁ ହଟିଛି ନୁହେଁ ବୋଲି ଆମେରିକା ସ୍ପଷ୍ଟ କରିଛି।
ଦୀର୍ଘ ଦଶନ୍ଧି ଧରି ଚାଲିଥିବା ଗୃହଯୁଦ୍ଧ ଯୋଗୁଁ ସିରିଆର ଅର୍ଥନୀତି ଓ ଭିତ୍ତିଭୂମି ଗଭୀର ଭାବେ ପ୍ରଭାବିତ ହୋଇଛି। ଏବେ ପ୍ରତିବନ୍ଧକ ହଟିବା ପରେ ଦେଶରେ Investment, Trade ଓ Development Projects ବଢ଼ିବାର ଆଶା ରହିଛି। ନୂଆ ସରକାର ଅନ୍ତର୍ଜାତୀୟ ସମୁଦାୟ ସହ ସମ୍ପର୍କ ମଜବୁତ କରିବା ସହ ଆର୍ଥିକ ସଂସ୍କାର ଦିଗରେ ଆଗକୁ ବଢ଼ିବାକୁ ଚାହୁଁଛି।
