Gwalior kissing car: ପ୍ରେମିକାର ଚୁମ୍ବନ ଚିହ୍ନରେ ଭରିଗଲା କାର୍, ଭିଡିଓ ଭାଇରାଲ ପରେ ପୋଲିସ ଲଗାଇଲା ୫,୫୦୦ ଟଙ୍କା ଜରିମାନା
ମଧ୍ୟପ୍ରଦେଶ: ସୋସିଆଲ ମିଡିଆରେ ଲାଇକ୍, ଫଲୋଅର ଓ ଭ୍ୟୁ ପାଇବା ପାଇଁ ଯୁବପିଢ଼ିଙ୍କ ବିଭିନ୍ନ ପ୍ରକାରର କାରନାମା ସାମ୍ନାକୁ ଆସୁଛି। ମଧ୍ୟପ୍ରଦେଶର ଗ୍ୱାଲିୟରରେ ଏଭଳି ଏକ ଘଟଣା ଘଟିଛି। ଜଣେ ଯୁବକ ତାଙ୍କ କାର୍କୁ ଲିପଷ୍ଟିକ୍ର ଚୁମ୍ବନ ଚିହ୍ନରେ ଭର୍ତ୍ତି କରି ତାହାର ଭିଡିଓ ସୋସିଆଲ ମିଡିଆରେ ଛାଡ଼ିଥିଲେ। ଭିଡିଓଟି ଅଳ୍ପ ସମୟ ମଧ୍ୟରେ ବେଶ୍ ଲୋକପ୍ରିୟ ହୋଇଥିଲେ ମଧ୍ୟ ଶେଷରେ ଏହି କାରନାମା ତାଙ୍କୁ ମହଙ୍ଗା ପଡ଼ିଛି।
ସୂଚନା ଅନୁସାରେ, ଯୁବକଙ୍କ ପ୍ରେମିକା କାର୍ର ସମଗ୍ର ଶରୀରରେ ଲିପଷ୍ଟିକ୍ରେ ଅନେକ ଚୁମ୍ବନ ଚିହ୍ନ ତିଆରି କରିଥିଲେ। ପରେ ଏହି କାର୍ ଗ୍ୱାଲିୟରର ରାସ୍ତାରେ ଚଳାଚଳ କରୁଥିବା ବେଳେ ଏହାର ଭିଡିଓ କରାଯାଇ ସୋସିଆଲ ମିଡିଆରେ ପ୍ରସାରିତ ହୋଇଥିଲା। ଭିଡିଓଟି ଗୋଟିଏ ଦିନ ମଧ୍ୟରେ ପ୍ରାୟ ୫୫ ଲକ୍ଷ ଥର ଦେଖାଯାଇଥିବା ଜଣାପଡ଼ିଛି। ତେବେ ଭିଡିଓଟି ଟ୍ରାଫିକ୍ ପୋଲିସର ନଜରକୁ ଆସିବା ପରେ ଯାଞ୍ଚ ଆରମ୍ଭ ହୋଇଥିଲା। ପରେ ଥାଟିପୁର ଅଞ୍ଚଳରୁ କାର୍ଟିକୁ ଜବତ କରି ପୋଲିସ ଥାନାକୁ ନେଇଥିଲା।
ପୋଲିସ ଅଧିକାରୀଙ୍କ ସୂଚନା ଅନୁଯାୟୀ, ମୋଟର ଯାନ ଆଇନର ବିଭିନ୍ନ ଧାରା ଅନୁସାରେ କାର୍ ମାଲିକଙ୍କ ଉପରେ ମୋଟ ୫,୫୦୦ ଟଙ୍କା ଜରିମାନା ଲଗାଯାଇଛି। ଥାନାରେ ହାଜର ହେବା ପରେ ଯୁବକ ଜଣକ ନିଜର ଭୁଲ୍ ସ୍ୱୀକାର କରିଥିଲେ। ଏହାପରେ ସେ ନିଜ ହାତରେ ପାଣି ଦେଇ କାର୍ରେ ଲାଗିଥିବା ସମସ୍ତ ଲିପଷ୍ଟିକ୍ ଚିହ୍ନ ସଫା କରିଥିଲେ। ସୋସିଆଲ ମିଡିଆରେ ଲୋକପ୍ରିୟତା ପାଇଁ ଏଭଳି କାରନାମା କରିବା କିପରି ଆଇନଗତ ସମସ୍ୟା ସୃଷ୍ଟି କରିପାରେ, ଗ୍ୱାଲିୟରର ଏହି ଘଟଣା ତାହାର ଏକ ଉଦାହରଣ ପାଲଟିଛି।
