ଆମେରିକାରେ ତୃତୀୟ ଦୁନିଆର ଏଣ୍ଟ୍ରି ବନ୍ଦ କରାଇଦେବୁ; କାହିଁକି ଏଭଳି କହିଲେ ଟ୍ରମ୍ପ
ୱାଶିଂଟନ: ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଗରିବ ଦେଶରୁ ପ୍ରବାସଙ୍କ ଏଣ୍ଟ୍ରିକୁ ସ୍ଥାୟୀ ଭାବରେ ବନ୍ଦ କରିବାକୁ ଆହ୍ୱାନ ଦେଇଛନ୍ତି। ସେ ଆମେରିକାର ଅନେକ ସମସ୍ୟା ପାଇଁ ବିଦେଶୀମାନଙ୍କୁ ଦାୟୀ କରିଛନ୍ତି। ସେ “ତୃତୀୟ ଦୁନିଆ”ର ଲୋକଙ୍କ ପାଇଁ ଆମେରିକାରେ ପ୍ରବେଶ ଉପରେ ସମ୍ପୂର୍ଣ୍ଣ ନିଷେଧ ସମେତ ଅନେକ କଠୋର ପଦକ୍ଷେପ ଘୋଷଣା କରିଛନ୍ତି। ୱାଶିଂଟନ ଡିସିରେ ଦୁଇ ଜଣ ନ୍ୟାସନାଲ ଗାର୍ଡ ସଦସ୍ୟଙ୍କ ଗୁଳିମାଡ଼ ପରେ ଆମେରିକାରେ ଉତ୍ତେଜନା ପରେ ଟ୍ରମ୍ପଙ୍କ ଏହି ମନ୍ତବ୍ୟ ଆସିଛି।
ବୁଧବାର ୱାଶିଂଟନ ଡିସିରେ ଜଣେ ଆଫଗାନ ନାଗରିକ ଆମେରିକାର ନ୍ୟାସନାଲ ଗାର୍ଡ ଉପରେ ଗୁଳିଚାଳନା କରିଥିବା ଅଭିଯୋଗ ହୋଇଛି। ଆଫଗାନିସ୍ତାନରୁ ଆମେରିକୀୟ ସେନା ପ୍ରତ୍ୟାହାର ପରେ ଆମେରିକୀୟ ସୈନ୍ୟମାନଙ୍କୁ ସାହାଯ୍ୟ କରିଥିବା ଲୋକଙ୍କୁ ପୁନର୍ବାସ କରିବା ପାଇଁ ଏକ କାର୍ଯ୍ୟକ୍ରମର ଅଂଶ ଭାବରେ ଅଭିଯୁକ୍ତ ଆମେରିକା ଆସିଥିଲେ। ଏହି ଘଟଣା ଆମେରିକାରେ ବିଦେଶୀଙ୍କ ବିରୁଦ୍ଧରେ କ୍ରୋଧ ସୃଷ୍ଟି କରିଛି।ଏଥିସହିତ ସୁରକ୍ଷା ପ୍ରତି ବିପଦ ସୃଷ୍ଟି କରୁଥିବା ବିଦେଶୀମାନଙ୍କୁ ବିଦା କରାଯିବ ବୋଲି ଟ୍ରମ୍ପ୍ କହିଛନ୍ତି।
ତେବେ ଟ୍ରମ୍ପ୍ଙ୍କ ଏଭଳି ପଦକ୍ଷେପ ବିଶ୍ୱସ୍ତରରେ ବଡ଼ ଧରଣର ପ୍ରଭାବ ପକାଇବାକୁ ଯାଉଛି। ନିଯୁକ୍ତି ଏବଂ ଶିକ୍ଷା ପାଇଁ ଆମେରିକା ଆସିଥିବା ଅନେକ ନିୟୁତ ବ୍ୟକ୍ତି ପ୍ରଭାବିତ ହେବେ। ଆହୁରି ମଧ୍ୟ ଯେଉଁମାନେ ଆମେରିକାର ସମ୍ପତ୍ତି ନୁହନ୍ତି କିମ୍ବା ଆମ ଦେଶକୁ ଭଲ ପାଉନାହାନ୍ତି ସେମାନଙ୍କୁ ବାହାର କରିଦିଆଯିବ ବୋଲି ଟ୍ରମ୍ପ୍ ଟ୍ରୁଥ୍ ସୋସିଆଲରେ ଲେଖିଛନ୍ତି। ତେବେ କହିବାକୁ ଗଲେ, ଗରିବ ଏବଂ ଅବହେଳିତ ଦେଶଗୁଡ଼କ ପାଇଁ ତୃତୀୟ ବିଶ୍ୱ ତଥା ତୃତୀୟ ଦୁନିଆ ଶବ୍ଦ ବ୍ୟବହାର କରାଯାଇଥାଏ।
