ଅଢେଇ ଅକ୍ଷର ପ୍ରେମରେ ଲାଗିଗଲା ଦାଗ ; ଅମରଙ୍କ ପ୍ରେମ ଜାଲରେ ଫସିଗଲେ ସେଜଲ
ବାଲେଶ୍ଵର;୩୦|୧୧: ଅଢ଼େଇ ଅକ୍ଷର ପ୍ରେମରେ ଲାଗିଗଲା ଦାଗ | ପ୍ରେମ ପାଇଁ ଆମେରିକା ଛାଡିଲେ ସେଜଲ | ସାତସମୁଦ୍ର ପାର୍ ହୋଇ ନିଜ ଘର ଲୋକଙ୍କୁ ପର କରି ଚାଲିଆସିଥିଲେ ସେଜଲ | କିନ୍ତୁ ଏ କଣ ପ୍ରେମ ବଦଳରେ ତାଙ୍କୁ ମିଳିଲା କଣ କେବଳ ପ୍ରତାରଣା , ନିନ୍ଦା , ଅପମାନ | ଆମେରିକାରୁ ଓଡ଼ିଶା ଡାକି ଆଣିଲା ଥିବା ଏହି ପ୍ରେମିକ ଆଜି ତାଙ୍କୁ ଧୋକା ଦେଇଦେଲା। ଅଢ଼େଇ ଦିନ ବି ଗଲାନି ଏ ପ୍ରେମ କାହାଣୀ। ଅମରଙ୍କ ପ୍ରେମ ଏବେ ସେଜଲଙ୍କ ପାଇଁ ପ୍ରତାରଣା ପାଲଟିଛି ! ଅମରଙ୍କ ଆମେରିକା ଷଡ଼ଯନ୍ତ୍ରରେ ଫସିଥିବା ସେଜଲ୍ ଏବେ ଦ୍ଵନ୍ଦ୍ଵରେ ରହିଛନ୍ତି । ଜିଲ୍ଲା ପ୍ରଶାସନ କାଉନସେଲିଂ ଜାରି ରଖିଥିବା ବେଳେ ସେଜଲ୍ ଆଗକୁ କ’ଣ କରିବ ?
ନିଜର ପିତାମାତାଙ୍କୁ ପର କରି ଆସିଥିବା ଏହି ଝିଅ ଏବେ କଣ କରିବ | ଓଡ଼ିଶାରେ ରହିବ ନା ନିର୍ଯାତନାର ମିଛ କଳଙ୍କ ବୋଳି ଆମେରିକାରୁ ଚାଲି ଆସିଥିବା ପିତାମାତାଙ୍କ ପାଖକୁ ଫେରିବ ? ଏଭଳି ଅନେକ ପ୍ରଶ୍ନ ଏବେ ସେଜଲ୍ ଜୋନ୍ ଓରଫ ପୂଜାକୁ ବିବ୍ରତ କରିବାରେ ଲାଗିଛି । ସେପଟେ ସେଜଲ୍ଙ୍କ ପୁରୁଷ ବନ୍ଧୁ ଅମରଙ୍କୁ ଶୁକ୍ରବାର ପୋଲିସ ଉଠାଇ ନେଇଥିବା ବେଳେ ଅଣ୍ଡରଟେକିଂ ରଖି ତାକୁ ଛାଡ଼଼ି ଦେଇଛି ।
ଦିନ ଗଡ଼ିବା ସହିତ ପୂଜା-ଅମରଙ୍କ କାହାଣୀ ଏବେ ନୂଆ ମୋଡ଼ ମଧ୍ୟ ନେଉଛି । ଆମେରିକାରେ ନିର୍ଯାତନାର ମିଛ, ଓଡ଼ିଶା ପହଞ୍ଚିବା ପରେ ଅମରଙ୍କୁ ପ୍ରେମ କାହାଣୀ ଏ ସବୁ ଭିତରେ ସେଜଲ୍ ଜୀବନର ଦୋଛକିରେ ଠିଆ ହୋଇଛି। ଘର ଗଢ଼ିବାକୁ ଘର ଛାଡ଼ିଥିବା ସେଜଲ୍ କିନ୍ତୁ କାହାକୁ ଜଣାଥିଲା କି ସେ ପ୍ରତାରଣାର ଶିକାର ହୋଇଯିବେ | ଏହି ସବୁ ଭିତରେ ସେଜଲ୍ଙ୍କର କାଉନସେଲିଂ ଜାରି ରଖିଛି ପ୍ରଶାସନ ।
ଘଟଣାରେ ପ୍ରତିକ୍ରିୟା ରଖି ବାଲେଶ୍ଵର ଜିଲ୍ଲାପାଳ ସୂର୍ଯ୍ୟବଂଶୀ ମୟୂର ବିକାଶ କହିଛନ୍ତି, “ସେଜ୍ଲର କାଉନସେଲିଂ ଚାଲିଛି । ଜନ୍ମ ତାରିଖ, ବୟସ ଓ ପରିଚୟ ପତ୍ରର ଯାଞ୍ଚ ହେଉଛି । ଜିଲ୍ଲା ପ୍ରଶାସନ ଓ ରାଜ୍ୟ ସରକାରଙ୍କ ବିଭାଗ ସହିତ ଆଲୋଚନା କରୁଛୁ । କାଉନସେଲିଂ ପରେ ପରବର୍ତ୍ତୀ ପଦକ୍ଷେପ ନିଆଯିବ ।
ଆମେରିକାରୁ ଫେରିବା ପରେ ବାଲେଶ୍ଵର ନାରୀ ଶକ୍ତି ଗୃହରେ ଅଛି ସେଜଲ୍ । ଗତ ଶୁକ୍ରବାର ଦିନ ସେଜଲ୍ଙ୍କ କାଉନସେଲିଂ ସମୟରେ ପ୍ରେମିକ ଅମର ତାଙ୍କୁ ଦେଖାକରିବାକୁ ଆସିଥିଲା। ସେଠାରୁ ଅମରକୁ ସହଦେବଖୁଣ୍ଟା ଥାନା ପୋଲିସ ଉଠାଇ ନେବାବେଳେ କୋଟିଏ ଟଙ୍କା ଦାବିର କଥା ଆସିଥିଲା । ପୋଲିସ ଅମରର ମୋବାଇଲ୍ ଜବତ କରିବା ସହ ସେକ୍ସନ ୪୧ ଆଧାରରେ ଅଣ୍ଡରଟେକିଂ ନେଇ ଅମରକୁ ଛାଡ଼ି ଦେଇଛି । ତଦନ୍ତର ଆବଶ୍ୟକତା ଅନୁସାରେ ଥାନାକୁ ଆସିବାକୁ ନୋଟିସ୍ ଦିଆଯାଇଛି ।
ନାରୀ ସଦନରେ ସେଜଲ୍ରେ ଏ ପଯ୍ୟନ୍ତ କାଉନସେଲିଂ ଚାଲିରହିଛି | ସେଜଲ୍ଙ୍କ ଅବସ୍ଥାରେ ସୁଧାର ଆସିଛି ବୋଲି ନାରୀ ସଂଘ ସଭାପତି ଗୋପାମୁଦ୍ରା ମହାପାତ୍ର କହିଛନ୍ତି । ସେ କହିଛନ୍ତି ଯେ, “ଭାରତ ଆସିବା ପାଇଁ ଗୋଟିଏ ଠିକଣାର ଆବଶ୍ୟକତା ଥିଲା । ସେଥିପାଇଁ ସେଜଲ୍ ଅମରର ସାହାଯ୍ୟ ନେଇଥିଲା । ଏବେ ସେଜଲ୍ ଯେମିତି ନିଜ ଗୋଡ଼ରେ ନିଜେ ଛିଡ଼ା ହେବ, ନିଜର ପରିଚୟ ତିଆରି କରିପାରିବ ସେନେଇ ପ୍ରୟାସ କରାଯାଉଛି । ଯେ ପର୍ଯ୍ୟନ୍ତ ସେ ସ୍ଵାବଲମ୍ବୀ ହୋଇନାହିଁ, ସେ ଯାଏଁ ନାରୀ ଶକ୍ତି ସଦନରେ ସୁରକ୍ଷିତରେ ରହିବ ।”
