ବିଜେଡିକୁ ଛାଡି ବିଜେପିରେ ଯୋଗଦେବେ ୩ ବ୍ଲକ ଅଧ୍ୟକ୍ଷ ; ସୂଚନା ଦେଲେ ବିଜେପି ରାଜ୍ୟ ସଭାପତି ମନମୋହନ ସାମଲ
ଭୁବନେଶ୍ୱର ;୩୦|୧୧: ବିଜେପିରେ ସାମିଲ ହୋଇପାରନ୍ତି ଆଉ ୩ ବ୍ଲକ୍ ଅଧ୍ୟକ୍ଷ | ବିଜେଡି ଛାଡ଼ିଥିବା ଭଦ୍ରକର ୩ ଜଣ ବ୍ଲକ୍ ଅଧ୍ୟକ୍ଷ ଧରିପାରନ୍ତି ପଦ୍ମ। ଏହାକୁ ନେଇ କହିଛନ୍ତି ବିଜେପି ରାଜ୍ୟ ସଭାପତି ମନମୋହନ ସାମଲ । ସେ କହିଛନ୍ତି ଯେ , କିଛି ଦିନ ପୂର୍ବରୁ ଭଦ୍ରକର ୩ ଜଣ ବ୍ଲକ୍ ଅଧ୍ୟକ୍ଷ ତାଙ୍କୁ ଆସି ଦେଖା କରିଥିଲେ। ସେମାନେ ବିଜେଡି ଛାଡ଼ିବେ ବୋଲି କହିଥିଲେ । ସେହିପରି ରାଜ୍ୟ ବିଜେପି ସଭାପତି ମନମୋହନ ସାମଲ ଆହୁରି ମଧ୍ୟ କହିଛନ୍ତି ଯେ , ନଦୀ ଆସି ସମୁଦ୍ରରେ ମିଶେ । ଲୋକଙ୍କୁ ଯୋଡ଼ି ଯୋଡ଼ି ବିଜେପି ଆଜି ଏହି ସ୍ଥାନରେ ପହଞ୍ଚିଛି । ଆମେ କାହା ଦଳ ଭାଙ୍ଗୁନୁ । ଆମ ସହ ଯୋଡ଼ି ହେବାକୁ ଚାହିଁଲେ ଦଳକୁ ଆସିପାରିବେ । ଯେଉଁମାନେ ଦଳ ପାଇଁ ଉପଯୁକ୍ତ ସେମାନଙ୍କୁ ଆମେ ଦଳରେ ସାମିଲ କରିବୁ |
ସୂଚନା ମୁତାବକ , ଭଦ୍ରକ ଜିଲ୍ଲାରେ ଭୁଶୁଡ଼ିଲା ବିଜେଡି ଦଳ। ଶଙ୍ଖ ଦଳ ଉପରେ ପଡିଲା ବଡ ଚଡକ। ଏକାଥରେ ଛାଡିଲେ ବିଜେଡିକୁ ଛାଡିଲେ ତିନି ବ୍ଲକ୍ ଅଧ୍ୟକ୍ଷ । ଶନିବାର ବନ୍ତ ବ୍ଲକ୍ ଅଧ୍ୟକ୍ଷ ମନୋରଞ୍ଜନ ଘଡ଼େଇ, ଭଦ୍ରକ ବ୍ଲକ ଅଧ୍ୟକ୍ଷା ଉର୍ମିଳା ନାୟକ ଓ ଭଣ୍ଡାରିପୋଖରୀ ବ୍ଲକ୍ ଅଧ୍ୟକ୍ଷା ସୁମତୀ ସେଠୀ ବିଜେଡିରୁ ଇସ୍ତଫା ଦେଇଛନ୍ତି। ରୋଚକ କଥା ହେଲା ସମସ୍ତେ ବ୍ୟକ୍ତିଗତ କାରଣ ଦର୍ଶାଇ ଗୋଟିଏ ଦିନରେ ଦଳର ପ୍ରାଥମିକ ସଦସ୍ୟ ପଦରୁ ଇସ୍ତଫା ଦେଇଛନ୍ତି ।
ପ୍ରଥମେ ବନ୍ତ ବ୍ଲକ ଅଧ୍ୟକ୍ଷ ଇସ୍ତଫା ଦେଇଥିବା ବେଳେ ତାଙ୍କ ପରେ ପରେ ଉର୍ମିଳା ନାୟକ ଓ ସୁମତୀ ସେଠୀ ଦଳ ଛାଡ଼ିଥିଲେ। ଗୋଟିଏ ଦିନ ମଧ୍ୟରେ ତିନି ବ୍ଲକ ଅଧ୍ୟକ୍ଷ ବିଜେଡିରୁ ଇସ୍ତଫା ଦେବାପରେ ଭଦ୍ରକ ରାଜନୀତି ସରଗରମ ହୋଇଛି । ଖୁବଶୀଘ୍ର ତିନି ବ୍ଲକ ଅଧ୍ୟକ୍ଷ ବିଜେପିରେ ସାମିଲ ହୋଇପାରନ୍ତି ବୋଲି ଚର୍ଚ୍ଚା ହେଉଛି ।
