ହେମନ୍ତ କୁମାର ବେହେରା27/05/2023 at 8:07 PM
ଖଡ଼ିଆଳ : ସରକାର ସୁଶାସନ ସହ ସମସ୍ତ ଜନ ସାଧାରଣଙ୍କ ଉନ୍ନତି ସକାଶେ ବିଭିନ୍ନ ଯୋଜନା ମାଧ୍ୟମରେ କୋଟିକୋଟି ଟଙ୍କା ବ୍ୟୟ ବରାଦ କରୁଛନ୍ତି ଏବଂ ଏହାର ସଦ ବିନିଯୋଗ କରି କାର୍ଯ୍ୟକାରୀ କରିବା ପାଇଁ ସରକାରୀ ଅଧିକାରୀ ମାନେ ନିୟୋଜିତ କରିଛନ୍ତି । ହେଲେ କିଛି ଅଧିକାରୀ ମାନଙ୍କ ଲାଭଖୋର ନୀତି ଓ ପିସି ପାଇବା ଆଶାରେ ସରକାରୀ ଟଙ୍କା କୁ ସଦବିନିଯୋଗ ନହୋଇ ସରକାର କା ମାଲ ଦରିଆ ମେ ଡାଲ ସଦୃଶ ହେଉଥିବା ଅଭିଯୋଗ ହୋଇଛି । ଏପରି ଏକ ଘଟଣା ସାମ୍ନାକୁ ଆସିଛି ଜିଲାର ଖଡ଼ିଆଳ ବ୍ଲକ କାର୍ଯ୍ୟାଳୟ ପରିସରରୁ । ସୂଚନା ଅନୁସାରେ ଖଡ଼ିଆଳ ବ୍ଲକ କାର୍ଯ୍ୟାଳୟ ଏକ ବେସରକାରୀ ଜମିରେ ଅବସ୍ଥିତ ଏବଂ ଯେକୌଣସି ସମୟରେ ମଧ୍ୟ ଉକ୍ତ ଜମିଟି ସେହି ନିର୍ଦ୍ଦିଷ୍ଟ ବ୍ୟକ୍ତିଙ୍କ ହାତକୁ ଯାଇପାରେ । ଏପରି ସ୍ଥଳେ ଲକ୍ଷ ଲକ୍ଷ ଟଙ୍କା ସରକାରୀ ଅନୁଦାନ କାହା ସ୍ଵାର୍ଥ ରେ ଖର୍ଚ୍ଚ ହୋଇଛି ତାହା ପ୍ରଶ୍ନବାଚୀ ସୃଷ୍ଟି କରିଛି । ଖଡ଼ିଆଳ ବ୍ଲକ ପରିସର ରେ ୨୦-୨୧, ୨୧-୨୨, ୨୨-୨୩ ଆର୍ଥିକ ବର୍ଷ ର ବିଭିନ୍ନ ଯୋଜନା ମାଧ୍ୟମରେ ଆଇସିଡିଏସ କାର୍ଯ୍ୟାଳୟର ମରାମତି ଓ ପୁନରୁଦ୍ଧାର, ଖଡ଼ିଆଳ ବ୍ଲକ ଅଧ୍ୟକ୍ଷ ଓ ଉପାଧ୍ୟକ୍ଷଙ୍କ କାର୍ଯ୍ୟାଳୟ ମରାମତି ଓ ପୁନରୁଦ୍ଧାର, ଗ୍ରାମ ପଞ୍ଚାୟତ ଶାଖା କାର୍ଯ୍ୟାଳୟର ମରାମତି ନାଁରେ ଲକ୍ଷଲକ୍ଷ୍ ଟଙ୍କା ଖର୍ଚ୍ଚ ହୋଇଥିବା କାନ୍ଥ ବାଡ଼ରେ ସୂଚନା ଦିଆଯାଇଛି । କାନ୍ଥବାଡ଼ରେ ସୂଚନା ଦିଆଯାଇଛି ସତ ହେଲେ କାର୍ଯ୍ୟ କେଉଁ ପାଖରେ ହୋଇଛି ତାହା ଦୃଶ୍ୟପଟ ହେଉନାହିଁ । ବ୍ଲକ ପରିସରରେ ଥିବା କୋଠା ବିଭିନ୍ନ କୋଠା ମାନଙ୍କରେ ରଙ୍ଗ ଦିଆଯାଇଛି ସତ ହେଲେ ରଙ୍ଗ ଦେବାରେ ଏତେ ଖର୍ଚ୍ଚ ସହଜେ ବିଶ୍ୱାସ ହେଉନାହିଁ । ଉକ୍ତକାର୍ଯ୍ୟ କରି କେବଳ ଠିକାଦାର ଓ ସରକାରୀ ଅଧିକାରୀ ମାଲେମାଲ ହୋଇଥିବା ବେଳେ ଏହାକୁ ନେଇ ଜନ ସାଧାରଣଙ୍କ ମଧ୍ୟରେ ତୀବ୍ର ପ୍ରତିକ୍ରିୟା ଦେଖିବାକୁ ମିଳିଛି । ଖଡ଼ିଆଳ ବ୍ଲକ ପରିସର ମଧ୍ୟରେ ହୋଇଥିବା କାର୍ଯ୍ୟ ଗୁଡିକ ଅନ୍ଧକୁ ଦର୍ପଣ ଦେଖା ସଦୃଶ ହୋଇଥିବା ବୁଦ୍ଧିଜୀବୀ ମାନେ କହିଛନ୍ତି । ଏହି କାର୍ଯ୍ୟ ବାବଦକୁ ଜୈନେକ ବ୍ୟକ୍ତି ସୂଚନା ଅଧିକାର ଆଇନ ଅନୁଯାୟୀ ସୂଚନା ମାଗିଥିବା ବେଳେ ବର୍ତ୍ତମାନ ଯାଏ ସୁଚନା ମିଳି ପାରିନାହିଁ । ସୂଚନା ହସ୍ତଗତ ହେବା ପରେ ସତ୍ୟାସତ୍ୟ ପଦାକୁ ଆସିବ ବୋଲି ସୂଚନା ଅଧିକାର କର୍ମୀ କହିଛନ୍ତି । ଅନ୍ୟପଟେ ଖାଲି ଆଖିରେ ଯେକୌଣସି ବ୍ୟକ୍ତି ଉକ୍ତ କାର୍ଯ୍ୟକୁ ଦେଖିଲେ ଜାଣି ପାରିବେ ଯେ ପ୍ରକୃତ ସତ କଣ ଓ କେଉଁ ରଙ୍ଗ ଦାମ ଏତେ ଯେ ପନ୍ଦର ରୁ କୋଡିଏ ଲକ୍ଷ ଟଙ୍କା ଖର୍ଚ୍ଚ ହେଲା ତାହା ସହଜ ଅନୁମେୟ । ଏବାବଦ ରେ ବ୍ଲକ ପ୍ରଶାସନ ପକ୍ଷରୁ କୌଣସି ପ୍ରତିକ୍ରିୟା ମିଳି ପାରି ନଥିବା ବେଳେ ନୂଆପଡା ଜିଲ୍ଲାପାଳ ଏଥି ପ୍ରତି ଦୃଷ୍ଟି ଦେଇ କାହା ସ୍ୱାର୍ଥ ରେ ସରକାରୀ ଟଙ୍କା ର ଅପବ୍ୟବହାର ହୋଇଛି ତାହା ଜନସାଧାରଣ ଙ୍କୁ ଜଣେଇବା ସହ ଦୋଷୀ ମାନଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ ନେବା ପାଇଁ ଖଡ଼ିଆଳ ଅଞ୍ଚଳବାସୀ ଦାବି କରିଛନ୍ତି । ନଚେତ ଆଗାମୀ ଦିନରେ ଏହି ଦୁର୍ନୀତି ବିରୁଦ୍ଧରେ ଆନ୍ଦୋଳନ ହେବ ବୋଲି ବିଭିନ୍ନ ସଂଗଠନ ଚେତାବନୀ ଦେଇଛି।