ରାଜନୀତିରେ କଡ଼ା ନିୟମ: ଦଳବଦଳ କଲେ ମିଳିବନି ଭତ୍ତା!
ହିମାଚଳ ପ୍ରଦେଶ, ୨/୪: ରାଜନୀତି ମଞ୍ଚରେ ବଡ ପରିବର୍ତ୍ତନ ଆସିବାକୁ ଯାଉଛି । ହିମାଚଳ ପ୍ରଦେଶର ମୁଖ୍ୟମନ୍ତ୍ରୀ ସୁଖବିନ୍ଦର ସିଂହ ସୁଖୁଙ୍କ ନେତୃତ୍ୱରେ ସରକାର ବିଧାନସଭାରେ ଏକ ନୂଆ ସଂଶୋଧନ ବିଲ୍ ପ୍ରସ୍ତୁତ କରିଛନ୍ତି । ଯାହା ଅନୁସାରେ ଦଳବଦଳ କରି ଅଯୋଗ୍ୟ ଘୋଷିତ ହେଉଥିବା ବିଧାୟକମାନେ ଆଉ ପେନସନ୍ କିମ୍ବା ଭତ୍ତା ପାଇବେ ନାହିଁ । ଏହି ବିଲ୍ ସଂବିଧାନର ୧୦ମ ତାଲିକା ଅନୁସାରେ ଦଳବଦଳ ଆଇନକୁ କଠୋର କରିବା ଉଦ୍ଦେଶ୍ୟରେ ଆଣାଯାଇଛି ।ସରକାର କହିଛନ୍ତି, ଏପର୍ଯ୍ୟନ୍ତ ବିଧାୟକମାନେ ଦଳ ବଦଳ କରିଲେ ମଧ୍ୟ ପେନସନ୍ ଲାଭ ପାଉଥିଲେ, ଯାହା ଲୋକତନ୍ତ୍ର ପାଇଁ ଠିକ୍ ସନ୍ଦେଶ ନୁହେଁ । ଏହି ନୂଆ ନିୟମ ଆସିଲେ, ୧୪ତମ ବିଧାନସଭା ଓ ତାହା ପରେ ନିର୍ବାଚିତ ହୋଇଥିବା ଯେକୌଣସି ବିଧାୟକ ଯଦି ଦଳବଦଳ କାରଣରୁ ଅଯୋଗ୍ୟ ଘୋଷିତ ହେବେ, ସେମାନେ ପେନସନ୍ ପାଇବାର ଅଧିକାର ହରାଇବେ । ସରକାରଙ୍କ ମତରେ, ଏହା ଦଳବଦଳକୁ ରୋକିବା ସହିତ ଲୋକମାନଙ୍କ ଭୋଟ୍ କୁ ସୁରକ୍ଷିତ କରିବ ।ଏହି ପଦକ୍ଷେପ ପଛରେ ରାଜନୈତିକ ପରିପ୍ରେକ୍ଷ୍ୟ ମଧ୍ୟ ରହିଛି । ୨୦୨୪ରେ କିଛି ବିଧାୟକ ଦଳ ବଦଳ କରିବା ଓ କ୍ରସ୍ ଭୋଟିଂ ଘଟଣା ପରେ ସରକାରଙ୍କ ଉପରେ ଚାପ ବଢ଼ିଥିଲା । ଏହି ବିଲ୍ ଦ୍ୱାରା ସରକାର ସ୍ପଷ୍ଟ ସନ୍ଦେଶ ଦେବାକୁ ଚାହୁଁଛି ଯେ, ରାଜନୀତିରେ “ପଦ ପାଇଁ ଦଳ ବଦଳ” କରିଲେ ଏବେ ତାହାର ଆର୍ଥିକ ମୂଲ୍ୟ ଦେବାକୁ ପଡ଼ିବ । ଆଗାମୀ ନିର୍ବାଚନକୁ ଦୃଷ୍ଟିରେ ରଖି ଏକ ରଣନୀତିମୂଳକ ଚାଲ୍ ଭାବେ ଦେଖାଯାଉଛି ।ଏହି ବିଲ୍ କେବଳ ପେନସନ୍ ବନ୍ଦ କରିବା ନୁହେଁ, ବରଂ ରାଜନୀତିରେ ଶୃଙ୍ଖଳା ଆଣିବା ପାଇଁ ଏକ ମହତ୍ୱପୂର୍ଣ୍ଣ ପ୍ରୟାସ । ଯଦି ଏହା କାର୍ଯ୍ୟକାରୀ ହୁଏ, ତେବେ ଆଗାମୀ ଦିନରେ ଦଳବଦଳ ରାଜନୀତିରେ ବଡ ପରିବର୍ତ୍ତନ ଆସିପାରେ ବୋଲି ଆଶା କରାଯାଉଛି ।
