୧୬୭ କୋଟିରେ ବିକ୍ରି ହେଲା ‘ଯଶୋଦା ଓ କୃଷ୍ଣ’ ପେଣ୍ଟିଂ!
ନୂଆ ଦିଲ୍ଲୀ, ୩/୪: ପ୍ରସିଦ୍ଧ ଭାରତୀୟ ଚିତ୍ରଶିଳ୍ପୀ ରାଜା ରବି ବର୍ମାଙ୍କ ଅମୂଲ୍ୟ ପେଣ୍ଟିଂ ‘ଯଶୋଦା ଏବଂ କୃଷ୍ଣ’ ବର୍ତ୍ତମାନ ସମୟରେ ଏକ ଇତିହାସ ସୃଷ୍ଟି କରିଛି । ଏହି ଚିତ୍ରଟି ମୁମ୍ବାଇରେ ସ୍ଫଫ୍ରୋଣର୍ଟ ଦ୍ୱାରା ଆୟୋଜିତ ଅକ୍ସନରେ ପ୍ରାୟ ୧୬୭.୨୦ କୋଟି ଟଙ୍କାରେ ବିକ୍ରି ହୋଇଛି । ଏହା ଏପର୍ଯ୍ୟନ୍ତରେ ସବୁଠାରୁ ମୂଲ୍ୟବାନ ଭାରତୀୟ କଳାକୃତି ଭାବେ ନୂଆ ରେକର୍ଡ ସୃଷ୍ଟି କରିଛି । ଏହି ଚିତ୍ରଟି ୧୮୯୦ ଦଶକରେ ରଚିତ, ଯେତେବେଳେ ରବି ବର୍ମା ତାଙ୍କ କଳାଜୀବନର ଶୀର୍ଷରେ ଥିଲେ । ଏଥିରେ ମାତୃ ସ୍ନେହର ସୁନ୍ଦର ସମ୍ପର୍କ ଅର୍ଥାତ, ମା’ ଯଶୋଦା ଓ ଶିଶୁ କୃଷ୍ଣଙ୍କ ମଧ୍ୟରେ ଥିବା ଭାବନାତ୍ମକ ସମ୍ପର୍କକୁ ଆଲୋକିତ କରି ଦର୍ଶାଯାଇଛି ।
ଏହି ପେଣ୍ଟିଂଟିକୁ ପ୍ରସିଦ୍ଧ ଉଦ୍ୟୋଗପତି ସେରୁଷ ଏସ୍ . ପୂନେଵାଲା କ୍ରୟ କରିଛନ୍ତି । ଅକ୍ସନ ସମୟରେ ବଡ ଧରଣର ବିଡିଂ ହୋଇଥିବାରୁ ଏହାର ଦାମ ଅନୁମାନିତ ମୂଲ୍ୟ (୮୦–୧୨୦ କୋଟି) ଠାରୁ ଦୁଇଗୁଣା ବଢ଼ି ଯାଇଥିଲା । ଏହି ବିକ୍ରି ପୂର୍ବରୁ ଭାରତୀୟ କଳାଜଗତର ସବୁଠାରୁ ମହଙ୍ଗା ଚିତ୍ରର ରେକର୍ଡ ଏମଏଫ ହୁସେନଙ୍କ ଏକ କଳାକୃତି ଥିଲା, କିନ୍ତୁ ବର୍ତ୍ତମାନ ରାଜା ରବି ବର୍ମାଙ୍କ ଏହି ପେଣ୍ଟିଂ ସେହି ରେକର୍ଡକୁ ଅତିକ୍ରମ କରି ନୂତନ ଇତିହାସ ରଚିଛି । ବିଶେଷଜ୍ଞମାନଙ୍କ ମତାନୁସାରେ, ଏହି ବିକ୍ରି ଭାରତୀୟ କଳାର ଆନ୍ତର୍ଜାତୀୟ ମାନ୍ୟତା ଓ ମୂଲ୍ୟକୁ ଆହୁରି ବଢ଼ାଇବାରେ ସହାୟକ ହେବ ।
