କୂଅରେ ଖସି ପଡିଲା କାର : ୯ ଜଣଙ୍କ ମୃତ୍ୟୁ
ମହାରାଷ୍ଟ୍ରର, ୪/୪: ମହାରାଷ୍ଟ୍ରର ନାସିକ ଜିଲ୍ଲାରେ ଗୋଟିଏ ଦୁଃଖଦ ଦୁର୍ଘଟଣା ଘଟିଛି । ନାସିକ ଜିଲ୍ଲାର ଡିଣ୍ଡୋରି ନାମକ ଅଞ୍ଚଳରେ ଗୋଟିଏ କାର କୂଅରେ ପଡିଯାଇଥିବାରୁ ୯ ଜଣଙ୍କର ମୃତ୍ୟୁ ଘଟିଛି । ସୂଚନା ଅନୁସାରେ, ଗତକାଲି ରାତି ପ୍ରାୟ ୧୦ଟା ସମୟରେ ଦରଗୁଡେ ପରିବାରର ସଦସ୍ୟମାନେ ଗୋଟିଏ କାର୍ଯ୍ୟକ୍ରମରୁ ଘରକୁ ଫେରୁଥିଲେ । ଏହି ସମୟରେ ଡ୍ରାଇଭର ହଠାତ୍ ଗାଡ଼ିର ନିୟନ୍ତ୍ରଣ ହରାଇଦେଇଥିଲେ । ଫଳରେ କାରଟି ସିଧାସଳଖ କୂଅରେ ପଡିଯାଇଥିଲା । ଏହି ଦୁର୍ଘଟଣାରେ ସମସ୍ତେ ଏକ ପରିବାରର ଥିବା କୁହାଯାଇଛି । ମୃତକମାନଙ୍କ ମଧ୍ୟରେ ୬ ଜଣ ଶିଶୁ ଅଛନ୍ତି, ଯାହା ଘଟଣାକୁ ଆହୁରି ଅତ୍ୟଧିକ ଦୁଃଖଦ କରିଦେଇଛି ।
ଘଟଣା ସମ୍ପର୍କରେ ଖବର ପାଇ ପୋଲିସ ଓ ଉଦ୍ଧାର ଦଳ ଦୁର୍ଘଟଣା ସ୍ଥଳରେ ପହଞ୍ଚିଥିଲେ । ଦୁଇଟି କ୍ରେନ୍ ଓ ପହଁରାଳିମାନଙ୍କ ସାହାଯ୍ୟରେ ରାତି ପ୍ରାୟ ୧୨ଟା ବାଜି ୧୫ମିନିଟରେ କାର ଓ ଲୋକମାନଙ୍କୁ ଉଦ୍ଧାର କରାଯାଇଥିଲା । ବର୍ତ୍ତମାନ ପୋଲିସ ଏହି ଘଟଣାର ତଦନ୍ତ ଜାରି ରଖିଛି । ଏହି ଦୁର୍ଘଟଣା ପରେ ସ୍ଥାନୀୟ ଅଞ୍ଚଳରେ ଶୋକର ପରିବେଶ ଦେଖାଦେଇଛି ।
