ନିଟ୍ ପେପର ଲିକ୍ ଘଟଣା ପରେ ଜୀବନ ହାରିଲେ ନିଟ୍ ଛାତ୍ର
NEET-UG ୨୦୨୬ ପରୀକ୍ଷାର ପେପର ଲିକ୍ ବିବାଦ ଏବଂ ପରୀକ୍ଷା ବାତିଲ ହେବାର ଚାପ ମଧ୍ୟରେ ରାଜସ୍ଥାନର ସିକରରେ ଜଣେ ୨୨ ବର୍ଷୀୟ NEET ଆଶାୟୀ ଛାତ୍ରଙ୍କ ଆତ୍ମହତ୍ୟା ଘଟଣା ସମ୍ମୁଖକୁ ଆସିଛି। ମୃତ ଛାତ୍ର ହେଲେ ପ୍ରଦୀପ ମେଘୱାଲ, ଯିଏକି ରାଜସ୍ଥାନର ଝୁନଝୁନୁ ଜିଲ୍ଲାର ବାସିନ୍ଦା ଥିଲେ। ସେ ଗତ ତିନି ବର୍ଷ ଧରି NEET ପରୀକ୍ଷା ପାଇଁ ପ୍ରସ୍ତୁତି କରୁଥିଲେ।
ପୋଲିସ ସୂଚନା ଅନୁସାରେ, ପ୍ରଦୀପ ତାଙ୍କ ଦୁଇ ଭଉଣୀଙ୍କ ସହ ସିକରର ଜଳଧାରୀ ନଗର ଅଞ୍ଚଳରେ ଏକ ଭଡା ଘରରେ ରହୁଥିଲେ। ଘଟଣା ଦିନ ସେ ଘରେ ଏକା ଥିବାବେଳେ ଏପରି ଚରମ ପଦକ୍ଷେପ ନେଇଥିବା କୁହାଯାଉଛି। ସେତେବେଳେ ଜଣେ ଭଉଣୀ କୋଚିଂ କ୍ଲାସକୁ ଯାଇଥିବାବେଳେ ଅନ୍ୟ ଜଣେ ବାଥରୁମରେ ଥିଲେ। ଏହି ସମୟରେ ପ୍ରଦୀପ ତାଙ୍କ ଭଉଣୀଙ୍କ ସ୍କାର୍ଫ ବ୍ୟବହାର କରି ସିଲିଂ ଫ୍ୟାନରେ ଝୁଲିପଡ଼ିଥିଲେ। ପରେ ତାଙ୍କ ଭଉଣୀ ଦେଖି ଘରମାଲିକ ଓ ପୋଲିସକୁ ଖବର ଦେଇଥିଲେ।
ପରିବାର ଲୋକଙ୍କ କହିବା ଅନୁସାରେ, ପ୍ରଦୀପ ଏଥର NEET ପରୀକ୍ଷାରେ ଭଲ ରାଙ୍କ ଆଣିବେ ବୋଲି ସେମାନଙ୍କ ଆଶା ଥିଲା। ସେ ପ୍ରାୟ ୬୫୦ ମାର୍କ ପାଇପାରନ୍ତି ବୋଲି ପରିବାର ଭାବୁଥିଲେ। କିନ୍ତୁ ପେପର ଲିକ୍ ଏବଂ ପରୀକ୍ଷା ବାତିଲ ହେବାର ଖବର ପରେ ସେ ମାନସିକ ଭାବେ ଭାଙ୍ଗି ପଡ଼ିଥିଲେ।
ପ୍ରଦୀପଙ୍କ ପରିବାର ଆର୍ଥିକ ଭାବେ ଦୁର୍ବଳ ଥିଲେ ମଧ୍ୟ ତାଙ୍କ ଶିକ୍ଷା ପାଇଁ ଲକ୍ଷାଧିକ ଟଙ୍କା ଖର୍ଚ୍ଚ କରିଥିଲେ। ତାଙ୍କ ବାପା ଦିନମଜୁରିଆ ଭାବେ କାମ କରୁଥିବାବେଳେ, ପରିବାର ପ୍ରଦୀପଙ୍କ ପଢ଼ା ପାଇଁ ପ୍ରାୟ ୮ରୁ ୧୦ ଲକ୍ଷ ଟଙ୍କା ଖର୍ଚ୍ଚ କରିଥିବା କୁହାଯାଇଛି। ସମ୍ପର୍କୀୟଙ୍କ ଅନୁସାରେ, ତାଙ୍କୁ ଡାକ୍ତର କରିବା ସ୍ୱପ୍ନ ପୂରଣ ପାଇଁ ପରିବାର ଜମି ପର୍ଯ୍ୟନ୍ତ ବିକ୍ରି କରିଦେଇଥିଲେ।
ଉଲ୍ଲେଖଯୋଗ୍ୟ, ପେପର ଲିକ୍ ଅଭିଯୋଗ ପରେ NTA NEET-UG ୨୦୨୬ ପରୀକ୍ଷାକୁ ବାତିଲ କରିଛି। ଏହି ଘଟଣାର ତଦନ୍ତ ବର୍ତ୍ତମାନ CBI କରୁଛି। ଜୁନ୍ ୨୧ରେ ପୁନଃ ପରୀକ୍ଷା ଆୟୋଜନ ହେବ ବୋଲି ଘୋଷଣା କରାଯାଇଛି। ମେ ୩ରେ ହୋଇଥିବା ଏହି ପରୀକ୍ଷାରେ ପ୍ରାୟ ୨୨ ଲକ୍ଷ ଛାତ୍ରଛାତ୍ରୀ ଅଂଶଗ୍ରହଣ କରିଥିଲେ। ପେପର ଲିକ୍ ମାମଲାରେ ରାଜସ୍ଥାନରେ ୪୫ରୁ ଅଧିକ ଲୋକଙ୍କୁ ଅଟକ ରଖାଯାଇଥିବା ସୂଚନା ମିଳିଛି।
