ବିଷଧର ସାପର କବଳରେ ୨ ଘଣ୍ଟା: ପକ୍ଷାଘାତଗ୍ରସ୍ତ ବୃଦ୍ଧଙ୍କୁ ଉଦ୍ଧାର କଲେ ପରିବାର
ବୌଦ୍ଧ ଜିଲ୍ଲାର ହରଭଙ୍ଗା ବ୍ଲକ ଅଡେନିଗଡ଼ ଗାଁରେ ଏକ ଅଭାବନୀୟ ଘଟଣା ଘଟିଛି। ପକ୍ଷାଘାତଗ୍ରସ୍ତ ବୃଦ୍ଧ କୃଷ୍ଣ ଚନ୍ଦ୍ର ସାହୁଙ୍କୁ ଏକ ବିଷଧର ସାପ ଗୁଡ଼ାଇ ଧରିଥିବାରୁ ସେ ପ୍ରାୟ ଦୁଇ ଘଣ୍ଟା ଧରି ଅସହାୟ ଅବସ୍ଥାରେ ଅଟକି ରହିଥିଲେ। ଘଟଣାଟି ସ୍ଥାନୀୟ ଅଞ୍ଚଳରେ ଚର୍ଚ୍ଚାର ବିଷୟ ପାଲଟିଛି।
ସୂଚନା ଅନୁସାରେ, ଗତକାଲି ରାତିରେ ଖୋଲା ଝରକା ଦେଇ ଏକ ବିଷଧର ସାପ ଘର ଭିତରକୁ ପଶି ଆସିଥିଲା। ଶୋଇଥିବା କୃଷ୍ଣ ଚନ୍ଦ୍ର ସାହୁଙ୍କ ଶରୀର ଉପରକୁ ସାପଟି ଚଢ଼ି ଯାଇଥିଲା। ନିଦ ଭାଙ୍ଗିବା ପରେ ସେ ହଟିବାକୁ ଚେଷ୍ଟା କରିଥିଲେ, ମାତ୍ର ପକ୍ଷାଘାତ ଯୋଗୁଁ ସମର୍ଥ ହୋଇନଥିଲେ। ଏହି ସମୟରେ ସାପଟି ତାଙ୍କ ହାତ ଓ ଚୌକିକୁ ଗୁଡ଼ାଇ ଧରିଥିଲା।
ଘଟଣା ଦେଖି ପରିବାର ଲୋକେ ଭୟଭୀତ ହୋଇପଡ଼ିଥିଲେ ମଧ୍ୟ ଧୈର୍ଯ୍ୟ ହରାଇ ନଥିଲେ। ପ୍ରାୟ ଦୁଇ ଘଣ୍ଟାର ଉଦ୍ୟମ ପରେ ସେମାନେ ସୁରକ୍ଷିତ ଭାବେ ବୃଦ୍ଧଙ୍କୁ ସାପ କବଳରୁ ମୁକ୍ତ କରିଥିଲେ। ଭାଗ୍ୟବଶତଃ ସାପଟି କାହାକୁ କାମୁଡ଼ି ନଥିଲା। ପରେ ସାପକୁ ଧରି ସୁରକ୍ଷିତ ଭାବେ ଘର ବାହାରେ ଛାଡ଼ି ଦିଆଯାଇଥିଲା। ବର୍ତ୍ତମାନ କୃଷ୍ଣ ଚନ୍ଦ୍ର ସାହୁ ସୁସ୍ଥ ଓ ସୁରକ୍ଷିତ ଥିବା ଜଣାପଡ଼ିଛି।
