ଇଣ୍ଡୋନେସିଆରେ ବିଜୁ ପଟ୍ଟନାୟକଙ୍କୁ ମନେ ପକାଇଲେ ମୋଦି, ଐତିହାସିକ ଅବଦାନର କଲେ ଭୂୟସୀ ପ୍ରଶଂସା
ଜାକର୍ତ୍ତା: ଇଣ୍ଡୋନେସିଆ ଗସ୍ତରେ ଥିବା ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଓଡ଼ିଶାର ବରପୁତ୍ର ତଥା ପୂର୍ବତନ ମୁଖ୍ୟମନ୍ତ୍ରୀ ବିଜୁ ପଟ୍ଟନାୟକଙ୍କ ଐତିହାସିକ ଅବଦାନକୁ ଉଚ୍ଚ ପ୍ରଶଂସା କରିଛନ୍ତି। ଜାକର୍ତ୍ତାସ୍ଥିତ ଇଣ୍ଡୋନେସିଆ ପାର୍ଲାମେଣ୍ଟରେ ଉଦ୍ବୋଧନ ଦେଇ ସେ କହିଛନ୍ତି ଯେ, ଇଣ୍ଡୋନେସିଆର ସ୍ୱାଧୀନତା ସଂଗ୍ରାମ ସମୟରେ ବିଜୁ ପଟ୍ଟନାୟକଙ୍କ ସାହସିକ ଭୂମିକା ଦୁଇ ଦେଶର ସମ୍ପର୍କକୁ ଆହୁରି ସୁଦୃଢ଼ କରିଥିଲା। ପ୍ରଧାନମନ୍ତ୍ରୀଙ୍କ ଏହି ମନ୍ତବ୍ୟକୁ ନେଇ ବ୍ୟାପକ ଚର୍ଚ୍ଚା ଆରମ୍ଭ ହୋଇଛି।
ମୋଦି କହିଛନ୍ତି ଯେ, ୧୯୪୦ ଦଶକରେ ଭାରତ ଓ ଇଣ୍ଡୋନେସିଆ ଉଭୟ ସ୍ୱାଧୀନତା ପାଇଁ ସଂଘର୍ଷ କରୁଥିଲେ। ସେହି ସମୟରେ ପାଇଲଟ୍ ବିଜୁ ପଟ୍ଟନାୟକ ନିଜ ଡାକୋଟା ଡିସି-୩ ବିମାନରେ ତତ୍କାଳୀନ ଇଣ୍ଡୋନେସିଆ ନେତା ସୁତନ ସାହରିର ଓ ସୁକର୍ଣ୍ଣୋଙ୍କୁ ଡଚ୍ ନିୟନ୍ତ୍ରଣ ଅଞ୍ଚଳରୁ ସୁରକ୍ଷିତ ଭାବେ ଭାରତକୁ ଆଣିଥିଲେ। ଏହି ସାହସିକ କାର୍ଯ୍ୟ ପାଇଁ ବିଜୁ ପଟ୍ଟନାୟକ ଇଣ୍ଡୋନେସିଆରେ ‘ଭୂମିପୁତ୍ର’ ଉପାଧିରେ ସମ୍ମାନିତ ହୋଇଥିଲେ। ପ୍ରଧାନମନ୍ତ୍ରୀ କହିଛନ୍ତି, ବିଜୁବାବୁଙ୍କ ଅବଦାନ ଭାରତ-ଇଣ୍ଡୋନେସିଆ ବନ୍ଧୁତ୍ୱର ଏକ ଗୌରବମୟ ଅଧ୍ୟାୟ।
ନିଜ ଭାଷଣରେ ପ୍ରଧାନମନ୍ତ୍ରୀ ଭାରତ-ଇଣ୍ଡୋନେସିଆ ସମ୍ପର୍କକୁ ଆହୁରି ନିବିଡ଼ କରିବା ଉପରେ ଗୁରୁତ୍ୱ ଦେଇଥିଲେ। ସେ କହିଥିଲେ, ଭାରତ ବିସ୍ତାରବାଦ ନୁହେଁ, ବିକାଶ ଓ ସହଯୋଗର ନୀତିରେ ବିଶ୍ୱାସ କରେ। ଭାରତର ୧୪୦ କୋଟି ଏବଂ ଇଣ୍ଡୋନେସିଆର ୨୯ କୋଟି ଲୋକ ମିଳିତ ଭାବେ ଆଗକୁ ବଢ଼ିଲେ ବିଶ୍ୱରେ ଏକ ନୂଆ ଇତିହାସ ସୃଷ୍ଟି ହେବ ବୋଲି ସେ କହିଥିଲେ। ଏହି ଅବସରରେ ଇଣ୍ଡୋନେସିଆର ରାଷ୍ଟ୍ରପତି ପ୍ରବୋଓ ସୁବିଆଣ୍ଟୋ ଓ ସେଠାକାର ବରିଷ୍ଠ ମନ୍ତ୍ରୀମାନେ ମଧ୍ୟ ଉପସ୍ଥିତ ଥିଲେ।
