ମୋହନଲାଲଙ୍କ ପାଖରେ ମିଳିଲା ୧୦ ହାତୀଦାନ୍ତ ଓ ୪୬କେଜିର ୧୩ମୂର୍ତ୍ତି, କହିଲେ- “ଏସବୁ ଉତ୍ତରାଧିକାର ସୂତ୍ରରେ ମିଳିଛି”
ମାଲାୟାଲମ ସୁପରଷ୍ଟାର ମୋହନଲାଲ ପୁଣିଥରେ ହାତୀଦାନ୍ତ ମାମଲାକୁ ନେଇ ଚର୍ଚ୍ଚାରେ ଅଛନ୍ତି। ସେ କେରଳ ବନ ବିଭାଗକୁ ଜଣାଇଛନ୍ତି ଯେ, ତାଙ୍କ ପାଖରେ ୧୦ଟି ହାତୀଦାନ୍ତ ଏବଂ ହାତୀଦାନ୍ତରେ ତିଆରି ୧୩ଟି ମୂର୍ତ୍ତି ରହିଛି। ଏହି ମୂର୍ତ୍ତିଗୁଡ଼ିକର ମୋଟ ଓଜନ ପ୍ରାୟ ୪୬ କିଲୋଗ୍ରାମ ବୋଲି କୁହାଯାଇଛି। ମୋହନଲାଲଙ୍କ କହିବା ଅନୁସାରେ, ଏହି ସମସ୍ତ ହାତୀଦାନ୍ତ ତାଙ୍କୁ ଉତ୍ତରାଧିକାର ସୂତ୍ରରେ କିମ୍ବା ପୁରସ୍କାର ସ୍ୱରୂପ ମିଳିଥିଲା।
ବନ ବିଭାଗ ସୂତ୍ରରୁ ଜଣାପଡ଼ିଛି, ମୋହନଲାଲ ପୂର୍ବରୁ କେବଳ ୪ଟି ହାତୀଦାନ୍ତ ଥିବା ସୂଚନା ଦେଇଥିଲେ। ବର୍ତ୍ତମାନ ‘ଓ୍ୱାନ୍-ଟାଇମ୍ ଏମନେଷ୍ଟି ସ୍କିମ୍’ ଅନୁସାରେ ସେ ଆଉ ୬ଟି ହାତୀଦାନ୍ତ ଏବଂ ୧୩ଟି ମୂର୍ତ୍ତିର ତଥ୍ୟ ଦାଖଲ କରିଛନ୍ତି। ଏହି ମୂର୍ତ୍ତିମାନଙ୍କ ମଧ୍ୟରେ ଭଗବାନ କୃଷ୍ଣ, ଭଗବାନ ରାମ ଓ ତିରୁପତି ବାଲାଜୀଙ୍କ ମୂର୍ତ୍ତି ମଧ୍ୟ ରହିଛି। ବନ ବିଭାଗ ଏହି ସମସ୍ତ ଜିନିଷର ସତ୍ୟତା ଯାଞ୍ଚ କରିବା ପାଇଁ ଆବଶ୍ୟକ ହେଲେ ଡିଏନଏ ସମେତ ଅନ୍ୟାନ୍ୟ ପରୀକ୍ଷା କରିପାରେ।
ଏହି ମାମଲାର ଆରମ୍ଭ ୨୦୧୧ ମସିହାରେ ହୋଇଥିଲା। ସେତେବେଳେ ଆୟକର ବିଭାଗର ଚଢ଼ାଉ ସମୟରେ ମୋହନଲାଲଙ୍କ ଘରୁ ହାତୀଦାନ୍ତ ଏବଂ ସେଥିରେ ତିଆରି ସାମଗ୍ରୀ ଜବତ କରାଯାଇଥିଲା। ପରେ କେରଳ ବନ ବିଭାଗ ବନ୍ୟଜନ୍ତୁ ସୁରକ୍ଷା ଆଇନ ଅନୁସାରେ ତାଙ୍କ ବିରୋଧରେ ମାମଲା ରୁଜୁ କରିଥିଲା। ଯଦିଓ ରାଜ୍ୟ ସରକାର ମାମଲା ପ୍ରତ୍ୟାହାର ପାଇଁ ଚେଷ୍ଟା କରିଥିଲେ, କୋର୍ଟ ସେହି ଆବେଦନକୁ ଖାରଜ କରିଥିଲେ। ବର୍ତ୍ତମାନ ଏମନେଷ୍ଟି ସ୍କିମ୍ ଅନୁସାରେ ମୋହନଲାଲଙ୍କ ଘୋଷଣାକୁ ବନ ବିଭାଗ ଯାଞ୍ଚ କରିବ, କିନ୍ତୁ ଏଥିରେ ଚାଲିଥିବା ଆଇନଗତ ପ୍ରକ୍ରିୟା ସ୍ୱତଃ ଶେଷ ହେବ ନାହିଁ।
