ଭାରତ-ଅଷ୍ଟ୍ରେଲିଆ ମଧ୍ୟରେ ଐତିହାସିକ ଚୁକ୍ତି; ଗଗନୟାନ ମିଶନକୁ ମିଳିବ ବଡ଼ ସହଯୋଗ
ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଅଷ୍ଟ୍ରେଲିଆ ଗସ୍ତ ସମୟରେ ଭାରତ ଓ ଅଷ୍ଟ୍ରେଲିଆ ମଧ୍ୟରେ ଶକ୍ତି, ପ୍ରତିରକ୍ଷା, ମହାକାଶ, ବାଣିଜ୍ୟ ଏବଂ ଗୁରୁତ୍ୱପୂର୍ଣ୍ଣ ଖଣିଜ କ୍ଷେତ୍ରରେ ଏକାଧିକ ଐତିହାସିକ ଚୁକ୍ତି ସ୍ୱାକ୍ଷରିତ ହୋଇଛି। ମେଲବୋର୍ଣ୍ଣରେ ଅଷ୍ଟ୍ରେଲିଆ ପ୍ରଧାନମନ୍ତ୍ରୀ ଆଣ୍ଟୋନି ଆଲବାନିଜଙ୍କ ସହ ଆଲୋଚନା ପରେ ଉଭୟ ନେତା ମିଳିତ ସାମ୍ବାଦିକ ସମ୍ମିଳନୀରେ ଏହି ସହଯୋଗର ଘୋଷଣା କରିଛନ୍ତି।
ପ୍ରଧାନମନ୍ତ୍ରୀ ମୋଦୀ କହିଛନ୍ତି, ଅଷ୍ଟ୍ରେଲିଆରୁ ଭାରତକୁ ୟୁରାନିୟମ ଯୋଗାଣ ଦେଶର ସ୍ୱଚ୍ଛ ଶକ୍ତି ଅଭିଯାନକୁ ଆହୁରି ମଜବୁତ କରିବ। ଏହାସହ ଉଭୟ ଦେଶ ମିଳିତ ଭାବେ ଗୁରୁତ୍ୱପୂର୍ଣ୍ଣ ଖଣିଜ ପଦାର୍ଥ କରିଡର ବିକଶିତ କରିବାକୁ ସହମତି ପ୍ରକାଶ କରିଛନ୍ତି। ଅଷ୍ଟ୍ରେଲିଆର କୋକୋସ୍ ଦ୍ୱୀପପୁଞ୍ଜରେ ଏକ ମହାକାଶ ଟ୍ରାକିଂ ଟର୍ମିନାଲ ସ୍ଥାପନ କରାଯିବ, ଯାହା ଭାରତର ଗଗନୟାନ ମାନବ ମହାକାଶ ମିଶନ ପାଇଁ ବଡ଼ ସହାୟକ ସାବ୍ୟସ୍ତ ହେବ।
ଏହାବ୍ୟତୀତ ଉଭୟ ଦେଶ ଅଷ୍ଟ୍ରେଲିଆ-ଭାରତ ସାଇବର, ଗୁରୁତ୍ୱପୂର୍ଣ୍ଣ ପ୍ରଯୁକ୍ତିବିଦ୍ୟା ଓ ଯୋଗାଣ ଶୃଙ୍ଖଳା ସହଭାଗୀତା ଆରମ୍ଭ କରିବାକୁ ମଧ୍ୟ ରାଜି ହୋଇଛନ୍ତି। ଏହି ସହଭାଗୀତା ଅଧୀନରେ କୃତ୍ରିମ ବୁଦ୍ଧିମତ୍ତା (AI), କ୍ୱାଣ୍ଟମ୍ କମ୍ପ୍ୟୁଟିଂ, ସେମିକଣ୍ଡକ୍ଟର, ସାଇବର ସୁରକ୍ଷା ଏବଂ ଡିଜିଟାଲ୍ ସ୍ଥିତିସ୍ଥାପକତା ଭଳି କ୍ଷେତ୍ରରେ ମିଳିତ ଗବେଷଣା ଓ ନିବେଶକୁ ଗୁରୁତ୍ୱ ଦିଆଯିବ। ଏହି ଚୁକ୍ତି ଦ୍ୱାରା ଭାରତ-ଅଷ୍ଟ୍ରେଲିଆ କୌଶଳଗତ ସହଭାଗୀତା ଆହୁରି ସୁଦୃଢ଼ ହେବ ବୋଲି ଉଭୟ ଦେଶ ଆଶା ପ୍ରକାଶ କରିଛନ୍ତି।
