ଲର୍ଡ୍ସରେ ଇତିହାସ ରଚିଲେ ସ୍ମୃତି ମନ୍ଧାନା! ଟେଷ୍ଟରେ ଅର୍ଦ୍ଧଶତକ ହାସଲ କରିବାରେ ପ୍ରଥମ ମହିଳା କ୍ରିକେଟର, ୨୬୪ ରନ୍ ପଛରେ ଇଂଲଣ୍ଡ
ଲଣ୍ଡନ: ଐତିହାସିକ ଲର୍ଡ୍ସ କ୍ରିକେଟ୍ ଗ୍ରାଉଣ୍ଡରେ ଭାରତ ଓ ଇଂଲଣ୍ଡ ମହିଳା ଦଳ ମଧ୍ୟରେ ଖେଳାଯାଉଥିବା ଏକମାତ୍ର ଟେଷ୍ଟ ମ୍ୟାଚ୍ର ପ୍ରଥମ ଦିନରେ ଭାରତ ଦୃଢ଼ ସ୍ଥିତିରେ ରହିଛି। ପ୍ରଥମେ ବ୍ୟାଟିଂ କରି ଭାରତ ୨୮୫ ରନ୍ରେ ଅଲ୍ଆଉଟ୍ ହୋଇଥିବା ବେଳେ, ଦିନ ଶେଷ ସୁଦ୍ଧା ଇଂଲଣ୍ଡ ୧ ୱିକେଟ୍ ହରାଇ ମାତ୍ର ୨୧ ରନ୍ କରିଛି। ଫଳରେ ପ୍ରଥମ ଇନିଂସ୍ରେ ଇଂଲଣ୍ଡ ଏବେ ବି ୨୬୪ ରନ୍ ପଛରେ ରହିଛି। ଏହି ମ୍ୟାଚ୍ରେ ସ୍ମୃତି ମନ୍ଧାନା ଲର୍ଡ୍ସରେ ଟେଷ୍ଟ ଅର୍ଦ୍ଧଶତକ ହାସଲ କରିବାରେ ପ୍ରଥମ ମହିଳା କ୍ରିକେଟର ହୋଇ ଇତିହାସ ସୃଷ୍ଟି କରିଛନ୍ତି।
ଭାରତୀୟ ଦଳର ଆରମ୍ଭ ଭଲ ହୋଇନଥିଲା। ଶେଫାଳି ବର୍ମା ଖାତା ଖୋଲି ପାରିନଥିବା ବେଳେ ୟସ୍ତିକା ଭାଟିଆ ୧୨ ରନ୍ କରି ଆଉଟ୍ ହୋଇଥିଲେ। ୩୭ ରନ୍ରେ ୨ଟି ୱିକେଟ୍ ହରାଇବା ପରେ ସ୍ମୃତି ମନ୍ଧାନା ଓ ଜେମିମା ରୋଡ୍ରିଗ୍ସ ଇନିଂସ୍ ସମ୍ଭାଳିଥିଲେ। ଉଭୟଙ୍କ ମଧ୍ୟରେ ୬୪ ରନ୍ର ଭାଗୀଦାରି ହୋଇଥିଲା। ଜେମିମା ୩୫ ରନ୍ କରି ଆଉଟ୍ ହେବା ପରେ ଅଧିନାୟିକା ହର୍ମନପ୍ରୀତ କୌର କ୍ରିଜ୍କୁ ଆସି ମନ୍ଧାନାଙ୍କ ସହ ଦଳକୁ ମଜବୁତ ସ୍ଥିତିରେ ପହଞ୍ଚାଇଥିଲେ। ମନ୍ଧାନା ୧୧ଟି ଚୌକା ଓ ଗୋଟିଏ ଛକା ସହ ୮୩ ରନ୍ କରିଥିବା ବେଳେ, ହର୍ମନପ୍ରୀତ ୫୮ ରନ୍ର ଦାୟିତ୍ୱପୂର୍ଣ୍ଣ ଇନିଂସ୍ ଖେଳିଥିଲେ।
ମଧ୍ୟକ୍ରମରେ ରିଚା ଘୋଷ ଓ ସ୍ନେହ ରାଣା ବଡ଼ ସ୍କୋର କରିପାରିନଥିଲେ ମଧ୍ୟ ଦୀପ୍ତି ଶର୍ମା ଶେଷ ପର୍ଯ୍ୟନ୍ତ ସଂଘର୍ଷ କରି ୭ଟି ଚୌକା ସହ ୫୭ ରନ୍ କରି ଭାରତକୁ ୨୮୫ ରନ୍ରେ ପହଞ୍ଚାଇଥିଲେ। ଇଂଲଣ୍ଡ ପକ୍ଷରୁ ସୋଫି ଏକ୍ଲେଷ୍ଟୋନ୍ ୩ଟି ୱିକେଟ୍ ନେଇଥିବା ବେଳେ ଲରେନ୍ ଫିଲର୍, ଇସି ୱଙ୍ଗ୍ ଓ ମାଡି ଭିଲିୟର୍ସ ୨ଟି ଲେଖାଏଁ ୱିକେଟ୍ ହାସଲ କରିଥିଲେ। ଜବାବରେ ବ୍ୟାଟିଂ ଆରମ୍ଭ କରିଥିବା ଇଂଲଣ୍ଡ ପ୍ରଥମ ଦିନ ଶେଷ ସୁଦ୍ଧା ୨୧/୧ ସ୍କୋର କରିଛି। ଟାମି ବିଉମଣ୍ଟ ୨ ରନ୍ କରି ଆଉଟ୍ ହୋଇଥିବା ବେଳେ ମାୟା ବୌଚିର ୧୭ ଓ ହିଦର ନାଇଟ୍ ୧ ରନ୍ କରି ଅପରାଜିତ ରହିଛନ୍ତି।
